ខ្មែរប៉ុស្ដិ៍ Close

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ឱកាសអញ្ជើញសម្ពោធដាក់ឱ្យប្រើប្រាស់ ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ

ដោយ៖ លី វិទ្យា ​​ | ថ្ងៃពុធ ទី២៧ ខែធ្នូ ឆ្នាំ២០២៣ ទស្សនៈ - នយោបាយ 1271
ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ឱកាសអញ្ជើញសម្ពោធដាក់ឱ្យប្រើប្រាស់ ប្រព័ន្ធបង្ហូរទឹកកខ្វក់ក្នុងរាជធានីភ្នំពេញប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ឱកាសអញ្ជើញសម្ពោធដាក់ឱ្យប្រើប្រាស់ ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ

នៅព្រឹកថ្ងៃពុធ ទី២៧ ខែធ្នូ ឆ្នាំ២០២៣នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញជាអធិបតីក្នុងពិធីសម្ពោធដាក់ឱ្យប្រើប្រាស់ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ។

ខាងក្រោមខ្លឹមសារសំខាន់ៗរបស់សម្តេចធិបតី ហ៊ុន ម៉ាណែត ឱកាសអញ្ជើញសម្ពោធដាក់ឱ្យប្រើប្រាស់ ប្រព័ន្ធបង្ហូរទឹកកខ្វក់ក្នុងរាជធានីភ្នំពេញ៖

