បើចង់ឲ្យកម្ពុជាឈ្នះ កុំភ្លេចបោះឆ្នោតទាំងអស់គ្នា «ឈុតតំណាងជាតិល្អផ្តាច់គេ»
បើចង់ឲ្យកម្ពុជាឈ្នះ កុំភ្លេចបោះឆ្នោតទាំងអស់គ្នា «ឈុតតំណាងជាតិល្អផ្តាច់គេ»
កម្មវិធីប្រកួតប្រជែងសម្រស់ស្រីស្អាតសម្រាប់មកុដ Miss Grand International ដែលមានកញ្ញា ឌី លីកា ដែលជា Miss Grand Cambodia ចូលរួមដែរនោះ បានឈានចូលដល់វគ្គប្រកួតជ្រើសរើសឈុត តំណាងជាតិល្អផ្តាច់គេ ហើយកាលរាត្រីថ្ងៃទី ១២ ខែតុលា ឆ្នាំ ២០១៨ នេះ ដែលមានបេក្ខនារីជាស្រីស្អាតតំណាងប្រទេស ៧៦ មកពីជុំវិញពីភពលោកគ្រងឈុត
ប្រចាំជាតិរបស់ខ្លួន បង្ហាញដល់គណៈកម្មការនិងមហាជន ។
យោងតាមហ្វេសប៊ុកផ្លូវការរបស់ Miss Grand International បានប្រកាសលទ្ធផលសម្រាប់កំពូលឈុតតំណាងជាតិទាំង ៩ កាលពីរាត្រីថ្ងៃទី ១៤ ខែតុលា ដោយបែងចែកជាចំណាត់ថ្នាក់ ៣ ទ្វីប គឺ ១- អាស៊ី អូស្ត្រាលីនិងអូសេអានី, ២- អឺរ៉ុបនិងអាហ្វ្រិក និង ៣- ទ្វីបអាមេរិក តាមរយៈការបោះឆ្នោតពីមហាជនដោយការចុច “Like” និង “Shares” លើបណ្តាញសង្គម សម្រាប់បេក្ខនារីស្រស់ស្អាតទាំងអស់ ។
យ៉ាងណាមិញ យោងតាមហ្វេសប៊ុកផ្លូវការរបស់ Miss Grand International ដដែលបានឲ្យដឹងថាឈុតតំណាងជាតិកម្ពុជាគឺបានជាប់ចំណាត់ក្នុងចំណោម «ឈុតតំណាងជាតិល្អផ្តាច់គេ» ទាំង ៩ ដែលក្នុងនោះគឺមានកញ្ញា Miss Grand មកពី ប្រទេសវៀតណាម, កម្ពុជា, ឥណ្ឌូនេស៊ី, អេស្តូនី, អេស្ប៉ាញ, ហ្គាណា, មុិកស៊ិក, ប៉េរូ, និង ប្រទេសកូឡុំប៊ី ។
ការបោះឆ្នោតនឹងបន្តរហូតដល់ថ្ងៃទី ២៥ ខែតុលា ឆ្នាំ ២០១៨ ដើម្បីសម្រេចថាតើឈុតតំណាងជាតិរបស់ប្រទេសណាដែលត្រូវបានឈ្នះជា «ឈុតតំណាងជាតិល្អផ្តាច់គេ» ។ ដើម្បីបោះឆ្នោត លោកអ្នកត្រូវចូលទៅគណនីហ្វេសប៊ុកផ្លូវការរបស់ Miss Grand International រួចហើយស្វែងរករូបភាពកញ្ញា ឌី លីកា ក្នុងឈុតប្រចាំជាតិ និង ចុច Like រូបមេដៃតែមួយគត់ រួមនឹងការចុច Share។
សូមបញ្ជាក់ថាប្រិយមិត្ត សូមចុច តែ សញ្ញា like «មេដៃ» និង share ទើបគេរាប់ពិន្ទុ សញ្ញាផ្សេងកុំចុច។ ព្រោះ 1 like = 1 point (1ពិន្ទុ) ចំណែក 1 share = 5 points(5ពិន្ទុ)
សូមរម្លឹកថាបេក្ខនារីតំណាងឱ្យប្រទេសកម្ពុជា គឺស្រីស្អាត ឌី លីកា បានគ្រងឈុតប្រចាំជាតិកម្ពុជា ឈ្មោះថា «ទេពីស្រីសួគ៌បវរឦសានបុរៈ» បង្ហាញដល់គណៈកម្មការនិងសាធារណជនដែលរំលេចចេញនូវរូបសម្រស់ស្រស់ស្អាតនៃនារីខ្មែរ ដែលពោរពេញដោយភាពទន់ភ្លន់ និង សុភាពរាបសា និងស្នាមញញឹមស្រស់។ កញ្ញា ឌី លីកា គឺជា Miss Grand Cambodia ដែលមានវ័យត្រឹម ២០ឆ្នាំ និងជាសិស្សទើបរៀបចប់វិទ្យាល័យ ក្នុងរាជធានីភ្នំពេញ ផងដែរ ៕
