ច្រកអន្តរជាតិសេដ្ឋកិច្ចស្ទឹងបត់-បានណងអៀន គឺនឹងជួយពង្រឹងសេដ្ឋកិច្ចជាតិ
ច្រកអន្តរជាតិសេដ្ឋកិច្ចស្ទឹងបត់-បានណងអៀន គឺនឹងជួយពង្រឹងសេដ្ឋកិច្ចជាតិលោកនាយករដ្ឋមន្រ្តី ហ៊ុន សែន បានថ្លែងអំណរគុណដល់ក្រសួងសាធារណៈការនិងដឹកជញ្ជូនកម្ពុជា និង ក្រសួងដឹកជញ្ជូននៃព្រះរាជាណាចក្រថៃ ព្រមទាំងទីភ្នាក់ងារសហប្រតិបត្តិកការដើម្បីអភិវឌ្ឍន៍សេដ្ឋកិច្ចនៃប្រទេសជិតខាង (NEDA) ដែលបានរួមសហការគ្នាសម្រេចបាននូវសមិទ្ធផលល្អជាច្រើនក្នុងថ្ងៃនេះ ដែលក្នុងនោះរួមមានទាំងការផ្តល់ក្បាលរថភ្លើង និងផ្លូវដែកដែលឈប់ប្រើប្រវែង១៤០គីឡូម៉ែត្រ (ចាស់ថៃ តែថ្មីកម្ពុជា) ពីមិត្តថៃមកឱ្យកម្ពុជា ជាមួយនឹងការតភ្ជាប់មុខតំណស្ពានមិត្តភាពកម្ពុជា-ថៃ ស្ទឹងបត់-បានណងអៀន នៅទីក្រុងប៉ោយប៉ែត។លោកបានថ្លែងដូចនេះ នៅព្រឹកថ្ងៃទី២២ ខែមេសា ឆ្នាំ២០១៩ ក្នុងឱកាសដែលលោកនិង លោក ប្រាយុទ្ធ ចាន់អូចា នាយករដ្ឋមន្ត្រីនៃព្រះរាជាណាចក្រថៃ អញ្ជើញជាអធិបតីរួមគ្នាក្នុងពិធីចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ (ច្រកព្រំដែនស្ទឹងបត់-បានណងអៀន)។
លោកនាយករដ្ឋមន្រ្តី ហ៊ុន សែន បានគូសបញ្ជាក់ថា នៅពេលឆាប់ៗនេះ គឺយើងនឹងសាងសង់អគារសម្រួលពាណិជ្ជកម្មបន្ថែមនៅច្រកអន្តរជាតិនេះ ដើម្បីជួយសម្រួលដល់ការដឹកទំនិញធំៗដែលត្រូវបញ្ចៀសចេញពីច្រកចេញចូលតាមស្ពានប៉ោយប៉ែតសព្វថ្ងៃដែលមានលក្ខណៈតូចចង្អៀត គឺនឹងទុកសម្រាប់ឱ្យតែទេសចរឆ្លងកាត់តែប៉ុណ្ណោះ។ ទន្ទឹមនឹងនេះ យើងនឹងសាងសង់ស្ពានដែកមួយផ្សេងទៀត ដែលមានទទឹង ៩ម៉ែត្រ និងបណ្តោយ ៥០ម៉ែត្រ សម្រាប់បងប្អូនដែលមានមុខរបរអូសរទេះទំនិញតូចៗពីផ្សាររង់ក្លឿ មកកាន់ប៉ោយប៉ែតបានប្រើប្រាស់ដាច់ដោយឡែក។
លោកនាយករដ្ឋមន្រ្តី ហ៊ុន សែន បានបន្ថែមថា ក្រោយពីស្ពានមិត្តភាពកម្ពុជា-ថៃ ស្ទឹងបត់-បានណងអៀន បានបើកជាផ្លូវការហើយ គឺរាល់ទំនិញចេញចូលតាមរថយន្តធំៗត្រូវដឹកជញ្ជូនតាមស្ពានស្ទឹងបត់-បានណងអៀន វិញម្តង ហើយដែលងាយស្រួលឆ្ពោះទីកាន់ផ្លូវជាតិលេខ ៥ បានកាន់តែងាយស្រួលនិងឆាប់រហ័សទៀតផង៕
