ទស្សនាការធ្វើដំណើរទៅកាន់ទឹកធ្លាក់អូរជាំ
ទស្សនាការធ្វើដំណើរទៅកាន់ទឹកធ្លាក់អូរជាំ
ទោះបីជាផ្លូវឆ្ពោះទៅកាន់តំបន់រមណីយដ្ឋានទឹកធ្លាក់ធម្មជាតិ មានសភាពលាយឡំទៅដោយការធ្វើដំណើរស្រួលខ្លះ និងពិបាកខ្លះបន្តិចមែន តែការដើរកម្សាន្តមានសម្រស់ទេសភាពព្រៃឈើដុះចោលម្លប់ដ៏ត្រឈឹងត្រឈៃសងខាង និងមានចរន្តទឹកធ្លាក់រឹមៗ តាមផ្លូវដើរដ៏ត្រជាក់ស្រេងមកប៉ះកាយ ដែលមានប្រភពហូរធ្លាក់ពីកំពូលភ្នំសំកុះមួយនេះ តែងតែទាក់ទាញនូវចំណាប់អារម្មណ៍ក្រុមភ្ញៀវទេសចរចាស់ក្មេងទាំងនៅទីជិត និងឆ្ងាយទៅងូតលេងកម្សាន្តមិនលស់ថ្ងៃនោះឡើយ។
ទឹកធ្លាក់អូរជាំ ឬទឹកជ្រោះអូរជាំ មានទីតាំងស្ថិតនៅក្នុងភូមិអូរជាំ ឃុំកំពង់ល្ពៅ ស្រុកសំឡូត ខេត្តបាត់ដំបង ឬជាការងាយស្រួលចំណាំគឺនៅពេលទៅដល់ភូមិអូរជាំ ឃើញច្រកចូលមានដាក់ស្លាកថា «ប៉ុស្តិ៍ប្រជាការពារ»។
នៅទីនេះមានទឹកធ្លាក់ច្រើនអន្លើ ដែលអមដោយព្រៃឈើដុះស្រោងចោលម្លប់ត្រជាក់ស្រួល និងមានផ្ទាំងថ្មតូចធំជាច្រើន ដុះនៅរដិបរដុប ដោយមានចម្ងាយប្រមាណប្រវែងជាង ៥០០ ម៉ែត្រគិតពីដំណាក់ទឹកធ្លាក់នៅជាន់លើបង្អស់រហូតមកដល់ដំណាក់ជាន់ក្រោមបំផុតជាមួយនឹងសម្រស់ព្រឹក្សាខៀវស្រងាត់។ទីនេះមិនប្រកាន់ថា នៅរដូវប្រាំង ឬរដូវវស្សានោះទេ មានភ្ញៀវច្រើនចូលចិត្តមកងូតទឹកលេងបែបលក្ខណៈក្រុមគ្រួសារ មិត្ដភក្តិ ឬក្រុមការងារ មិនសូវដាច់ឡើយ។ គ្រាន់តែរដូវបុណ្យទានគឺមានភ្ញៀវមកលេងច្រើន ដូចជានៅកាលពីចូលឆ្នាំខ្មែរ និងរដូវបុណ្យភ្ជុំបិណ្ឌកន្លងមកនេះ មានភ្ញៀវទេសចរចំនួនក្បែរ ១ ម៉ឺន នាក់ ឯណោះ។
ទឹកធ្លាក់អូរជាំ មានទឹកហូរខួបប្រាំង ខួបវស្សាតែម្តង ខណៈនៅរដូវប្រាំងមានទឹកហូរតិចជាងនៅរដូវវស្សា តែអាចមើលឃើញដុំថ្មតូចធំជាច្រើនត្រូវជ្រែកដោយចរន្តទឹកហូរតិចៗ។ ចំណែកនៅរដូវវស្សាវិញ មានទឹកច្រើន អាចកន្លែងខ្លះមិនឃើញដុំថ្មឡើយ។ សម្រាប់ថ្ងៃធម្មតាមានភ្ញៀវតិចតួច តែនៅចុងសប្តាហ៍វិញរាងគ្រាន់បើ។
