ខ្មែរប៉ុស្ដិ៍ Close

ការរើសអើង ៤ ចំណុចចំពោះអ្នកស្រលាញ់ភេទដូចគ្នានៅកម្ពុជា

ដោយ៖ សន ប្រាថ្នា ​​ | ថ្ងៃអង្គារ ទី២៦ ខែមិថុនា ឆ្នាំ២០១៨ កំសាន្ដ & ប្លែកៗ 2516
ការរើសអើង ៤ ចំណុចចំពោះអ្នកស្រលាញ់ភេទដូចគ្នានៅកម្ពុជា ការរើសអើង ៤ ចំណុចចំពោះអ្នកស្រលាញ់ភេទដូចគ្នានៅកម្ពុជា

បច្ចុប្បន្ន​មាន​បញ្ហា​ប្រឈម​៤ប្រភេទ ​កំពុង​កើត​មាន​ចំពោះ​ក្រុម​អ្នក​ស្រលាញ់​ភេទ​ដូចគ្នា​នៅ​កម្ពុជា ដែល​នេះ​ផ្ទុយ​ពី​សេចក្ដី​ប្រកាស​ ជា​សកល​ស្ដី​ពី​សិទ្ធិ​មនុស្ស។

តួ​លេខ​ក្នុង​ឆ្នាំ​២០១៨ ​អ្នក​ស្រលាញ់​ភេទ​ដូចគ្នា មាន​ចំនួន​ប្រមាណ​១០​ម៉ឺន​នាក់ ចំនួន​នេះ​គឺ​រាប់បញ្ចូល​ទាំង​ក្រុម​ដែល​បាន​រស់​នៅ​បញ្ចេញ និង​ក្រុម​ដែល​លាក់​អត្តសញ្ញាណ។ ​នេះ​បើ​តាម​ប្រភព​ពី​អង្គការ​ធ្វើការ​ជាមួយ​អ្នក​ស្រលាញ់​ភេទ​ដូចគ្នា​ នៅ​កម្ពុជា។

លោក ស្រ៊ុន ស្រ៊ន ស្ថាបនិក នៃ​អង្គការ​អនាគត​យុវជន​កម្ពុជា បាន​ប្រាប់​ថា​ សព្វថ្ងៃ​អ្នក​ស្រលាញ់​ភេទ​ដូចគ្នា​ហ៊ាន​ចេញ​មុខ​ជាង​មុន ជា​ហេតុ​ធ្វើ​ឲ្យ​ឃើញ​ចំនួន​ដល់​ទៅ​១០ម៉ឺន​នាក់។ ភាគច្រើន​ពួក​គេ​ហ៊ាន​បង្ហាញ​អត្ត​សញ្ញាណ​ជាង​មុន ដោយ​គិត​ថា​អាច​មាន​ការ​ទទួល​ស្គាល់។

ផ្ទុយ​ស្រលះ គឺ​ក្រុម​នេះ​នៅ​តែ​ប្រឈម​៤ចំណុច ដូចខាងក្រោម។

១. គំនាប​គ្រួសារ​

វា​ជា​រឿង​លំបាក ព្រោះ​គ្រួសារ​ខ្មែរ​១ភាគធំ គឺ​មិន​អាច​ទទួល​យក​បាន​ ឬ​មិន​គាំទ្រ​ដាច់​ខាត កាល​បើ​កូន​ខ្លួន ឬ​សាច់​ញាតិ​ខ្លួន​មាន​និស្ស័យ ឬ​អារម្មណ៍​លើ​ភេទ​ដូចគ្នា បើ​ទោះ​ដឹង​ថា នេះ​គឺ​ជា​កត្តា​ធម្មជាតិ។ ចំណុច​នេះ អាណាព្យាបាល​ក្រោយ​ដឹង​ហើយ គឺ​រក​គ្រប់​វិធីសាស្ត្រ ដោយ​ចាប់​បង្ខំ ក្រោម​រូបភាព​ឲ្យ​រៀបការ​ជាមួយ​មនុស្ស​ភេទ​ផ្ទុយគ្នា។

