ខេត្តសៀមរាបប្ដេជ្ញាមិនឱ្យមានខ្សែកាបអ៊ុបទិកនៅលើអាកាសទៀតទេ ចាប់ពីឆ្នាំ ២០២៣ តទៅ
ខេត្តសៀមរាបប្ដេជ្ញាមិនឱ្យមានខ្សែកាបអ៊ុបទិកនៅលើអាកាសទៀតទេ ចាប់ពីឆ្នាំ ២០២៣ តទៅ
មន្ដ្រីជំនាញ បានអះអាងថា ក្រុមការងារកំពុងតែមមាញឹកកាត់ទម្លាក់ និងតបណ្ដាញខ្សែកាបអ៊ុបទិកឡើងវិញ នៅតាមផ្លូវសំខាន់ៗមួយចំនួន ក្នុងក្រុងសៀមរាប ដើម្បីធ្វើយ៉ាងណានឹងលែងឱ្យមាននៅលើអាកាសទៀតហើយចាប់ពីឆ្នាំ២០២៣ខាងមុខតទៅ ដោយបណ្ដាញខ្សែនោះបានបង្វែរដាក់ចូលក្នុងបំពុងកប់ក្រោមដីវិញ ។
លោក សុខ សីហា ប្រធានមន្ទីរប្រៃសនីយ៍ និងទូរគមនាគមន៍ ខេត្ដសៀមរាប បានឲ្យដឹងកាលពីថ្ងៃទី១៦ ខែឧសភានេះថា បច្ចុប្បន្ននេះ ក្រុមការងារពាក់ព័ន្ធរួមមាន អង្គភាពអគ្គិសនី, រដ្ឋករទឹក និងក្រុមការងារសាងសង់ផ្លូវ ៣៨ខ្សែ ក្នុងក្រុងសៀមរាប បានសហការគ្នា កំពុងមមាញឹកតបណ្ដាញខ្សែកាបទាំងអស់ដាក់ចូលក្នុងបំពុងកប់ក្រោមដីនៅតាមផ្លូវសំខាន់ៗមួយចំនួន ដើម្បីធ្វើយ៉ាងណាលែងអោយមានខ្សែកាបទាំងអស់មាននៅលើអាកាសបន្ដទៀត ប៉ុន្ដែដោយឡែកផ្លូវតូចៗ នៅតែមានដដែល ។
លោកបានមានប្រសាសន៍ថា ការកាត់ខ្សែកាបដាក់ក្នុងបំពុងកប់ក្រោមដីនេះ បានធ្វើឡើងចាប់ពីចុងឆ្នាំ២០១៨ដល់បច្ចុប្បន្ននេះ បានកប់ខ្សែកាបក្រោមដីតាមបណ្ដោយផ្លូវសំខាន់ៗនៅក្នុងក្រុងសៀមរាប បានជាង១៤ផ្លូវ ដែលមានប្រវែងជាង៧០គម ។ លោក បន្តថា គម្រោងនេះនឹងបន្ដអនុវត្ដកាត់ខ្សែពីលើអាកាសនេះ ទៅដាក់ក្នុងបំពង់កប់ក្រោមដីនៅតាមផ្លូវសំខាន់ៗទាំងនោះ ឲ្យរួចរាល់នៅឆ្នាំ២០២៣ ស្របតាមគម្រោងអភិវឌ្ឍន៍ហេដ្ឋារចនាសម្ព័ន្ធផ្លូវ ៣៨ខ្សែដែលជាផ្លូវកំពុងកែលម្អរនៅក្នុងក្រុងសៀមរាប។ ប៉ុន្ដែលោកបានបញ្ជាក់ថា បើទោះបី ការដាក់ខ្សែកាបអ៊ុបទិកនេះមិនឲ្យមានលើអាកាសក្ដី ប៉ុន្ដែអាចនៅមានដាក់ក្នុងបំពុងភ្ជាប់ជាមួយ នឹងបង្គោលភ្លើងអគ្គីសនី ដើម្បីងាយស្រួលអ្នកជំនាញតបណ្ដាញចូលផ្ទះប្រជាពលរដ្ឋ។ លោក បន្តថា ការរៀបចំអោយមានខ្សែកាបអ៊ុបទិកនៅក្រោមដីនេះ ដើម្បីឲ្យនៅលើផ្លូវមានសោភ័ណ្ណភាព និងសុវត្ថិភាព សណ្ដាប់ធ្នាប់ល្អនៅក្នុងក្រុងទេសចរណ៍មួយនេះ ។
លោក សុខ សីហា បានអោយដឹងដែរថា នៅក្នុងខេត្ដសៀមាប មានក្រុមហ៊ុនអុីនធ័រណែតចំនួន ១១ក្រុមហ៊ុន ។ ក្រុមហ៊ុនដែលបានទទួលអាជ្ញាប័ណ្ណដាក់បំពង់ទីបក្រោមដីចំនួន២ក្រុមហ៊ុន រួមមាន ទូរគមនគមន៍ កម្ពុជា TC របស់រដ្ឋ និងក្រុមហ៊ុន ស៊ីហ្វុក CFOCN ។
បើតាមលោកសីហាថា ផ្លូវដែលបានកាត់ទម្លាក់បណ្ដាញខ្សែកាប ដើម្បីរៀបចំឲ្យមានសោភណ្ឌភាព និងសណ្ដាប់ធ្នាប់ល្អ មានផ្លូវ លោកតាណឺយ, ផ្លូវជុំវិញផប់ស្ទ្រីត, ផ្លូវហ្សាឌឺហ្គោល, ផ្លូវ៦០ម៉ែត្រ, ផ្លូវកូម៉ៃ, ផ្លូវ៧មករា, ផ្លូវជាតិលេខ៦ ចាប់ពីព្រំប្រទល់រដ្ឋបាលស្រុកពួក ដល់ស្រុកប្រាសាទបាគង ផ្លូវស៊ីវុត្ថា និងផ្លូវសំខាន់ៗមួយចំនួនទៀតស្ថិតនៅក្នុងក្រុងទេសចរណ៍អង្គរ។ លោកក៏បានអំពាវនាវដល់ប្រជាពលរដ្ឋអោយមានការយោគយល់ ចំពោះការប៉ះពាល់នៅពេលអ្នកជំនាញជីកកាយដីដាក់ខ្សែកាបអ៊ុបទិកនៅខាងមុខលំនៅឋានរបស់ពួកគាត់ផងដែរ៕
