អ្នកនាំពាក្យក្រសួងអប់រំ ច្រានចោលព័ត៌មានថា ក្រសួងឱ្យសាលាទាំងអស់ចូលរៀនវិញនៅថ្ងៃទី១៨ ខែមេសា
អ្នកនាំពាក្យក្រសួងអប់រំ ច្រានចោលព័ត៌មានថា ក្រសួងឱ្យសាលាទាំងអស់ចូលរៀនវិញនៅថ្ងៃទី១៨ ខែមេសា
អ្នកនាំពាក្យក្រសួងអប់រំ យុវជន និងកីឡា លោក ឌី ខាំប៉ូលី បានចេញមកច្រានចោលព័ត៌មានមួយ ដែលបានផ្សព្វផ្សាយលើបណ្តាញសង្គមថា ក្រសួងអប់រំ នឹងអនុញ្ញាតឱ្យសាលាទាំងអស់បើកបង្រៀនឡើងវិញនៅថ្ងៃទី១៨ ខែមេសា ឆ្នាំ២០២០ខាងមុខនេះ។ មន្ត្រីជាន់ខ្ពស់ក្រសួងអប់រំរូបនេះ បានឲ្យដឹងទៀតថា ក្រសួងធ្លាប់បានប្រកាសឲ្យវិស្សមកាលតូចមុនពេលកំណត់ ប៉ុន្តែការឲ្យបើកបវេសនកាលវិញ មិនទាន់បានកំណត់នោះទេ ដោយសារការរាតត្បាត នៃមេរោគកូវីដ-១៩។
លោក ឌី ខាំប៉ូលី បានបញ្ជាក់យ៉ាងដូច្នេះថា៖ «សូមសាធារណជនមាតាបិតា អាណាព្យាបាល លោកគ្រូ អ្នកគ្រូ បុគ្គលិកអប់រំ ទាំងអស់សូមមេត្តាអនុវត្តន៍ ទៅតាមសេចក្តីណែនាំរបស់ក្រសួង ស្តីពីការចាប់ផ្តើមវិស្សមកាលតូច និងការឈប់សម្រាកមុនកាលកំណត់ សម្រាប់គ្រឹះស្ថានសិក្សាគ្រប់កម្រិត គ្រប់ប្រភេទ ទាំងសាធារណៈ និងឯកជន នៅទូទាំងប្រទេស រហូតដល់មានការជូនដំណឹងសារជាថ្មី»។ លោក បន្តថា «ខ្ញុំសូមបញ្ជាក់ឡើងវិញថា មិនមានការកំណត់នៅក្នុងការអនុញ្ញាតឲ្យគ្រឹះស្ថានសិក្សាគ្រប់ប្រភេទបើកការចូលរៀនឡើងវិញ នៅថ្ងៃទី១៨ ខែមេសា ឆ្នាំ២០២០ទេ ដែលជាព័ត៌មានមិនពិត ព័ត៌មានក្លែងក្លាយ សូមរង់ចាំការជូនដំណឹងជាថ្មីពីក្រសួងអប់រំយុវជន និងកីឡា»។
សូមរំលឹកថា ក្រសួងអប់រំ យុវជន និងកីឡា នៅថ្ងៃទី១៦ ខែមីនា ឆ្នាំ២០២០ បានចេញសេក្តីណែនាំបន្ទាន់មួយ ដោយសម្រេចឲ្យសិស្ស និងនិស្សិតគ្រប់កម្រិតសិក្សាទាំងអស់ នៅទូទាំងប្រទេស ឈប់សម្រាកមុនកាលកំណត់ (វិស្សមកាលតូច) រហូតដល់មានការជូនដំណឹងថ្មី។ ការសម្រេចរបស់ក្រសួងអប់រំនេះ ធ្វើឡើងដើម្បីជាវិធានការបង្ការ និងទប់ស្កាត់ជាបន្ទាន់ នូវការរីករាលដាលមេរោគកូវីដ-១៩៕
