តោះមកស្គាល់ផ្សារទំនើបទាំង១២នៅកម្ពុជា នឹងដំណើរឆាប់ៗ
តោះមកស្គាល់ផ្សារទំនើបទាំង១២នៅកម្ពុជា នឹងដំណើរឆាប់ៗ
នៅឆ្នាំ២០១៨នេះ អ្នកជំនាញអចលនទ្រព្យបានហៅថា “ជាឆ្នាំនៃផ្សារទំនើប” ដោយសារឆ្នាំនេះផ្សារទំនើបតូច ធំចំនួន១២ នឹងបើកដំណើរការជាបន្តបន្ទាប់។ នេះបើយោងតាមការចុះផ្សាយរបស់កាសែតរស្មីកម្ពុជា នាព្រឹកថ្ងៃទី៤ ខែឧសភានេះ។
ទីតាំង ទំហំ និងឈ្មោះផ្សារទំនើបទាំង ១២ នោះ មានដូចខាងក្រោម៖
១. ផ្សារទំនើប AEON Mall 2 ៖ ជាផ្សារទំនើបធំជាងគេ ដែលនឹងបើកដំណើរការនៅត្រីមាសទី២ ឆ្នាំនេះ។ ផ្សារនេះស្ថិតនៅលើផ្លូវលេខ ១០០៣ តំបន់ពោងពាយ ខណ្ឌសែនសុខ រាជធានីភ្នំពេញ។ ផ្សារនេះមានទំហំ ជាង៧ម៉ឺនម៉ែត្រការ៉េ។ វាមានទំហំធំជាងផ្សារទំនើប AEON Mall ទី១។
២. ផ្សារបែបសហគមន៍ Eden Garden ៖ ស្ថិតនៅក្នុងមជ្ឈមណ្ឌលភ្នំពេញស៊ីធីសេនធ័រ (Phnom Penh City Center) ក្នុងតំបន់បឹងកក់ សង្កាត់ស្រះចក ខណ្ឌដូនពេញ រាជធានីភ្នំពេញ។ ផ្សារទំនើបនេះមានទំហំ ៥ពាន់ម៉ែត្រការ៉េ។ Eden Garden ជាគម្រោងថ្មីមួយរបស់ក្រុមហ៊ុនភ្នំពេញស៊ីធីសេនធ័រ ដែលប្រមូលផ្ដុំដោយហាងទំនិញ ភោជនីយដ្ឋាន រោងភាពយន្ត និងក្លឹបកម្សាន្តជាដើម។ ហាងជាច្រើននៃផ្សារសហគមន៍នេះ បានបើកដំណើការហើយ ប៉ុន្តែការបើកសម្ពោធជាផ្លូវការ រំពឹងថានឹងធ្វើឡើងនៅដើមខែមិថុនា ឆ្នាំ២០១៨។
៣. ផ្សារសហគមន៍ The Park ៖ ស្ថិតនៅតាមបណ្ដោយផ្លូវជាតិលេខ១ ទល់មុខបុរីប៉េងហួត ស្ថិតក្នុងសង្កាត់ឫស្សីស្រស់ ខណ្ឌច្បារអំពៅ រាជធានីភ្នំពេញ។ ផ្សារទំនើបនេះ មានទំហំ ៤៥៨១ម៉ែត្រការ៉េ។ ហាងមួយចំនួននៅក្នុងផ្សារសហគមន៍នេះ បានបើកដំណើរការហើយ។
៤. ផ្សារទំនើប Prince Central Plaza ៖ ស្ថិតនៅក្នុងអគារ Prince Plaza តាមបណ្ដោយមហាវិថីព្រះនរោត្តម សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ ផ្សារនេះមានទំហំ ៨១០០ម៉ែត្រការ៉េ។ Prince Plaza ជាគម្រោងដែលប្រើប្រាស់ចម្រុះ សម្រាប់បរិបទនៃទស្សនវិស័យអភិវឌ្ឍន៍ថ្មីនៅរាជធានីភ្នំពេញ។
