ផ្សារគំរូកំពត-កៀនយ៉ាង នឹងចាប់ផ្តើមសាងសង់ក្នុងពេលឆាប់ៗនេះ
ផ្សារគំរូកំពត-កៀនយ៉ាង នឹងចាប់ផ្តើមសាងសង់ក្នុងពេលឆាប់ៗនេះ
ផ្សារគំរូទី ២ នៅច្រកទ្វារព្រំដែនអន្តរជាតិព្រែកចាករបស់ខេត្តកំពត និងខេត្តកៀនយ៉ាងរបស់ប្រទេសវៀតណាមនឹងត្រូវសាងសង់ឡើងក្នុងពេលឆាប់ៗខាងមុខនេះ។
ការបង្ហាញពីផែនការបង្កើតផ្សារនេះបានធ្វើឡើង បន្ទាប់ពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មកាលពីថ្ងៃទី ២៧ ខែកុម្ភៈ បានចុះទៅពិនិត្យទីតាំងសង់ផ្សារគំរូនៅច្រកទ្វារព្រំដែនអន្តរជាតិព្រែកចាក។
លោកនាយករដ្ឋមន្ត្រី ហ៊ុន សែន ក្នុងពិធីបើកសម្ពោធផ្សារព្រំដែនដារនៅខេត្តត្បូងឃ្មុំកាលពីចុងខែធ្នូ ឆ្នាំ ២០១៩ បានបញ្ជាឱ្យក្រសួងពាណិជ្ជកម្មសហការជាមួយខេត្តកំពត និងខេត្តស្វាយរៀងដើម្បីសាងសង់ផ្សារជាប់ព្រំដែនចំនួន ២ បន្ថែមទៀត។
លោកថ្លែងថា៖
«គោលបំណងរបស់ផ្សារនេះនឹងបម្រើដល់ការនាំចេញទំនិញទៅវៀតណាម។ យើងចង់ប្រើប្រាស់ថវិការបស់យើងដើម្បីសាងសង់ផ្សារគំរូ ២ ទៀត។ នេះជាការជំរុញរបស់ខ្ញុំជាមួយនឹងទិសដៅក្នុងការប្រែក្លាយព្រំដែនជាមួយបណ្តាប្រទេសជិតខាង»។
លោក សូរស័ក្តិ ឱ្យដឹងថា គម្រោងអភិវឌ្ឍសាងសង់ផ្សារគំរូព្រំដែននេះស្ថិតនៅភូមិថ្កូវ ឃុំឫស្សីស្រុកខាងកើត ស្រុកកំពង់ត្រាច ខេត្តកំពត លើផ្ទៃដី ២ ហិកតាក្នុងជំហានដំបូង ប៉ុន្តែបើតាមផែនការផ្សារនេះគម្រោងសង់លើផ្ទៃដីសរុប ៥០ ហិកតា។
លោកនិយាយថា៖
«ក្នុងជំហានដំបូងគម្រោងនេះនឹងអភិវឌ្ឍទៅលើហេដ្ឋារចនាសម្ព័ន្ធតភ្ជាប់ផ្លូវក្នុងតំបន់ព្រំដែនរវាងកម្ពុជា-វៀតណាម អគារផ្សារកម្ពស់ ២ ជាន់រួមនឹងហេដ្ឋារចនាសម្ព័ន្ធផ្សេងៗទៀត»។
លោករដ្ឋមន្ត្រីបានបន្ថែមថា ការសាងសង់ផ្សារគំរូនេះគឺជាគម្រោងអាទិភាពទី ២ បន្ទាប់ពីផ្សារគំរូព្រំដែនបានកសាងរួចរាល់នៅខេត្តត្បូងឃ្មុំជាប់ព្រំដែនវៀតណាម។ ផ្សារគំរូនេះគ្រោងនឹងប្រើថវិកា ២ លានដុល្លារ ដែលជាថវិការដ្ឋាភិបាលកម្ពុជា។
