ខ្មែរប៉ុស្ដិ៍ Close

លោកនាយករដ្ឋមន្រ្តី ហ៊ុន សែន៖ សូមឱ្យទឹកចិត្តដ៏ប្រពៃរបស់ពលរដ្ឋខ្មែរដែលរស់នៅក្រៅប្រទេសបន្តនៅជាមួយជាតិយើង

ដោយ៖ សន ប្រាថ្នា ​​ | ថ្ងៃពុធ ទី២៦ ខែកញ្ញា ឆ្នាំ២០១៨ ព័ត៌មានទូទៅ 1482
លោកនាយករដ្ឋមន្រ្តី ហ៊ុន សែន៖ សូមឱ្យទឹកចិត្តដ៏ប្រពៃរបស់ពលរដ្ឋខ្មែរដែលរស់នៅក្រៅប្រទេសបន្តនៅជាមួយជាតិយើងលោកនាយករដ្ឋមន្រ្តី ហ៊ុន សែន៖ សូមឱ្យទឹកចិត្តដ៏ប្រពៃរបស់ពលរដ្ឋខ្មែរដែលរស់នៅក្រៅប្រទេសបន្តនៅជាមួយជាតិយើង

អ្នកតាមដាននយោបាយនៅកម្ពុជាកំពុងរង់ចាំមើលថា តើមានអ្វីកើតឡើងនៅពេលដែលនាយករដ្ឋមន្រ្តីកម្ពុជា បង្ហាញវត្តមានលើទឹកដីអាមេរិកដែលជាទីតាំងសមរភូមិដ៏ក្តៅមួយក្នុងឆាកនយោបាយការទូតរវាងរដ្ឋាភិបាលដែលគ្រប់គ្រងប្រទេសកម្ពុជាទាំងមូល និងអតីតក្បាលម៉ាស៊ីនដឹកនាំរបស់គណបក្សសង្រ្គោះជាតិ ដែលកំពុងស្ថិតនៅទីនោះដែរ។ យ៉ាងណាក៏ដោយ គេអាចប្រមើលឃើញថា នោះគ្រាន់តែជាការជួបជុំមួយ របស់មនុស្សមួយក្រុម ឬពីរក្រុមដើម្បីសម្តែងមតិពេញចិត្ត ឬមិនពេញចិត្ត ទៅតាមនយោបាយដែលខ្លួនស្រឡាញ់តាមបែបលទ្ធិប្រជាធិបតេយ្យប៉ុណ្ណោះ។

ពិតណាស់ពលរដ្ឋខ្មែរខ្លះ ដែលរស់នៅក្រៅប្រទេសមាននិន្នាការទៅរកគណបក្សប្រឆាំង ប៉ុន្តែការញែកទស្សនៈនយោបាយជាមួយប្រយោជន៍ជាតិទាំងមូល ប្រហែលមិនមែនជាការចង់បានរបស់ថ្នាក់ដឹកនាំរបស់ប្រទេសមួយឡើយ។ យ៉ាងដូច្នេះហើយបានជានាយករដ្ឋមន្រ្តី ហ៊ុន សែន បែរជាសរសើរពីចំងាយ និងអរគុណដល់ពួកគាត់ ដែលតែងតែគិតគូរដល់ប្រទេសជាតិ និងប្រជាពលរដ្ឋខ្លួនដែលរស់នៅក្នុងប្រទេស។

ក្នុងដំណើរបេសកកម្មទៅកាន់បុរីញូវយ៉ក នៃសហរដ្ឋអាមេរិក នាថ្ងៃទី២៧ ខែកញ្ញា ឆ្នាំ២០១៨ មានសំណួរពីរបានចោទសួរថា តើនឹងមានការទិញទឹកចិត្ត ឬជាសំណូកដើម្បីកៀរគរប្រជាពលរដ្ឋខ្មែរឱ្យមកគាំទ្រស្វាគមន៍ដែរឬទេ? ហើយតើនាយករដ្ឋមន្រ្តីនឹងលើកយកបញ្ហាអ្វីខ្លះមកនិយាយ ឬជាសារនយោបាយបែបណានៅពេលដែលលោកជួបជាមួយប្រជាពលរដ្ឋខ្មែរ ដែលរស់នៅសហរដ្ឋអាមេរិក និងប្រទេសកាណាដានាពេលនោះ?

តាមប្រភពព័ត៌មានពីមន្រ្តីជាន់ខ្ពស់រាជរដ្ឋាភិបាលបានបង្ហើបថា លោកនាយករដ្ឋមន្រ្តី ហ៊ុន សែន បានត្រៀមកាដូជូនប្រជាពលរដ្ឋខ្មែរ ដែលត្រូវជួបលោករួចហើយ តែកាដូនោះមិនមែនជាថវិកា ហើយក៏មិនមែនជាថ្នូរនៃការសូកប៉ាន់អ្វីដែរ តែជាកម្រងសៀវភៅដែលលោកបានសរសេរថា «បើទោះបីជារូបកាយបងប្អូនរស់នៅឃ្លាតឆ្ងាយពីស្រុកកំណើតក្តីតែបេះដូង និងទឹកចិត្តរបស់បងប្អូននៅតែស្ថិតនៅក្បែរជាមួយញាតិសណ្តាន មិត្តភក្តិ និងប្រទេសជាតិជានិច្ច។ នេះហើយជាកាយវិការដ៏ប្រសើរបំផុត ដែលខ្ញុំ និងភរិយាសូមថ្លែងអំណរគុណ និងកោតសរសើរដោយស្មោះចំពោះគុណបំណាច់ទាំងអស់ ដែលបងប្អូនបានចូលរួមជាមួយប្រជាពលរដ្ឋ និងជាតិខ្មែរយើងកន្លងមកនេះ»។ ក្នុងឃ្លាចុងក្រោយនៅលើប្រអប់សៀវភៅបានបន្ថែមថា «ខ្ញុំ និងភរិយាមានជំនឿយ៉ាងមុតមាំថា ទឹកចិត្តដ៏ប្រពៃរបស់បងប្អូនដែលមានចំពោះស្រុកកំណើត និងរាជរដ្ឋាភិបាលនឹងបន្តដំណើរជាមួយគ្នាតទៅទៀត ដើម្បីរក្សាបាននូវសុខសន្តិភាព និងភាពរុងរឿងនៃជាតិយើង»។

តាមការគ្រោងទុកលោកនាយករដ្ឋមន្រ្តី ហ៊ុន សែន នឹងចេញដំណើរទៅកាន់បុរីញូវយ៉ក នាថ្ងៃទី២៧ ខែកញ្ញា ឆ្នាំ២០១៨នេះ ដើម្បីចូលរួមប្រជុំមហាសន្និបាតលើកទី៧៣ នៃអង្គការសហប្រជាជាតិ ដែលកម្ពុជាត្រូវបានគេបោះឆ្នោតឱ្យក្លាយជាអនុប្រធាននៃអង្គមហាសន្និបាតនេះ សម្រាប់រយៈពេលមួយឆ្នាំ។ ក្នុងឋានៈជាអនុប្រធាន កម្ពុជាអាចដឹកនាំកិច្ចប្រជុំមហាសន្និបាតជំនួសមុខប្រធាន និងតាមសំណើររបស់ប្រធាន៕

អត្ថបទទាក់ទង