ទស្សនៈមិត្តអ្នកអាន៖ រឿងក្តី កឹម សុខា បទសន្ទិដ្ឋិភាពជាមួយបរទេសគឺជាបទឧក្រិដ្ឋក្បត់ជាតិ
ទស្សនៈមិត្តអ្នកអាន៖ រឿងក្តី កឹម សុខា បទសន្ទិដ្ឋិភាពជាមួយបរទេសគឺជាបទឧក្រិដ្ឋក្បត់ជាតិ
យោងតាមសម្តីសារភាពរបស់ កឹម សុខា នៅក្នុងវីដេអូមួយដែលបានផ្សព្វផ្សាយដោយទូរទស្សន៍អនឡាញ CBN នៅប្រទេសអូស្ត្រាលីកាលពីថ្ងៃទី៨ ខែធ្នូ ឆ្នាំ២០១៣ រួមផ្សំនិងភស្តុតាងដែលបង្ហាញឱ្យឃើញនូវសកម្ម ភាពដែលបានអនុវត្តជាក់ស្តែង គឺមានភាពស៊ីសង្វាក់គ្នាច្បាស់ក្រឡែតអំពីផែនការផ្តួលរំលំរដ្ឋអំណាចនៅកម្ពុជាតាមគំរូនៃការផ្តួលរំលំនៅប្រទេសយូហ្គោស្លាវី និងស៊ែរប៊ី ដោយវិធីនៃការធ្វើបដិវត្តពណ៌ប្រជាជន។
ទង្វើ និងសកម្មភាពខុសច្បាប់របស់ កឹម សុខា នេះបានរំលោភយ៉ាងធ្ងន់ធ្ងរលើរដ្ឋធម្មនុញ្ញកម្ពុជាដែលជាច្បាប់កំពូលរបស់ជាតិ និងត្រូវបានជាប់ចោទពីបទសន្ទិដ្ឋិភាព (អំពើឃុបឃិត ឬចូលដៃ) ជាមួយបរទេសយ៉ាងពិតប្រាក ដ។ មានចំណុចជាច្រើនដែល កឹម សុខា បានអះអាងបញ្ជាក់នៅក្នុងសម្តីសារភាពរបស់ខ្លួនដូចជា៖ «បរទេសដែលគេជួយខ្ញុំនេះ គេឱ្យខ្ញុំយកម៉ូឌែលតាមនៅប្រទេស យូហ្គោស្លាវី នៅស៊ែរប៊ី ដែលគេប្តូរមេដឹកនាំបាននោះគឺគេឱ្យប្រើយុទ្ធសាស្ត្រហ្នឹងនៅស្រុកខ្មែរ……….;ប៉ុន្តែអត់មាននរណាដឹងទេ ប៉ុន្តែយុទ្ធសាស្ត្រនេះដោយសារថ្ងៃនេះយើងឈានដល់មួយដំណាក់ហើយខ្ញុំត្រូវតែប្រាប់បងប្អូនឱ្យដឹង………។ល។» ។ សម្តីនេះ និងចំណុចជាច្រើនទៀតដែល កឹម សុខា បានសារភាពគឺជាភស្តុតាងដ៏រឹងមាំ ដែលតុលាការត្រូវតែចាត់វិធានការខាងផ្លូវច្បាប់ដើម្បីទប់ស្កាត់ផែនការឃុបឃិតជាមួយបរទេសដើម្បីផ្តួលរំលំនេះឱ្យបាន។
ដូច្នេះ ការនាំខ្លួន កឹម សុខា មកធ្វើសវនាការជំនុំជម្រះចាប់ពីថ្ងៃទី១៥ ខែមករា នេះទៅគឺជារឿងត្រឹមត្រូវបំផុត។ អ្វីដែលសំខាន់បំផុតនោះ បន្ទាប់ពីសវនាការត្រូវបានបញ្ចប់នៅព្រឹកមិញនេះ ជនជាប់ចោទ កឹម សុខា បានទទួលស្គាល់ថាវីដេអូដែលបានផ្សព្វផ្សាយនៅក្នុងទូរទស្សន៍អនឡាញ CBN នៅប្រទេសអូស្ត្រាលីកន្លងមកនោះគឺពិតជាសម្តី និងសម្លេងរបស់ខ្លួនពិតប្រាកដមែន។
