រឿងរាវខ្លះអំពីយន្តហោះឥណ្ឌូណេស៊ី ដែលដឹកមនុស្ស ១៩០នាក់ ធ្លាក់ចូលសមុទ្រថ្ងៃមុន
រឿងរាវខ្លះអំពីយន្តហោះឥណ្ឌូណេស៊ី ដែលដឹកមនុស្ស ១៩០នាក់ ធ្លាក់ចូលសមុទ្រថ្ងៃមុនយន្តហោះក្រុមហ៊ុនអាកាសចរណ៍ឥណ្ឌូណេស៊ី Lion Air ស្ថិតក្នុងជើងហោះហើរ JT 610 បានធ្លាក់ចូលទៅក្នុងសមុទ្រ ដោយផ្ទុកមនុស្សជិត ១៩០នាក់ បន្ទាប់ពីចាកចេញពីរដ្ឋធានីហ្សាកាតា។
ការចាប់អារម្មណ៍ជាច្រើនបានផ្ដោតលើការពិតមួយ ដែលយន្តហោះប្រភេទ Boeing 737 MAX 8 គឺជាយន្តហោះថ្មី។ វាជាឧបទ្ទវហេតុដ៏ធំលើកដំបូងបង្អស់ ដែលពាក់ព័ន្ធនឹងយន្តហោះថ្មីបែបនេះ។ ទោះជាយ៉ាងណា នាពេលបច្ចុប្បន្ន ព័ត៌មានលម្អិត និងមូលហេតុមិនទាន់ត្រូវបានបញ្ជាក់នៅឡើយទេ រហូតទាល់តែមានការស៊ើបអង្កេតពេញលេញ។
(យន្តហោះប្រភេទ Boeing 737 MAX 8)
ជារឿយៗ ការធ្លាក់យន្តហោះអាចបណ្ដាលមកពីកត្តារួមបញ្ចូលគ្នាជាច្រើន ទាំងបញ្ហាបច្ចេកទេស និងមនុស្ស ប៉ុន្តែយន្តហោះ Boeing 737 MAX 8 ខាងលើ ទើបតែត្រូវបានប្រើសម្រាប់ពាណិជ្ជកម្ម ពីខែសីហា ឆ្នាំ២០១៧ មកប៉ុណ្ណោះ។
ក្រុមហ៊ុនអាកាសចរណ៍ Lion Air បាននិយាយកាលពីខែកក្កដា ឆ្នាំមុនថា ខ្លួនពិតជាមានមោទនភាពខ្លាំងណាស់ ដែលបានក្លាយជាក្រុមហ៊ុនឥណ្ឌូណេស៊ីដំបូងបង្អស់ ដាក់ពង្រាយយន្តហោះប្រភេទនេះ ហើយបានបញ្ជាទិញរហូតដល់ ២១៨គ្រឿងឯណោះ។ យោងតាមប្រធានគណៈកម្មការសុវត្ថិភាពដឹកជញ្ជូនជាតិ លោក Soerjanto Tjahjano បាននិយាយថា យន្តហោះ Boeing 737 MAX 8 ខាងលើ ទើបតែបានចំណាយពេលហោះហើរសរុប ត្រឹមតែ ៨០០ម៉ោងប៉ុណ្ណោះ។
យ៉ាងណាមិញ បើយោងតាមសារព័ត៌មាន BBC មានរបាយការណ៍មួយបានឲ្យដឹងថា នៅថ្ងៃកើតហេតុ អ្នកបើកយន្តហោះបានទាក់ទងមកកាន់អ្នកគ្រប់គ្រងចរាចរផ្លូវអាកាស នៅក្នុងរដ្ឋធានីហ្សាកាតា ដោយសុំការអនុញ្ញាតវិញត្រលប់វិញ បន្ទាប់ពីចេញដំណើរបានបន្តិច។ យ៉ាងណាក៏ដោយ Lion Air មិនទាន់បានបញ្ជាក់ពីរបាយការណ៍ខាងលើនេះឡើយ៕
ប្រភព៖ Sabay
