លោកនាយករដ្ឋមន្រ្ដី ហ៊ុន សែន ប្រកាសមិនចរចាជាមួយក្រុមក្បត់ជាតិជាដាច់ខាត
សម្តេចតេជោ ហ៊ុន សែន ប្រកាសមិនចរចាជាមួយក្រុមក្បត់ជាតិជាដាច់ខាត
ថ្លែងចេញពីពិធីប្រគល់សញ្ញាបត្រជូនដល់ និស្សិតសាកលវិទ្យាល័យអាស៊ីអឺរ៉ុប សរុបចំនួន ២,១២៥ នាក់ នៅវិទ្យាស្ថានជាតិអប់រំ នៅថ្ងៃទី២៧ ខែមីនា ឆ្នាំ២០១៨នេះ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានបញ្ជាក់យ៉ាងម៉ឺងម៉ាត់ថា លោកគ្មានការចរចាណាមួយជាមួយពួកក្បត់ជាតិជាដាច់ខាត។
ពួកក្បត់ជាតិ អាចជាការថ្លែងសំដៅទៅទណ្ឌិត សម រង្ស៊ី ដែលធ្លាប់ជាដៃគូសន្ទនាពីមុនមក ខណៈដែលមេដឹកនាំបក្សប្រឆាំងរូបនេះ បានបង្ហោះសារបង្ហាញនូវការប៉ុនប៉ងចង់វិលទៅរកតុចរចាវិញ បន្ទាប់ពីទ័លច្រកផ្នែកនយោបាយ។ ប៉ុន្តែ នៅថ្ងៃនេះ សម្តេចតេជោ ហ៊ុន សែន បានបញ្ជាក់ជំហរយ៉ាងច្បាស់ថា ៖
១ . គ្មានការចរចាជាមួយពួកក្បត់ជាតិ
២. គ្មានការលើកលែងទោស ឬបន្ធូរបន្ថយទោសឱ្យពួកក្បត់ជាតិនោះទេ។
បន្ថែមពីលើនេះ សម្តេចតេជោ ហ៊ុន សែន ក៏បានរំលឹកជាថ្មីថា « លោកឯងបានបង្កើតនូវហឹង្សាតាមរយៈការដុតរូបទីងមោង ដែលមានរូបសម្តេច ដែលជាការប្រមាថចំពោះរូបលោក។ សម្តេចក៏បានថ្លែងផងដែរថា វប្បធម៌សន្ទនាត្រូវបានបំផ្លាញដោយសារអតីតមេដឹកនាំបក្សប្រឆាំងបានប្រមាថមកលើសម្តេច និងចោទមកលើក្រុមគ្រួសារសម្តេច ដូចជា ថា ហ៊ុន ម៉ាណែត ជាកូនរបស់អតីតមេដឹកនាំវៀតណាមជាដើម ដែលពាក្យសម្តីទាំងអស់នេះហើយ មានតម្លៃស្មើនឹងការចាប់ដៃជាន់ជើង ឬជាអ្នកបំផ្លាញវប្បធម៌សន្ទនា។
សម្តេចតេជោ ក៏បានបន្ថែមដែរថា បើទោះជាបក្សប្រឆាំងបង្កើនការរិះគន់ និងនិយាយបំភ្លើសថា ស្ថានភាពនៅកម្ពុជាអាក្រក់ និងមានវិបត្តិយ៉ាងណាក្តី ក៏សម្តេចបញ្ជាក់យ៉ាងច្បាស់ថា នៅពេលខាងមុខនឹងមានការបោះឆ្នោតដោយមិនអាក់ខាននោះទេ។
