សម្តេចតេជោ ហ៊ុន សែន បញ្ជាក់ថា ការញុះញង់ឱ្យកងទ័ពបះបោរប្រឆាំងរដ្ឋាភិបាល មានន័យថា រដ្ឋប្រហារ
សម្តេចតេជោ ហ៊ុន សែន បញ្ជាក់ថា ការញុះញង់ឱ្យកងទ័ពបះបោរប្រឆាំងរដ្ឋាភិបាល មានន័យថា រដ្ឋប្រហារសម្តេចតេជោ ហ៊ុន សែន នាយករដ្ឋមន្ត្រី ថ្លែងថា ក្នុងជំនួបពិភាក្សាការងាររជាមួយលោក ខេនថារ៉ូ សូណូរីឡា សមាជិកសភា និងជាទីប្រឹក្សាលោកនាយករដ្ឋមន្ត្រីជប៉ុន ស៊ីនហ្សូ អាបេ លោកបាននិយាយថា «ខ្ញុំថាឯកឧត្តម ទង្វើឱ្យកងទ័ពបះបោរប្រឆាំងរដ្ឋាភិបាលមានន័យថាម៉េច? មានន័យថារដ្ឋប្រហារ បើកាលណាកងទ័ពចេញមកដើម្បីផ្តួលរដ្ឋាភិបាលវាមានន័យថា រដ្ឋប្រហារ អញ្ចឹងទោសឯងមួយជាន់ទៀត»។
សម្តេចនាយករដ្ឋមន្ត្រី ហ៊ុន សែន លើកឡើងដូចនេះ ក្នុងពិធីប្រគល់សញ្ញាបត្រដល់និស្សិត នៃសាកលវិទ្យាល័យអាស៊ីអឺរ៉ុបជាង២ពាន់នាក់នាព្រឹកថ្ងៃទី២៧ ខែមីនា ឆ្នាំ២០១៨នេះ។
សូមរំលឹកថា ជាច្រើនលើកច្រើនសារ ទណ្ឌិត សម រង្ស៊ី បានធ្វើការអំពាវនាវពីក្រៅប្រទេស ឱ្យកងកម្លាំងប្រដាប់អាវុធ បែរចុងកាណុង ងើបបះបោរប្រឆាំងនឹងរាជរដ្ឋាភិបាល ហើយទង្វើរនេះ ត្រូវបាននាយឧត្តមសេនីយ៍ ប៉ុល សារឿន អគ្គមេបញ្ជាការ នៃកងយោធពលខេមរភូមិន្ទ កាលពីរសៀលថ្ងៃទី០៦ ខែធ្នូ ឆ្នាំ២០១៧ កន្លងទៅបានថ្លែងនៅក្នុងសន្នីីទសារព័ត៌មានថា មិនសុខចិត្តចំពោះការអំពាវនាវរបស់ លោក សម រង្ស៊ី ឡើយ លោកថា ការអំពាវនាវនេះ បានធ្វើឱ្យខុសវិន័យ និងលក្ខន្តិកៈកងទ័ព និងរដ្ឋធម្មនុញ្ញ ហើយកងទ័ពត្រូវតែតស៊ូតាមផ្លូវច្បាប់ចំពោះករណីនេះ ហើយបន្ទាប់មកនៅថ្ងៃទី១៨ ខែមករា ឆ្នាំ២០១៨ លោក សៀង សុខ ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ សម្រេចចោទប្រកាន់ទណ្ឌិត សម រង្ស៊ី ដែលញុះញង់ឱ្យកងទ័ពប្រឆាំងរាជរដ្ឋាភិបាលស្របនៃកម្ពុជា ដោយ ទណ្ឌិតសម រង្ស៊ី ត្រូវបានចោទប្រកាន់ចំនួនពីរបទល្មើស គឺបទ”ញុះញង់កុំឱ្យយោធិនស្តាប់បង្គាប់ និងធ្វើឱ្យខូចទឹកចិត្តកងទ័ព”តាមមាត្រា៤៧១និងមាត្រា៤៧២នៃក្រមព្រហ្មទណ្ឌ៕
