កូវីដ-១៩៖ មនុស្ស១ភាគ៣ក្នុងសកលលោក ត្រូវជាប់បំរាមឲ្យសម្ងំក្នុងផ្ទះ
សង្កាត់មួយនៅក្រុងញូដេលី ក្រោយការប្រកាសអនុវត្តវិធានការ ឲ្យប្រជាជនសំងំក្នុងផ្ទះ ដើម្បីបង្ការការឆ្លងរាលដាល Covid-19។ ថ្ងៃទី២៥មីនា២០២០ REUTERS - ANUSHREE FADNAVIS
រដ្ឋាភិបាលប្រទេសជាច្រើន បានចាត់វិធានការបិទខ្ទប់ដោយផ្នែក ឬទាំងស្រុង ទៅលើការធ្វើដំណើរបំលាស់ទីរបស់ប្រជាពលរដ្ឋ ដើម្បីទប់ស្កាត់ការឆ្លងរាលដាល នៃមេរោគកូវីដ-១៩។ យ៉ាងណាមិញ នៅថ្ងៃពុធ ទី២៥មីនា រដ្ឋាភិបាលប្រទេសឥណ្ឌា ដែលមានប្រជាជនប្រមាណ ១៣០០លាននាក់ បានសម្រេច បិទខ្ទប់ប្រទេសទាំងស្រុង តម្រូវឲ្យប្រជាជនឥណ្ឌាសម្ងំនៅក្នុងផ្ទះ ចៀសវាងការចេញទៅខាងក្រៅ។ គិតមកត្រឹមពេលនេះ គឺមានមនុស្ស១ភាគ៣ នៃពិភពលោកយើង ដែលត្រូវស្ថិតក្នុងបំរាមនេះ។
ចំនួនអ្នកឆ្លង និងអ្នកស្លាប់ ដោយកូវីដ-១៩បន្តកើនឡើង នៅទូទាំងពិភពលោក។ អ៊ីតាលី បារាំង អេស្ប៉ាញ និងប្រទេសជាច្រើនផ្សេងទៀត សុទ្ធតែបានចេញបញ្ជាហាមឃាត់ប្រជាពលរដ្ឋ មិនឲ្យចេញពីផ្ទះ និងចៀងវាងនៅក្បែរប្រាស្រ័យជាមួយមនុស្សដ៏ទៃ ដើម្បីផ្តាច់ផ្លូវចម្លងមេរោគកូវីដ-១៩។
ជាមួយនឹងប្រជាជនប្រមាណ១៣០០លាននាក់ ឥណ្ឌាទើបតែបានសម្រេចបិទខ្ទប់ប្រទេសទាំងស្រុងដែរ បើទោះបីប្រទេសនេះ មានស្ថានភាពឆ្លងរាលដាល មិនទាន់ធ្ងន់ធ្ងរខ្លាំងក៏ដោយ។ ចាប់ពីថ្ងៃពុធទី២៥មីនាទៅ ប្រជាជនឥណ្ឌាត្រូវសម្ងំនៅក្នុងផ្ទះ ចៀសវាងចេញដើរទៅខាងក្រៅ ជួបប្រាស្រ័យ ឬប៉ះពាល់ជាមួយអ្នកដ៏ទៃ។
លោកណារិន្ទ្រ ម៉ូឌី នាយករដ្ឋមន្ត្រីឥណ្ឌា បានថ្លែងប្រាប់ទៅប្រជាពលរដ្ឋទាំងអស់ថា៖ « ចូរអ្នកចងចាំជានិច្ចថា គ្រាន់តែឈានជើងមួយជំហានចេញពីផ្ទះ ក៏អ្នកអាចឆ្លងមេរោគកូវីដ-១៩ ហើយនាំវាមកចម្លងដល់សមាជិកគ្រួសារអ្នកបានដែរ។ ដូច្នេះ គ្រប់គ្នាត្រូវតែគោរពបទបញ្ជានេះ ដើម្បីការពារខ្លួន និងក្រុមគ្រួសារ »។
គួរកត់សំគាល់ថា ជាមួយនឹងការសម្រេចរបស់រដ្ឋាភិបាលឥណ្ឌានេះ គឺមានមនុស្សប្រមាណ២៦០០លាននាក់ហើយ ពោលគឺ១ភាគ៣នៃមនុស្សជាតិទាំងមូល ដែលត្រូវជាប់បំរាមសំងំនៅក្នុងផ្ទះ។ តែយ៉ាងណាក៏ដោយ ការហាមឃាត់មនុស្សមិនឲ្យចេញពីផ្ទះ បានធ្វើឲ្យសកម្មភាពការងាររកស៊ី ដែលជាចរន្តសេដ្ឋកិច្ច ត្រូវរាំងស្ទះលែងដំណើរការ។
មេដឹកនាំប្រទេសខ្លះ មិនសូវជាយល់ពីសារៈប្រយោជន៍នៃវិធានការនេះទេ ដោយគិតតែអាទិភាពលើបញ្ហាសេដ្ឋកិច្ច។ លោកដូណាល់ ត្រាំ ប្រធានាធិបតីសហរដ្ឋអាមេរិកបានលើកឡើងនៅតាមកញ្ចក់ទូរទស្សន៍ Fox News ថាការរារាំងមនុស្សឲ្យនៅក្នុងផ្ទះ អាចធ្វើឲ្យសេដ្ឋកិច្ចត្រូវរំលំរលាយ ហើយមនុស្សជាច្រើនប្រាកដជាជួបវិបតិ្ត ឈានទៅធ្វើអត្តឃាត។ ចំណែក លោកបុលសូណរ៉ូ ប្រធានាធិបតីប្រេស៊ីល វិញ បាននិយាយថា ការសម្រេចហាមប្រជាជនមិនឲ្យចេញពីផ្ទះ គឺជានយោបាយភ័យជ្រួលជ្រើម ជ្រុលហួសហេតុ។
គួរបញ្ជាក់ថា សម្រាប់ពេលនេះ នៅពុំទាន់មានថ្នាំព្យាបាល និងថ្នាំវ៉ាក់សាំងការពារមេរោគកូវីដ-១៩ទេ។ អាជ្ញាធរសុខាភិបាល និងអ្នកជំនាញវិជ្ជសាស្ត្រនៅតាមប្រទេសជាច្រើន រួមទាំងអង្គការសុខភាពពិភពលោកផង បានយល់ស្របគ្នាថា ការតម្រូវឲ្យមនុស្សសំងំក្នុងផ្ទះ កុំជួបជុំគ្នា កុំប្រាស្រ័យប៉ះពាល់ជាមួយអ្នកដ៏ទៃ គឺជាវិធីតែមួយគត់ ដែលអាចទប់ល្បឿននៃការឆ្លងរាលដាល ហើយអាចឲ្យក្រុមគ្រូពេទ្យ មានពេលវេលានិងលទ្ធភាពគ្រប់គ្រាន់ ដើម្បីព្យាបាលអ្នកជំងឺកូវីដ១៩៕ RFI
