គ្រប់គណបក្សនយោបាយដែលបានចូលរួមកិច្ចពិគ្រោះយោបល់ ប្រកាសគាំទ្រទាំងស្រុងចំពោះគំនិតផ្តួចផ្តើមរបស់លោកនាយករដ្ឋមន្ត្រី ហ៊ុន សែន ក្នុងការបង្កើត «ឧត្តមក្រុមប្រឹក្សាពិគ្រោះ និងផ្ដល់យោបល់»
គ្រប់គណបក្សនយោបាយដែលបានចូលរួមកិច្ចពិគ្រោះយោបល់ ប្រកាសគាំទ្រទាំងស្រុងចំពោះគំនិតផ្តួចផ្តើមរបស់លោកនាយករដ្ឋមន្ត្រី ហ៊ុន សែន ក្នុងការបង្កើត «ឧត្តមក្រុមប្រឹក្សាពិគ្រោះ និងផ្ដល់យោបល់»គ្រប់គណបក្សនយោបាយទាំងអស់ ដែលបានចូលរួមកិច្ចពិគ្រោះយោបល់ នៅវិមានសន្តិភាព ដឹកនាំដោយលោកនាយករដ្ឋមន្ត្រី ហ៊ុន សែន នៅថ្ងៃទី២១ ខែសីហា ឆ្នាំ២០១៨នេះ បានប្រកាសគាំទ្រទាំងស្រុងចំពោះគំនិតផ្ដួចផ្ដើមរបស់លោកនាយករដ្ឋមន្ត្រីផ្ទាល់ ក្នុងការបង្កើត «ឧត្តមប្រឹក្សាពិគ្រោះ និងផ្ដល់យោបល់»។ នេះបើតាមការបញ្ជាក់ឱ្យដឹងរបស់លោក ឈឹម ផលវរុណ ទីប្រឹក្សាផ្ទាល់លោកនាយករដ្ឋមន្ត្រី ហ៊ុន សែន ថ្លែងបន្ទាប់ពីកិច្ចប្រជុំពិគ្រោះយោបល់។
លោក ឈឹម ផលវរុណ បានទទួលភារកិច្ចផ្ទាល់ពីលោកនាយករដ្ឋមន្ត្រី ហ៊ុន សែន ដឹកនាំក្រុមការងារតាក់តែងព្រះរាជក្រឹត្យ បញ្ជូនទៅលោកឧបនាយករដ្ឋមន្ត្រី ប៊ិន ឈិន ដើម្បីកោះប្រជុំតំណាងគណបក្សនយោបាយទាំងអស់ដើម្បីពិគ្រោះទៅលើខ្លឹមសារព្រះរាជក្រឹត្យ ទើបប្រគល់ជូនលោកនាយករដ្ឋមន្ត្រី ហ៊ុន សែន រៀបចំថ្វាយព្រះមហាក្សត្រ ឡាយព្រះហស្ថលេខា។
ទីប្រឹក្សាផ្ទាល់លោកនាយករដ្ឋមន្ត្រី ហ៊ុន សែន រូបនេះបានបន្តថា «ឧត្តមប្រឹក្សាពិគ្រោះ និងផ្ដល់យោបល់» មានភារកិច្ចធំសំខាន់ ៣ ប៉ុន្តែអាចនឹងមានភារកិច្ចបន្ថែមទៀតគឺ៖
*ភារកិច្ចធំទី១គឺ ផ្តួចផ្តើមគំនិត រួមទាំងការផ្តល់មតិយោបល់ ទៅលើដំណើរការ និងការអនុវត្ត ឬរៀបចំគោលនយោបាយរបស់រាជរដ្ឋាភិបាល មុននឹងដាក់ជូនគណៈរដ្ឋមន្ត្រីដើម្បីសម្រេចអ្វីមួយ គឺកិច្ចការនោះនឹងឆ្លងការពិគ្រោះ និងផ្តល់យោបល់នៅក្នុង «ឧត្តមប្រឹក្សាពិគ្រោះ និងផ្ដល់យោបល់» ទើបចូលទៅក្នុងកិច្ចប្រជុំគណៈរដ្ឋមន្ត្រី។
*ភារកិច្ចធំទី២ គឺមានភារកិច្ចផ្តួលផ្តើមគំនិតធ្វើសេចក្តីព្រាងច្បាប់រួចស្នើមករាជរដ្ឋាភិបាល (មិនមែនស្នើទៅសភាទេ) ជាងនេះទៅទៀត «ឧត្តមប្រឹក្សាពិគ្រោះ និងផ្ដល់យោបល់» អាចផ្តល់យោបល់លើសេចក្តីព្រាងច្បាប់ផ្សេងៗដែលបានតាក់តែង។ ចំពោះការផ្តល់យោបល់ គឺគណៈរដ្ឋមន្ត្រី និងយកមកពិនិត្យ និងពិចារណា។
*ភារកិច្ចធំទី៣ គឺការផ្តល់អនុសាសន៍ កែលម្អលើដំណើរការអនុវត្ត នៃគោលនយោបាយការអនុវត្តច្បាប់ អនុវត្តអ្វីៗទាំងអស់របស់រាជរដ្ឋាភិបាល ទាំងនៅថ្នាក់ជាតិ និងថ្នាក់ក្រោមជាតិ៕