អាចនិយាយបានថា សម្តីសារភាពរបស់ កឹម សុខា នៅ ក្នុងវីដេអូ និងភស្តុតាងដែលប្រមូលបានជាច្រើនក្រោយការស៊ើបអង្កេត គឺជាសម្តីមាសដែលតុលាការអាចវាយតម្លៃបានដូចតទៅ៖
១/ជាសម្តីមាសនៃភស្តុតាងជាក់ស្តែងឥតប្រកែកបាន ដែលនាំឱ្យតុលាការមានទឡ្ហីករណ៍គ្រប់គ្រាន់ ដើម្បីចោទប្រកាន់អំពីបទ ត្រូវរ៉ូវ ឃុបឃិតគ្នាជាមួយបរទេស និងទទួលបញ្ជាពីបរទេសក្នុងការផ្តួលរំលំរដ្ឋាភិបាលស្របច្បាប់ក្រោមទម្រង់បដិវត្តពណ៌ ដែលបទល្មើសនេះគឺជាបទល្មើសសន្ទិដ្ឋិភាពជាមួយបរទេសដែលមានចែងនៅក្នុងមាត្រា៤៤៣នៃក្រមព្រហ្មទណ្ឌនៃព្រះរាជាណា ចក្រកម្ពុជា។
២/ជាសម្តីមាសនិយាយចេញដោយខ្លួនឯងដោយគ្មានការបង្ខិតបង្ខំ និងមានរូបភាព និងកាយវិការផ្ទាល់ក្នុងការបង្ហាញនូវផែនការជាយុទ្ធសាស្ត្រដើម្បីយកមកអនុវត្តនៅក្នុងដំណាក់នីមួយៗ រួមផ្សំនិងភស្តុតាងនៃសកម្មភាពជាក់ស្តែងដែលបានកើតមាន គឺមានភាពស៊ីសង្វាក់គ្នាឥតខ្ចោះ។
៣/ជាសម្តីមាសនៃការសារភាពអំពីអ្នកដែលបានបង្គាប់បញ្ជាឱ្យធ្វើ ដែលជាបរទេសនៅពីក្រោយខ្នងធ្លាប់បានអនុវត្តនូវផែនការផ្តួលរំលំនេះទទួលបានជោគជ័យ នៅប្រទេសមួយចំនួនកន្លងរួចមកហើយ ដោយបានជួយឧបត្ថម្ភទាំងគោលនយោបាយ យុទ្ធសាស្ត្រ និងថវិកាថែមទៀតផង។
សរុបមក បើទោះបីជាជនជាប់ចោទ កឹម សុខា ខិតខំបដិ សេធមិនទទួលយកនូវការចោទប្រកាន់ពីដើមបណ្តឹងអំពីបទសន្ទិដ្ឋិភាពដែលជាបទល្មើសព្រហ្មទណ្ឌយ៉ាងណាក្តី និងមានចេតនាចង់បង្វែររឿងក្តីនេះឱ្យទៅជារឿងនយោ បាយក្តី គឺមានតែតុលាការទេដែលមានសិទ្ធិសម្រេច និងកាត់ក្តីទៅតាមឆន្ទានុសិទ្ធិរបស់តុលាការថា កឹម សុខា មានទោស ឬគ្មានទោសនោះ។ ម្យ៉ាងទៀត វាជារឿងធម្មតាទេដែលជនជាប់ចោទ កឹម សុខា ប្រកែកមិនទទួលស្គាល់នូវកំហុសរបស់ខ្លួននោះ ព្រោះថា «ចោរមិនដែលសារភាពថាខ្លួនជាចោរនោះទេ»៕
ដោយ៖ យី វិសាល