  1. សម្តេចធិបតី ហ៊ុន ម៉ាណែត ថ្លែងថា ថ្ងៃនេះសម្តេចមានសេចក្តីរីករាយ ដោយបានមកចូលរួមក្នុងពិធី «សម្ពោធដាក់ឱ្យប្រើប្រាស់ជាផ្លូវការស្ថានីយ៍ ប្រព្រឹត្តកម្មទឹកកខ្វក់ជើងឯក នៃគម្រោងអភិវឌ្ឍប្រព័ន្ធបង្ហូរទឹកកខ្វក់ ក្នុងរាជធានីភ្នំពេញ» ដែលជាហិរញ្ញប្បទានឥតសំណងរបស់ប្រទេសជប៉ុន។
  2. សម្តេចធិបតី ហ៊ុន ម៉ាណែត បាននាំនូវការផ្ដាំផ្ញើសាកសួរសុខទុក្ខ និងសេចក្ដីនឹករលឹក ក៏ដូចជាការជូនពរពីសំណាក់សម្ដេចតេជោ ហ៊ុន សែន និង សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះប្រជាពលរដ្ឋក្នុងមូលដ្ឋានរាជធានីភ្នំពេញ។
  3. សម្តេចធិបតី ហ៊ុន ម៉ាណែត បានថ្លែងថា ខួប៧០ឆ្នាំនៃទំនាក់ទំនងកម្ពុជា-ជប៉ុន ជិតបិទបញ្ចប់ហើយ តែទំនាក់ទំនង និងកិច្ចសហប្រតិបត្តិការថ្មី រវាងកម្ពុជា និងជប៉ុននៅមានជាច្រើនទៀត។
  4. សម្តេចធិបតី ហ៊ុន ម៉ាណែត បានថ្លែងថា រយៈពេល៧០ឆ្នាំនៃទំនាក់ទំនងរវាងកម្ពុជា និងជប៉ុន, ជប៉ុន បានរួមចំណែកច្រើនណាស់ដល់កិច្ចអភិវឌ្ឍន៍នៅកម្ពុជា។
  5. សម្តេចធិបតី ហ៊ុន ម៉ាណែត បានថ្លែងថា កម្ពុជា និងជប៉ុន មានទំនាក់ទំនងចាប់ពីក្សត្រ រហូតដល់ប្រជាពលរដ្ឋសាមញ្ញ។
  6. សម្តេចធិបតី ហ៊ុន ម៉ាណែត បានថ្លែងថា វត្តមានស្ថានីយប្រព្រឹត្តកម្មទឹកកខ្វក់ជើងឯក ជានិមិត្តរូបនៃការបន្តកិច្ចអភិវឌ្ឍន៍ពីនីតិកាលចាស់ មកនីតិកាលថ្មី និងការបន្តកិច្ចសហប្រតិបត្តិការរវាងកម្ពុជា និងជប៉ុន។
  7. សម្តេចធិបតី ហ៊ុន ម៉ាណែត បានថ្លែងថា បឹងជើងឯក បានប្រែក្លាយពីកន្លែងដែលគេសម្លាប់មនុស្សប្រមាណ២ម៉ឺននាក់ នៅក្នុងរបប ប៉ុលពត ក្លាយទៅជាកន្លែងជួបជុំ និងអភិវឌ្ឍន៍រស់រវើកក្នុងសម័យសុខសន្តិភាព។
  8. សម្តេចធិបតី ហ៊ុន ម៉ាណែត បានថ្លែងថា ថ្ងៃដែលខ្មែរបញ្ចប់សង្គ្រាម «២៩-ធ្នូ-១៩៩៨» គឺជាទិវាសន្តិភាព។
  9. សម្តេចធិបតី ហ៊ុន ម៉ាណែត បានថ្លែងថា ទឹកដីខ្មែរគ្រប់ទីកន្លែង សុទ្ធតែជាទឹកដីជូរចត់ក្នុងពេលស្រុកជួបភ្លើងសង្គ្រាម។
  10. សម្តេចធិបតី ហ៊ុន ម៉ាណែត បានថ្លែងថា ដរាបណាសុខសន្តិភាពនៅតែរក្សាបាន តំបន់បឹងជើងឯក នឹងកាន់តែរីកចម្រើន។ នេះជាមោទនភាពរបស់ខ្មែរ។
  11. សម្តេចធិបតី ហ៊ុន ម៉ាណែត ស្នើរដ្ឋាភិបាល និងប្រជាជនជប៉ុន បន្តគាំទ្រដល់កិច្ចអភិវឌ្ឍន៍ និងកិច្ចសហប្រតិបត្តិការទាំងឡាយនៅកម្ពុជា។
  12. សម្តេចធិបតី ហ៊ុន ម៉ាណែត៖ ដរាបណាមានសុខសន្តិភាព ជាតិនៅតែបន្តអភិវឌ្ឍន៍, នេះជាមោទនភាពរបស់កម្ពុជា
  13. សម្តេចធិបតី ហ៊ុន ម៉ាណែត បានថ្លែងថា នៅថ្ងៃម្សិលមិញសម្តេចបានដឹកនាំរដ្ឋមន្ត្រីក្រសួងសុខាភិបាល និងក្រុមការងារពង្រឹងសេវាសុខាភិបាលនៅតាមមណ្ឌលសុខភាព។
  14. សម្តេចធិបតី ហ៊ុន ម៉ាណែត បានថ្លែងថា ទស្សនៈរបស់សម្តេចផ្តោតជាសំខាន់ទៅលើបញ្ហារបស់ប្រជាពលរដ្ឋ។
  15. សម្តេចធិបតី ហ៊ុន ម៉ាណែត បានថ្លែងថា សម្តេចពេញចិត្តនឹងសម្តីរបស់លោក វីនស្តុន ឆឺឈីល អ្នកនយោបាយអង់គ្លេស ដែលបានលើកឡើងថា «បើរវល់គប់គ្រប់តែឆ្កែ មិនអាចទៅដល់គោលដៅឡើយ»។
  16. សម្តេចធិបតី ហ៊ុន ម៉ាណែត បានថ្លែងថា សង្ឃគ្រងស្បង់ចីពរ និយាយភូតកុហក់គេ គឺបាបខ្លាំងណាស់។
