ពាក្យសម្តីរំជួលចិត្តរបស់ Ronaldo មុនពេលចាកចេញពី Real Madrid
ពាក្យសម្តីរំជួលចិត្តរបស់ Ronaldo មុនពេលចាកចេញពី Real MadridCristiano Ronaldo បានចាកចេញពីក្លឹប Real Madrid ទៅលេងឱ្យក្រុម Juventus ហើយ ក្នុងកុងត្រារយៈពេល៤ឆ្នាំ មានប្រាក់ឈ្នួល៥០០ ០០០ផោនក្នុងមួយសប្ដាហ៍នៅទឹកដីអ៊ីតាលី។
កីឡាករដែលអ្នកគាំទ្រចាត់ទុកជាវីរបុរសរបស់ Real Madrid ខាងលើនេះបាននិយាយក្រោយប្រកាសចែកផ្លូវពីទឹកដីអេស្ប៉ាញថា៖ “ខ្ញុំជឿជាក់ថា នេះជាពេលវេលាមួយដែលត្រូវឱ្យខ្ញុំបន្ដដំណើរទៅមុខទៀត ដូច្នេះហើយបានជាខ្ញុំសម្រេចចិត្តសុំក្លឹបឱ្យផ្ទេរខ្ញុំ។ ខ្ញុំក៏សូមឱ្យអ្នកគាំទ្រទាំងអស់ យល់ពីខ្ញុំផង។ ការលេងឱ្យ Real Madrid គឺជាការសប្បាយចិត្តបំផុតក្នុងជីវិតរបស់ខ្ញុំ។ អរគុណដល់អ្នកគាំទ្រនៅ Real Madrid ក្រុមការងារ និងប្រធានក្លឹបផ្ទាល់តែផ្ដល់តម្លៃឱ្យខ្ញុំ។ ៩ឆ្នាំនៅអេស្ប៉ាញ ពិតជារឿងដ៏អស្ចារ្យណាស់ ខ្ញុំសប្បាយចិត្ត ជោគជ័យ និងមិនអាចភ្លេចការលេងជាមួយ Real Madrid បានឡើយក្នុង១ជីវិតនេះ។ អរគុណដល់អ្នកគ្រប់គ្នា អរគុណសម្រាប់ពេល៩ឆ្នាំនេះ! Hala Madrid ”។
ការនិយាយរបស់កីឡាករឆ្នើមបំផុតលើលោកនេះ គឺមានសេចក្ដីថា រូបគេជាអ្នកសម្រេចចិត្តចង់ចាកចេញទៅលេងនៅ Juventus ផ្ទាល់តែម្ដង ក្នុងតម្លៃខ្លួន១០០លានអឺរ៉ូនេះ។ ខណៈដែលការផ្ទេរនេះកើតឡើង កាលពីម្សិលមិញ បន្ទាប់ពីប្រធានក្លឹប Juventus ផ្ទាល់បានទៅជួបជាមួយ Ronaldo ពេលរូបគេកំពុងលំហែកាយនៅប្រទេសក្រិក។
ក្នុងនាមជាកីឡាករថ្មីរបស់ Juventus ប្រកួតដំបូងរបស់ Ronaldo នឹងត្រូវលេងទល់ក្រុម Real Madrid ផ្ទាល់តែម្ដង ក្នុងការប្រកួតមិត្តភាព នៅថ្ងៃទី៤ខែសីហាឆ្នាំ២០១៨នេះ នៅទឹកដីអាមេរិក៕