លោកឱ្យដឹងទៀតថា៖
«ខ្ញុំសូមស្នើដល់អាជ្ញាធរមូលដ្ឋានគ្រប់ថ្នាក់ និងអ្នកពាក់ព័ន្ធទាំងអស់ជួយសម្រួល និងសហការឱ្យបានល្អជាមួយក្រុមហ៊ុនសាងសង់ ដើម្បីធ្វើយ៉ាងណាឱ្យដំណើរការគម្រោងនេះបានសម្រេចលទ្ធផលជោគជ័យឆាប់រហ័ស។ តាមផែនការផ្សារគំរូនេះនឹងសាងសង់បញ្ចប់នៅដើមឆ្នាំក្រោយ ឬពាក់កណ្ដាលឆ្នាំ ២០២២»។
លោក ជាវ តាយ អភិបាលខេត្តកំពតបានអោយដឹងកាលពីថ្ងៃអាទិត្យថា គណៈកម្មការអន្តរក្រសួងដែលមានក្រសួងពាណិជ្ជកម្ម ក្រសួងសេដ្ឋកិច្ចនិងហិរញ្ញវត្ថុ និងក្រសួងរៀបចំដែនដី នគរូបនីយកម្ម និងសំណង់បានឯកភាពជ្រើសរើសយកទីតាំងនេះដើម្បីឈានទៅសាងសង់ផ្សារគំរូព្រំដែននេះ។
លោកបានបន្ថែមថា គណៈកម្មការនេះកំពុងប្រឹងប្រែងជំរុញកិច្ចការនេះឱ្យបានលឿនដើម្បីអាចដំណើរការសាងសង់តាមផែនការនៅឆ្នាំនេះ។
លោកលើកឡើងថា៖
«តាមរយៈផ្សារនេះ ការដោះដូរទំនិញជាប់ព្រំដែននឹងរួចពន្ធ ប្រជាជនខ្មែរភាគច្រើនមានទំនិញកសិកម្ម និងកសិឧស្សាហកម្មនឹងដូរគ្នានៅទីនោះ។ ខ្ញុំសង្ឃឹមថា សមិទ្ធផលនេះនឹងអាចធ្វើឱ្យការដោះដូរទំនិញតាមព្រំដែនមានលក្ខណៈកាន់តែល្អប្រសើរថែមទៀតនឹងធ្វើឱ្យជីវភាពប្រជាជនកាន់តែល្អប្រសើរឡើងមួយកម្រិត»។
លោក លឹម ហេង អនុប្រធានសភាពាណិជ្ជកម្មបានឱ្យដឹងថា កម្ពុជានឹងមានផ្សារគំរូទី២ ដែលជាទីកន្លែងសម្រាប់ដោះដូរទំនិញឆ្លងព្រំដែនរវាងកម្ពុជា និងវៀតណាម។
លោកបញ្ជាក់ថា៖
«ខ្ញុំគិតនេះជារឿងល្អដែលយើងបង្កើតផ្សារគំរូតាមព្រំដែន។ ផ្សារគំរូនេះនឹងជំរុញទីផ្សារ និងតម្លៃផលិតផលរបស់កម្ពុជាដែលភាគច្រើនយើងផលិតលើសតម្រូវការ។ ខ្ញុំសង្ឃឹមថា ផ្សារគំរូនេះនឹងបង្កើតនៅតាមព្រំដែនកម្ពុជា-ថៃ និងកម្ពុជា-ឡាវបន្ថែមទៀត»។
កាលពីឆ្នាំ ២០២០ ទំហំពាណិជ្ជកម្មទ្វេភាគីកម្ពុជា-វៀតណាម មានតម្លៃប្រមាណ ៥ ពាន់លានដុល្លារ គឺប្រហាក់ប្រហែលនឹងឆ្នាំ ២០១៩ ដែលមាន ៥,៣ ពាន់លានដុល្លារ៕