  17. សម្តេចធិបតី ហ៊ុន ម៉ាណែត ថ្លែងថា គម្រោងព្រែកជីកហ្វូណន-តេជោ មិនបានខ្ចីលុយបំណុលចិនមកសាងសង់នោះទេ គឺសង់ក្រោមកិច្ចសហប្រតិបត្តិការជាមួយវិស័យឯកជន ក្នុងទម្រង់ BOT។
  18. សម្តេចធិបតី ហ៊ុន ម៉ាណែត បានថ្លែងថា សម្តេចមិនជឿថាមន្ត្រីក្រសួងសេដ្ឋកិច្ចល្ងង់ដូចផ្សាយបំភ្លៃរបស់ព័ត៌មានប្រតិក្រិយានោះឡើយ។
  19. សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលប្រឹងប្រែងសង់ព្រែកជីកហ្វូណន-តេជោ ដើម្បីពង្រីកការដឹកជញ្ជូនតាមផ្លូវទឹក ដែលមានផលចំណេញច្រើនសម្រាប់សេដ្ឋកិច្ច។
  20. សម្តេចធិបតី ហ៊ុន ម៉ាណែត បានថ្លែងថា សារព័ត៌មានឌឹខេមបូឌាដេលី ជ្រកក្រោមស្លាកសារព័ត៌មាន តែធ្វើសកម្មភាពថោកទាប។
  21. សម្តេចធិបតី ហ៊ុន ម៉ាណែត បានថ្លែងថា ក្រុមប្រឆាំងក្រៅប្រទេស ជាក្រុមប្រឆាំង ដើម្បីតែប្រឆាំង។
  22. សម្តេចធិបតី ហ៊ុន ម៉ាណែត បានថ្លែងថា គម្រោងព្រែកជីកហ្វូណន-តេជោ ប្រមូលផ្តុំអ្នកជំនាញសិក្សា និងគិតខ្លាំងណាស់ ដើម្បីធានាប្រយោជន៍សម្រាប់ជាតិ។
  23. សម្តេចធិបតី ហ៊ុន ម៉ាណែត បានថ្លែងថា ការដែលសម្តេចចេញប្រតិកម្មលើ​ការ​ផ្សាយបំភ្លៃរបស់ឌឹខេមបូឌាដេលី លើគម្រោងព្រែកជីកហ្វូណន-តេជោ គឺជាការការពារភាពត្រឹមត្រូវរបស់រាជរដ្ឋាភិបាល និងមន្ត្រី។
  24. សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលមិនខ្លាចព័ត៌មានអវិជ្ជមាននោះឡើយ។ ព័ត៌មានអវិជ្ជមាននេះហើយ បានជាមូលដ្ឋានសម្រាប់រាជរដ្ឋាភិបាលដោះស្រាយ។
  25. សម្តេចធិបតី ហ៊ុន ម៉ាណែត លើកទឹកចិត្តឱ្យអ្នកសារព័ត៌មានគោរពក្រមសីលធម៌វិជ្ជាជីវៈ ផ្សាយព័ត៌មានពិតគ្រប់ជ្រុងជ្រោយ បើខុសត្រូវហ៊ានកែតម្រូវ។
  26. សម្តេចធិបតី ហ៊ុន ម៉ាណែត ណែនាំដល់អាជ្ញាធររាជធានី ខេត្ត យកចិត្តទុកដាក់រក្សាសន្តិសុខសណ្តាប់ធ្នាប់ ទប់ស្កាត់ឱ្យបានការប៉ុនប៉ងបង្កចលាចលនានា។
  27. សម្តេចធិបតី ហ៊ុន ម៉ាណែត ណែនាំក្រសួងទេសចរណ៍ ត្រូវសហការជាមួយរដ្ឋបាលរាជធានី-ខេត្ត ដើម្បីរៀបចំតុបតែងលម្អ ទីតាំងកំសាន្តសប្បាយឱ្យបានច្រើនសម្រាប់បម្រើជូនបងប្អូនប្រជាពលរដ្ឋ ភ្ញៀវទេសចរជាតិ និង អន្តរជាតិ ក្នុងឱកាសអបអរសាទរឆ្នាំសកលឆ្នាំ ២០២៤, ជាពិសេសទីតាំងសម្រាប់ការរាប់ថយក្រោយឆ្លងឆ្នាំសកល (Countdown) និង សូមលើកទឹកចិត្តឱ្យមានការចូលរួមពីវិស័យឯកជន តាមរយៈការរៀបចំព្រឹត្តិការណ៍ប្រគុំតន្ត្រី សម្ដែងសិល្បៈ កីឡាប្រដាល់គុនខ្មែរ និង ជម្រើសនៃការកម្សាន្តផ្សេងៗទៀត ដើម្បីបង្កើនការទាក់ទាញទាំងភ្ញៀវទេសចរក្នុងស្រុក និងអន្តរជាតិ។
  28. សម្តេចធិបតី ហ៊ុន ម៉ាណែត ណែនាំក្រសួងទេសចរណ៍ និងគណៈកម្មាធិការ​ជាតិ​វាយតម្លៃទីក្រុងស្អាត ត្រូវបន្តរៀបចំកម្មវិធីប្រកួតប្រជែង «ទីក្រុងដែលមានពិធី​បុណ្យ​ឆ្លងឆ្នាំសកលល្អជាងគេប្រចាំឆ្នាំ (Best Countdown City of the Year)» ដោយត្រូវពិនិត្យ និង វាយតម្លៃផ្អែកលើលក្ខណៈពិសេសសំខាន់ៗ ដូចជាសន្តិសុខ-សុវត្ថិភាព អនាម័យ-បរិស្ថាន ការតុបតែងលម្អ ជម្រើស​នៃការ​កម្សាន្ត ទីតាំងកំសាន្តសប្បាយ ភាពពេញចិត្ត និង ភាពសប្បាយរីករាយ​របស់ភ្ញៀវ​ទេសចរ ព្រោះនេះ គឺ ជាផ្នែកមួយនៃការលើក​កម្ពស់​វិស័យទេសចរណ៍​ជាតិ​ឱ្យកាន់​តែប្រសើរឡើង៕

Fresh News

អត្ថបទទាក់ទង