ក្រសួងសាធារណការ និងដឹកជញ្ជូន បើកការដ្ឋានសាងសង់ ផ្លូវបេតុង មួយខ្សែប្រវែង ២.០០០ម៉ែត្រ
ក្រសួងសាធារណការ និងដឹកជញ្ជូន បើកការដ្ឋានសាងសង់ ផ្លូវបេតុង មួយខ្សែប្រវែង ២.០០០ម៉ែត្រ
ថ្ងៃអង្គារ ២រោច ខែស្រាពណ៍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី២៨ ខែសីហា ឆ្នាំ២០១៨ លោក ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធាន ក្រុមការងារថ្នាក់ជាតិចុះស្រុកកោះធំ បានអញ្ជើញជាអធិបតីក្នុងពិធីបើកការដ្ឋានសាងសង់ផ្លូវបេតុង មួយខ្សែប្រវែង២.០០០ម៉ែត្រ ឋិតក្នុងភូមិចាស់ និងភូមិចុងព្រែក ឃុំព្រែកស្តី ស្រុកកោះធំ ខេត្តកណ្តាល ដោយមានការចូលរួមពីប្រជាពលរដ្ឋប្រមាណ ៥៣៩ នាក់។
លោកទេសរដ្ឋមន្ត្រី បានគូសបញ្ជាក់ពីសារសំខាន់ និងផលប្រយោជន៍នៃផ្លូវបេតុងមួយខ្សែនេះ ដែលអាចជួយសម្រួលដល់ការលំបាករបស់បងប្អូនប្រជាពលរដ្ឋ ជាពិសេស សិស្សានុសិស្សអាច ធ្វើដំណើរទៅសាលារៀនបានងាយស្រួល និងអាចដឹកកសិផលទៅកាន់ទីផ្សារបានឆាប់រហ័សផងដែរ។
លោកទេសរដ្ឋមន្ត្រី បានប្តេជ្ញាបន្តបម្រើប្រជាពលរដ្ឋឲ្យកាន់តែខ្លាំងទ្វេដង ក្នុងនាមជា មន្ត្រីបម្រើរាស្ត្រ ស្របតាមអនុសាសន៍ដ៏ខ្អង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងបានផ្តាំផ្ញើឱ្យប្រជាពលរដ្ឋយើង ផ្តល់ព័ត៌មានមកក្រុមការងារ ក្នុងករណីពួកគាត់ជួបប្រទះបញ្ហាលំបាក ក្នុងការរស់នៅប្រចាំថ្ងៃរបស់ខ្លួន។
ជាមួយគ្នានេះផងដែរ លោកទេសរដ្ឋមន្ត្រី ស៊ុន ចាន់ថុល បានលើកឡើងពី គម្រោងដាក់អំពូលសូឡា ដើម្បីបំភ្លឺផ្លូវបេតុង និងគម្រោងនាំអ្នកកោះធំជិះរថភ្លើងទៅលេងខេត្តកំពង់ឆ្នាំង ដើម្បីស្វែងយល់ពីការរីកចម្រើន របស់ប្រទេសជាតិ ដែលគ្រោងចាប់ផ្តើមដំណើរការនៅខែកញ្ញា ឆ្នាំ២០១៨ ខាងមុខនេះ។
ជាទីបញ្ចប់ លោកទេសរដ្ឋមន្ត្រី ស៊ុន ចាន់ថុល បានអញ្ជើញចែកអំណោយជូនប្រជាពលរដ្ឋដែលបានចូលរួមកម្មវិធី និងចាក់បេតុងជានិមិត្តរូប នៃបើកការដ្ឋានសាងសង់ផ្លូវបេតុងប្រវែង២.០០០មែ៉ត្រ ឋិតក្នុងភូមិចាស់ និងភូមិចុងព្រែក ឃុំព្រែកស្តី ស្រុកកោះធំ ខេត្តកណ្តាល៕
