ខ្សែភាពយន្តឯកសារដ៏មានអត្ថន័យជាប្រវត្តិសាស្ត្រមួយមានចំណងជើងថា « ដំណើរឆ្ពោះទៅរកការសង្គ្រោះជាតិ » នឹងផ្សាយនៅម៉ោង៧យប់ស្អែកតាមគ្រប់បណ្តាស្ថានីយ៍ទូរទស្សន៍ក្នុងស្រុក
ខ្សែភាពយន្តឯកសារដ៏មានអត្ថន័យជាប្រវត្តិសាស្ត្រមួយមានចំណងជើងថា « ដំណើរឆ្ពោះទៅរកការសង្គ្រោះជាតិ » នឹងផ្សាយនៅម៉ោង៧យប់ស្អែកតាមគ្រប់បណ្តាស្ថានីយ៍ទូរទស្សន៍ក្នុងស្រុក
អង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី នៅថ្ងៃទី២ ខែមករា ឆ្នាំ២០១៨នេះ បានជូនដំណឹងដល់សាធារណមតិជាតិ និងអន្តរជាតិឲ្យបានជ្រាបថា នៅថ្ងៃទី៣ ខែមករា ឆ្នាំ២០១៨ វេលាម៉ោង១៩គត់ ម៉ោងនៅក្នុងប្រទេសកម្ពុជាស្ថានីយ៍ទូរទស្សន៍ឯកជនមួយចំនួននឹងធ្វើការផ្សាយបន្តផ្ទាល់ពីស្ថានីយ៍ទូរទស្សន៍ជាតិកម្ពុជា នូវភាពយន្តឯកសារដ៏មានសារៈសំខាន់បំផុត និងមានអត្ថន័យជាប្រវត្តិសាស្ត្រ ក្រោមចំណងជើងថា « ដំណើរឆ្ពោះទៅរកការសង្គ្រោះជាតិ »។
ចេញពីទីតាំងកោះថ្ម ឃុំទន្លូង ស្រុកមេមត់ អតីតខេត្តកំពង់ចាម បច្ចុប្បន្ន ខេត្តត្បូងឃ្មុំ គឺជាបញ្ជាការដ្ឋានវរសេនាធំ តំបន់២១ វេលាម៉ោង ២១៖០០នាទី ថ្ងៃទី២០ ខែមិថុនា ឆ្នាំ១៩៧៧ ចំថ្ងៃច័ន្ទ ៥កើត ខែអាសាឍ ឆ្នាំម្សាញ់ នពស័ក ព.ស ២៥២១ សមមិត្ត ហ៊ុន សែន និងកម្មាភិបាលដ៏ទុកចិត្តចំនួន៤នាក់ គឺលោក នុច ថន, លោក ញឹក ហួន, លោក ស៊ូ គឹមស្រ៊ាង ហៅសាញ់ និងលោក វ៉ា ប៉ោអ៊ាន បានចាប់ផ្តើមដំណើរភៀសខ្លួនទៅវៀតណាម ដើម្បីស្វែងរកការជួយឧបត្ថម្ភ ក្នុងការរំដោះជាតិចេញពីរបបប្រល័យពូជសាសន៍ប៉ុលពត។
នៅក្នុងខ្សែភាពយន្តឯកសារឲរយៈពេលជាងមួយម៉ោងដែលនឹងចាក់ផ្សាយនៅថ្ងៃស្អែកនេះ នឹងរៀបរាប់យ៉ាងលំអិតអំពីការសម្រេចចិត្ត និងដំណើរឆ្ពោះទៅកាន់ទិសខាងកើតកាលពីឆ្នាំ១៩៧៧របស់សម្តេចតេជោ ហ៊ុន សែន និងយុទ្ធមិត្ត៤រូបផ្សេងទៀត។
សម្តេចតេជោ ហ៊ុន សែន សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន និងយុទ្ធមិត្តដែលនៅរស់រៀនមានជីវិត ព្រមទាំងថ្នាក់ដឹកនាំយោធា និងប្រជាពលរដ្ឋវៀតណាម ដែលសុទ្ធសឹងជាសាក្សីដ៏សំខាន់ក្នុងដំណាក់កាលនៃការតស៊ូកាលពីឆ្នាំ១៩៧៧ នឹងរៀបរាប់យ៉ាងលំអិតពីការសម្រេចចិត្តចេញទៅតស៊ូ និងដំណាក់កាលតស៊ូដ៏សែនលំបាកជាច្រើនទៀត រហូតឈានដល់ការផ្តួលរំលំរបបប្រល័យពូជសាសន៍ប៉ុលពតទាំងស្រុងនៅថ្ងៃទី០៧ ខែមករា ឆ្នាំ១៩៧៩។
ខាងក្រោមគឺជាខ្សែវីដេអូពិព័ណ៌នាដោយសង្ខេមនៃខ្លឹមសារវីដេអូនៃដំណើរឆ្ពោះទៅរកការសង្គ្រោះជាតិ ដែលនឹងត្រូវផ្សព្វផ្សាយនៅថ្ងៃស្អែកនេះ។ សូមរង់ចាំទស្សនាទាំងអស់គ្នា ដើម្បីបានជ្រាបច្បាស់នូវប្រវត្តិសាស្រ្ត និងដំណាក់កាលតស៊ូដ៏លំបាករបស់សម្តេចតេជោ ហ៊ុន សែន និងយុទ្ធមិត្តរហូតរំដោះប្រទេសជាតិចេញផុតពីរបបដ៏ឃោរឃៅ៕