ឧទាហរណ៍ ករណី​ស្រី​ស្រលាញ់​ស្រី គឺ​គ្រួសារ​តែង​ព្យាយាម​បំបែក និង​បង្ខំ​ឲ្យ​រៀបការ​ជាមួយ​បុរស​ណា​ម្នាក់។ ករណី​តិចតួច​បាន​ជោគជ័យ រីឯ​​បរាជ័យ​បាន​កើត​មាន និង​បង្ក​ជា​បញ្ហា​ជា​ច្រើន ដូច​ជា​ក្រុម​ស្រលាញ់​ភេទ​ដូចគ្នា ត្រូវ​រស់​នៅ​ក្រៅ​សង្គម មិន​មាន​ឱកាស​ត្រឹមត្រូវ និង​គ្មាន​ជីវិត​ឯករាជ្យ​ ប្រឈម​នឹង​ការ​ប្រព្រឹត្តិ​អំពើ​ខុសឆ្គង។


(រូបតំណាង)

២. ទទួលរង​សំពាធ​ផ្លូវចិត្ត និង​សុខភាព

អ្នក​ស្រលាញ់​ភេទ​ដូច​គ្នា មានចែកជា២ប្រភេទ គឺ​ក្រុម​ស្រី​ស្រលាញ់​ស្រី និង​ក្រុម​ប្រុស ស្រលាញ់​ប្រុស។ ការរើសអើង បាន​នាំ​ឲ្យ​មាន​បញ្ហា​ពិបាក​ជា​ច្រើន ក្នុង​សំខាន់​១​គឺ​សុខភាព និង​គំនាប​ផ្លូវ​ចិត្ត។ លោក ស្រ៊ុន ស្រ៊ន បាន​លើក​ឡើង​ថា បច្ចុប្បន្ន​មាន​ក្រុម​អ្នក​ស្រលាញ់​ភេទ​ដូចគ្នា និង​បាន​សម្រេច​រស់​នៅ​ជា​ប្ដី​ប្រពន្ធជាង ៦ ០០០គូ។ ទំនាក់ទំនង​ស្នេហា​ខ្លះ បាន​រស់នៅ​ជាមួយ​គ្នា​យូរ​រហូត​ដល់ ៣០ ទៅ៤០ឆ្នាំ។

ដោយ​ការ​រើសអើង និង​ចំណេះ​ដឹង មាន​អ្នក​ខ្លះ​បាន​បង្ខំ​ចិត្ត ចាក់​បញ្ចូល​សារធាតុ​នានា ដើម្បី​បំបាត់​ដើម​ទ្រូង ឬ​ការ​ចាក់​អ័រម៉ូន កែ​ប្រែ​សរីរាង្គ​ផ្សេង​ទៀត ​ដើម្បី​ឲ្យ​មើល​ទៅ​មាន​រូបរាង​ជា​មនុស្ស​ប្រុស ឬ​ស្រី​ពិត។ ករណី​នេះ​​ធ្ងន់​ធ្ងរ​ខ្លាំង មាន​អ្នក​ខ្លះ​បាន​ស្លាប់​បាត់បង់ជីវិត ដោយសារ​ទៅ​រក​កន្លែង​គ្មាន​ជំនាញ។

៣. ឱកាស​ការងារ តូច​ចង្អៀត ឬ​គ្មាន​តែ​ម្ដង

ជា​ការ​ពិត បើ​មើល​តាម​ការ​ប្រកាស​រើស​បុគ្គលិក​ គឺ​តែង​តែ​បញ្ជាក់​ថា ត្រូវ​ការ​បុគ្គលិក​ទាំង​២​ភេទ ប្រុស​ និង​ស្រី មិន​ដែល​មាន​ទេ​ ត្រូវការ​បុគ្គលិក ជា​ភេទ​ទី​៣។ ចំណុច​នេះ ស្ថាបនិក នៃ​អង្គការ​អនាគត​យុវជន​កម្ពុជា បន្ត​ថា ជាការរើសអើង១ បើទោះក្រុមភេទទី៣ មាន​សមត្ថភាព​យ៉ាងណា ក៏​គ្មាន​ឱកាស​ដែរ។ នេះ​ជា​ហេតុ​ឲ្យ​ពួក​គេ រស់​នៅ​លាក់​មុខ ប្រសិន​បើ​គេ​បាន​ដឹង​រឿង​ពិត គឺ​ប្រឈម​នឹង​ការ​បាត់បង់​ការងារ​ទៅ​វិញ​ក៏​មាន។ ករណី១ ដែល​តាម​លោក​ធ្លាប់​ដឹង គឺមានកន្លែងឯកជន១ នៅ​ជាយ​ក្រុង​ភ្នំពេញ បាន​សរសេរ​លើ​ក្ដារ​ព័ត៌មាន ថា​រើស​បុគ្គលិក​ស្រី ឬ​ប្រុស មិន​រើស​ខ្ទើយ!

