រដ្ឋបាលរាជធានីភ្នំពេញ កាត់លះមែកឈើដើមធំៗនៅតាមបណ្តោយ វិថីព្រះអង្គឌួង និងនៅលើសួនកាណាឌីយ៉ា
រដ្ឋបាលរាជធានីភ្នំពេញ កាត់លះមែកឈើដើមធំៗនៅតាមបណ្តោយ វិថីព្រះអង្គឌួង និងនៅលើសួនកាណាឌីយ៉ា
ដោយអនុវត្តន៍តាមការណែនាំពីឯកឧត្ដម ឃួង ស្រេង អភិបាលរាជធានីភ្នំពេញ ក្រុមការងារនៃមន្ទីរសាធារណការ និងដឹកជញ្ជូនរាជធានីភ្នំពេញដឹកនាំដោយលោក សំ សាមុត ប្រធានអង្គភាពសួនច្បារ និងរុក្ខជាតិនៃមន្ទីរសាធារណការ និងដឹកជញ្ជូនរាជធានីភ្នំពេញ នៅព្រឹក៥កើត ខែមាឃ ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃចន្ទ ទី១៨ ខែមករា ឆ្នាំ២០២១ បានកាត់ និងលះមែកឈើដើមធំៗនៅតាមបណ្តោយវិថីព្រះអង្គឌួង និងវិថីក្រមួនស ឬនៅលើសួនកាណាឌីយ៉ាមុខមន្ទីរពេទ្យព្រះអង្គឌួង ក្នុងខណ្ឌដូនពេញ។
លោក សំ សាមុត បានឱ្យដឹងថា ដើមឈឺធំៗនៅសួនកាណាឌីយ៉ាមុខមន្ទីរពេទ្យព្រះអង្គឌួងនេះមានចំនួន១០៥ដើម ហើយក្នុងចំនួននេះមានដើមគ្រាប់បែក ឬដើមគីនីនចំនួនជាង៤០ដើម ក្រៅពីនេះមានដើមគគី ឥន្ទនេល និងឈើទាល ។ ដើមឈើធំៗនិងចាស់ៗមានចំនួន៥០ដើម ដែលមានអាយុកាលរាប់រយឆ្នាំហើយ។
លោកប្រធានអង្គភាពសួនច្បារ បានបន្តថា ក្រុមការងារបានកាត់លះមែកឈើខាងលើនេះ ពិតជាមានការលំបាកខ្លះ ដោយសារតែយើងឡើងកាប់មួយមែកម្តងជាមួយនឹងការចងខ្សែទម្លាក់មកក្រោម មួយមែកម្តងៗផងដែរព្រោះតែខ្លាចខូចថ្នល់ ។ ដូច្នេះហើយលោកសូមការយោគយល់ចំពោះបងប្អូនប្រជាពលរដ្ឋទាំងអស់ដែលត្រូវឆ្លងកាត់ផ្លូវនេះ ។ ប៉ុន្តែទោះបីជាយ៉ាងណាក្តីក្រុមការងារ នឹងសម្រុកធ្វើការងារនេះឱ្យបានរួចរាល់បានមុនគម្រោងដែលបានគ្រោងទុក។
សូមបញ្ជាក់ថា ឯកឧត្ដម ឃួង ស្រេង អភិបាលរាជធានីភ្នំពេញ កាលថ្ងៃទី១២ ខែមករា ឆ្នាំ២០២១ កន្លងមក បានដឹកនាំមន្ត្រីជំនាញ និងអាជ្ញាធរខណ្ឌ ចុះពិនិត្យមើលស្ថានភាពដើមឈើបីដើមដែលត្រូវកាប់ចេញនោះ ឯកឧត្ដម មិនឱ្យកាប់ចេញទេ។ ដោយតម្រូវឱ្យកាត់និងលះមែកៗ ជាមួយនឹងការធ្វើទម្រទប់ដើមផងដែរ ។ បន្ថែមពីលើនេះទៀត កាលពីថ្ងៃទី១៥ ខែមករា ឆ្នាំ២០២១ រដ្ឋបាលរាជធានីភ្នំពេញក៏បានជូនដំណឹងជុំវិញការតាត់ លះមែកឈើនេះផងដែរដោយក្រុមការងារនឹងប្រើប្រាស់រយៈពេល១ខែ។
យោងតាមសេចក្តីជូនដំណឹងនេះ បានឱ្យដឹងថា រដ្ឋបាលរាជធានីភ្នំពេញ សូមជម្រាបជូនដំណឹងដល់បងប្អូនប្រជាពលរដ្ឋទាំងអស់ក្នុងរាជធានីភ្នំពេញ ឱ្យបានជ្រាបថា ដើមឈើធំៗនៅតាមបណ្តោយវិថីព្រះអង្គឌួង និងវិថីក្រមួនស មានអាយុកាលច្រើនឆ្នាំ មានសភាពចាស់ទ្រុឌទ្រោម និងមានដុះមែកឈើស៊ុបទ្រុប ដែលធ្វើឱ្យដើមមិនអាចទ្រទ្រង់បាន រដ្ឋបាលរាជធានីភ្នំពេញ បានឱ្យមន្ទីរសាធារណការ និងដឹកជញ្ជូនរាជធានីភ្នំពេញធ្វើការលះមែកឈើមួយចំនួនចេញ ព្រមទាំងបន្តថែទាំ និងរក្សាទុកដើមឈើធ្វើទម្រទប់ដើម ដោយចំណាយពេលអនុវត្តន៍ការងាររយៈពេល០១ខែ ចាប់ពីថ្ងៃទី១៨ ខែមករា ឆ្នាំ២០២១ តទៅ។
ដើម្បីឱ្យការងារខាងលើប្រព្រឹត្តទៅដោយរលូន ស្នើបងប្អូនប្រជាពលរដ្ឋទាំងអស់ក្នុងរាជធានីភ្នំពេញ មេត្តាជ្រាបយោគយល់ អធ្យាស្រ័យ និងបញ្ចៀសការធ្វើដំណើរឆ្លងកាត់ទីតាំងខាងលើ បើមិនមានការចាំបាច់ដើម្បីកាត់បន្ថយការកកស្ទះចរាចរណ៍ និងគ្រោះថ្នាក់កើតឡើងជាយថាហេតុ ព្រោះដោយសារក្រុមការងារត្រូវប្រើប្រាស់ឧបករណ៍សម្រាប់កាត់មែកឈើ និងរថយន្តធុនធំ ដែលអាចបង្កការកកស្ទះចរាចរណ៍៕
