លោកនាយករដ្ឋមន្ត្រី ហ៊ុន សែន ប្រកាសថា ជនបរទេសដែលរស់នៅ និងធ្វើការនៅកម្ពុជា នឹងទទួលបានការចាក់វ៉ាក់សាំងកូវីដ-១៩ ដោយឥតគិតថ្លៃ
លោកនាយករដ្ឋមន្ត្រី ហ៊ុន សែន ប្រកាសថា ជនបរទេសដែលរស់នៅ និងធ្វើការនៅកម្ពុជា នឹងទទួលបានការចាក់វ៉ាក់សាំងកូវីដ-១៩ ដោយឥតគិតថ្លៃ
លោកនាយករដ្ឋមន្ត្រី ហ៊ុន សែន ប្រមុខរាជរដ្ឋាភិបាលកម្ពុជា បានប្រកាសថា សម្រាប់ជនបរទេសដែលកំពុងរស់នៅ និងធ្វើការនៅក្នុងប្រទេសកម្ពុជា នឹងទទួលបានការចាក់វ៉ាក់សាំងដោយឥតគិតថ្លៃ។
ថ្លែងក្នុងសន្និសីទសារព័ត៌មាន បន្ទាប់ពីបានអញ្ជើញចាក់វ៉ាក់សាំងបង្ការជំងឺកូវីដ-១៩ AstraZeneca នាព្រឹកថ្ងៃទី០៤ ខែមីនា ឆ្នាំ២០២១ នៅមន្ទីរពេទ្យកាល់ម៉ែត លោកនាយករដ្ឋមន្ត្រី ហ៊ុន សែន បានគូសបញ្ជាក់ថា “ខ្ញុំសូមប្រកាសថា ជនបរទេសទាំងឡាយដែលបាននិងកំពុងរស់នៅ និងធ្វើការនៅកម្ពុជា នឹងទទួលបានវ៉ាក់សាំងទៅតាមលំដាប់លំដោយជាមួយនឹងពលរដ្ឋកម្ពុជា។ ប៉ុន្ដែសម្រាប់អ្នកការទូត អង្គការក្រៅរដ្ឋាភិបាលបរទេស នឹងទទួលបានការចាក់វ៉ាក់សាំងមុន ហើយទទួលបានក្នុងក្របខ័ណ្ឌវ៉ាក់សាំង AstraZeneca នេះផងដែរ”។
លោកបានបន្ដថា ឥឡូវនេះ រហូតតទៅពេលខាងមុខយើងត្រូវដោះស្រាយបញ្ហានេះយ៉ាងម៉េច ដំបូងយើងត្រូវនិយាយអំពីតួនាទី ជាយុទ្ធសាស្រ្ដ និងគន្លឹះរបស់វ៉ាក់សាំង។ លោកបានលើកឡើងថា កន្លងមកលោកធ្លាប់បាននិយាយហើយថា វ៉ាក់សាំងមិនមែនជាដំណោះស្រាយមានតែមួយគត់នោះទេ ប៉ុន្ដែវ៉ាក់សាំងគឺជាមធ្យោបាយដោះស្រាយជាយុទ្ធសាស្រ្ដ ជាគន្លឹះមួយ រួមជាមួយនឹងការអនុវត្ដវិធានការសុខាភិបាលដែលយើងបានដាក់ចេញដូចជា ៣ការពារ ៣កុំជាដើម។
លោកនាយករដ្ឋមន្ត្រី បានបន្ថែមថា ការពង្រឹងសមត្ថភាព ការត្រួតពិនិត្យច្រកចេញ-ចូល តាមព្រំដែន ការធ្វើតេស្ដ ការធ្វើចត្ដាឡីស័ក និងការព្យាបាលទៅក្នុងការប្រយុទ្ធនឹងជំងឺកូវីដ-១៩ ដើម្បីឈានទៅសម្រេចជោគជ័យនៅក្នុងការប្រយុទ្ធប្រឆាំងនឹងជំងឺនេះ៕