៤. សេវា​ជំនួយ​ផ្លូវ​ច្បាប់

ក្រុម​អ្នក​ស្រលាញ់​ភេទ​ដូចគ្នា​ប្រឈម​នឹង​ការ​ប្រើ​ហិង្សា ​ការ​រំលោភ​សិទ្ធិ ឬ​រូបរាង​កាយ។ លោក ស្រ៊ុន ស្រ៊ន តាមរយៈ​ទំព័រ​ Facebookដ៏​សកម្ម១ ដែល​ផ្ដល់​សេវា​ប្រឹក្សា​ភេទ​ដូច​គ្នា បាន​រក​ឃើញ​ថា ពេល​មាន​បញ្ហា​ទាក់ទង​ច្បាប់ គឺ​មិន​សូវ​មាន​ការ​ខ្វាយ​ខ្វល់​ និង​រក​ដំណោះ​ស្រាយ​ ទោះ​បី​ក្រុម​ភេទ​ដូចគ្នា បាន​ប្ដឹង​ផ្ដល់​ហើយ​ក៏​ដោយ។ លោក​ថា បើ​មាន​ប្រព័ន្ធ​ច្បាប់​ច្បាស់​លាស់​សម្រាប់​ក្រុម​ស្រលាញ់​ភេទ​ដូច​គ្នា ឬ​ហៅថា LGBT អាច​នឹង​ងាយ​ស្រួល​គ្រប់គ្រង។


(រូបតំណាង)

ទាក់ទងនឹងបញ្ហាប្រឈមទាំង៤ខាងលើ លោក ស្រ៊ុន ស្រ៊ន ស្ថាបនិក នៃ​អង្គការ​អនាគត​យុវជន​កម្ពុជា បាន​បញ្ជាក់​បន្ថែម​ថា បច្ចុប្បន្ន​ក្រុម​ការងារ​លោក កំពុង​ស្នើ​សុំ​គោលការណ៍​មិន​ឲ្យ​រើសអើង​អ្នក​ស្រលាញ់​ភេទ​ដូច​គ្នា ទៅ​កាន់​ស្ថាប័ន​ពាក់​ព័ន្ធ​ ព្រោះ​ស្រុក​យើង​មិន​ទាន់​មាន​គោលការណ៍​នេះ នៅឡើយ។

តាម​រយៈ​គេហទំព័រ​របស់​ការិយាល័យ​ឧត្ដម​ស្នងការ​ទទួល​បន្ទុក​សិទ្ធិ​មនុស្ស​ កម្ពុជា (ការិយាល័យ OHCHR) បាន​ចុះ​ផ្សាយ​ថា ស្ថិត​ក្រោម​ច្បាប់​ជាតិ និង​ច្បាប់​អន្តរជាតិ បុគ្គល​គ្រប់រូប រាប់​ទាំង​មនុស្ស​ស្រី​ស្រលាញ់​ភេទ​ដូចគ្នា មនុស្ស​ប្រុស ស្រលាញ់​ភេទ​ដូចគ្នា មនុស្ស​ស្រលាញ់​ភេទ​ពីរ និង​មនុស្ស​ប្ដូរ​ភេទ (មនុស្ស​ស្រលាញ់​ភេទ​ដូចគ្នា) មាន​សិទ្ធិ​ទទួល​បាន​សិទ្ធិ​ដូច​បុគ្គល​ដទៃ​ទៀត​ដែរ។


(សាររបស់អង្គការសហប្រជាជាតិ)

អត្ថបទទាក់ទង