៥. ផ្សារទំនើប Midtown Mall ៖ ស្ថិតនៅតាមបណ្ដោយផ្លូវលេខ ២០០៤ ក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។ ផ្សារទំនើបនេះ មានទំហំ ៤៨៨១ម៉ែត្រការ៉េ និងគ្រោងដាក់ឲ្យដំណើរការនៅខែធ្នូ ឆ្នាំ២០១៨។
៦. ផ្សារទំនើប The Olympia Mall ៖ ស្ថិតនៅក្នុងគម្រោង Olympia City ដែលជាគម្រោងអភិវឌ្ឍន៍ដ៏ធំមួយនៅកណ្ដាលរាជធានីភ្នំពេញ។ ផ្សារនេះស្ថិតនៅបណ្ដោយផ្លូវហ្សាលដឺហ្គោល ក្នុងសង្កាត់វាលវង់ ខណ្ឌ៧មករា រាជធានីភ្នំពេញ។ ផ្សារទំនើបលំដាប់អន្តរជាតិនេះ មានផ្ទៃក្រឡា ១៥០៨១ម៉ែត្រការ៉េ និងគ្រោងបើកដំណើរការនៅខែធ្នូ ឆ្នាំនេះ។
៧. ផ្សារទំនើប The Commune ៖ ស្ថិតនៅលើផ្លូវ ៣៤៧ និងផ្លូវលេខ ៣៤៩ ក្នុងសង្កាត់បឹងកក់១ ខណ្ឌទួលគោក រាជធានីភ្នំពេញ។ នេះជាគម្រោងអភិវឌ្ឍន៍ចម្រុះ ដែលមានទំហំ ៨១២៨ម៉ែត្រការ៉េ។
៨. ផ្សារទំនើប The Heritage Walk ៖ ស្ថិតនៅតាមបណ្ដោយផ្លូវជាតិលេខ៦ ស្ថិតក្នុងសង្កាត់ស្វាយដង្គុំ ខេត្តសៀមរាប។ ផ្សារទំនើបនេះ នឹងបើកដំណើរការនៅត្រីមាសទី២ ឆ្នាំនេះ។ វាមានទំហំ ១៤០០០ម៉ែត្រការ៉េ។
៩. ផ្សារទំនើប WB Arena ៖ ស្ថិតនៅតាមបណ្ដោយផ្លូវជាតិលេខ២ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។ ផ្សារទំនើបនេះ ជាផ្សារបែបសហគមន៍ ដែលផ្ដល់សេវាកម្មម្ហូបអាហារ ភេសជ្ជៈ និងការកម្សាន្ត។
១០. ផ្សារទំនើប Down Town 93 ៖ ស្ថិតនៅក្នុងគម្រោងអភិវឌ្ឍន៍ចម្រុះ ដែលមានការិយាល័យធ្វើការ និង apartment។ ផ្សារទំនើបនេះ ស្ថិតនៅតាមបណ្ដោយផ្លូវព្រះមុនីវង្ស ស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។
១១. ផ្សារទំនើប The Bridge ៖ ស្ថិតនៅក្នុងគម្រោង The Bridge ដែលជាគម្រោងអភិវឌ្ឍន៍ចម្រុះ។ ផ្សារទំនើបនេះ ស្ថិតនៅតាមបណ្ដោយមហាវិថីរដ្ឋសភាជាតិ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ វាមានទំហំ ១៩៣៤០ម៉ែត្រការ៉េ។
១២. ផ្សារទំនើប Diamond Twin Tower ៖ ស្ថិតនៅផ្លូវសុភមង្គល ក្នុងទីក្រុងកោះពេជ្រ ខណ្ឌចំការមន រាជធានីភ្នំពេញ។ ផ្សារទំនើបនេះ ស្ថិតនៅក្នុងគម្រោងអភិវឌ្ឍន៍ចម្រុះ ដែលរួមមានខុនដូ និងការិយាល័យជាដើម។ វាមានទំហំ ១៥៦៤០ម៉ែត្រការ៉េ និងគ្រោងបើកដំណើរការនៅត្រីមាសទី២ ឆ្នាំនេះ៕
ប្រភព៖ Sabay
