រាជរដ្ឋាភិបាលបញ្ចេញរថយន្តក្រុង ១២០គ្រឿង សម្រាប់ដឹកជញ្ជូន ប្រជាពលរដ្ឋដោយឥតគិតថ្លៃ ក្នុងឱកាសបុណ្យចូលឆ្នាំខ្មែរខាងមុខ
រាជរដ្ឋាភិបាលបញ្ចេញរថយន្តក្រុង ១២០គ្រឿង សម្រាប់ដឹកជញ្ជូន ប្រជាពលរដ្ឋដោយឥតគិតថ្លៃ ក្នុងឱកាសបុណ្យចូលឆ្នាំខ្មែរខាងមុខ
ប្រមុខរាជរដ្ឋាភិបាលកម្ពុជា លោកនាយករដ្ឋមន្រ្ដី ហ៊ុន សែន បានសម្រេចបញ្ចេញរថយន្តក្រុងសាធារណៈរបស់សាលារាជធានីភ្នំពេញ ចំនួន១២០គ្រឿង សម្រាប់ដឹកជញ្ជូនប្រជាពលរដ្ឋពីភ្នំពេញ ទៅតាមបណ្តាខេត្តនានា ដោយឥតគិតថ្លៃ រយៈពេល៧ថ្ងៃ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ដែលនឹងឈានចូលមកដល់ ក្នុងពេលដ៏ខ្លីខាងមុខនេះ។
លោកនាយករដ្ឋមន្រ្ដី ហ៊ុន សែន បានថ្លែងបញ្ជាក់ទៀតថា ការសម្រេចបញ្ចេញរថយន្តក្រុងសាធារណៈចំនួន១២០គ្រឿងរយៈពេល៧ថ្ងៃ ចាប់ពីថ្ងៃទី១២ ដល់ ១៨ ខែមេសា ឆ្នាំ២០១៩ ដោយសារតែលោកធុញទ្រាន់ ក្នុងការនិយាយជាមួយក្រុមហ៊ុនឯកជន ដែលតែងតែដំឡើងថ្លៃឈ្នួលរថយន្ត ក្នុងឱកាសបុណ្យចូលឆ្នាំ។
លើសពីនេះទៀតនោះ លោកនាយករដ្ឋមន្រ្ដី ហ៊ុន សែន ក៏បានបញ្ជាក់ដែរថា ក្នុងរយៈពេល៧ថ្ងៃនៃឱកាសបុណ្យចូលឆ្នាំថ្មី ប្រជាពលរដ្ឋក្នុងរាជធានីភ្នំពេញ ក៏អាចជិះរថយន្តក្រុងសាធារណៈ និងការដឹកជញ្ជូនតាមកាណូត ដោយមិនគិតថ្លៃផងដែរ។
ការថ្លែងរបស់លោកនាយករដ្ឋមន្ត្រី ធ្វើឡើងក្នុងឱកាសដែលលោកអញ្ជើញ ក្នុងពិធីពិសាបាយសាមគ្គី ជាមួយកីឡាករ កីឡាការិនីជាង៤ពាន់នាក់ នៅសាលសន្និបាត និងពិព័រណ៍កោះពេជ្រ នៅល្ងាចថ្ងៃទី៤ ខែមេសា ឆ្នាំ២០១៩នេះ។
លោកនាយករដ្ឋមន្រ្ដី ហ៊ុន សែន បានថ្លែងយ៉ាងដូច្នេះថា «នៅថ្ងៃទី១២ ដល់ថ្ងៃទី១៨ ខែមេសា រយៈពេល៧ថ្ងៃ សាលាក្រុងភ្នំពេញ នឹងដាក់រថយន្ត១២០គ្រឿង ដើម្បីដឹកបងប្អូនប្រជាពលរដ្ឋរបស់យើង ពីរាជធានីភ្នំពេញទៅតាមខេត្ត និងពីតាមខេត្តមករាជធានីភ្នំពេញ ដោយមិនគិតប្រាក់សម្រាប់បងប្អូន ព្រោះខ្ញុំមិនចង់និយាយបញ្ហាច្រំដែល ជាមួយម្ចាស់រថយន្តទៀតទេ ដែលកាលមុននេះប៉ុន្មានឆ្នាំហើយ ដែលខ្ញុំបានអំពាវនាវឲ្យពួកគេ កុំដំឡើងថ្លៃ នៅក្នុងពេលចូលឆ្នាំ និងភ្ជុំបិណ្ឌ ក៏ប៉ុន្តែមួយចំនួនក៏បានស្តាប់ តែមួយចំនួនមិនបានស្តាប់ទេ»។
លោកបញ្ជាក់ថា ផ្លូវដែលដាក់រថយន្តក្រុងសាធារណៈ ឲ្យប្រជាពលរដ្ឋជិះដោយឥតគិតថ្លៃនេះ រួមមានផ្លូវជាតិលេខ១ ផ្លូវជាតិលេខ២ ផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ ផ្លូវជាតិលេខ៦ ផ្លូវជាតិលេខ៧ និងផ្លូវជាតិលេខ៨ ដែលនឹងចាប់ផ្តើមចេញដំណើរ នៅថ្ងៃទី១២ ខែមេសា ឆ្នាំ២០១៩។
ចំនួនរថយន្តដែលត្រូវរត់តាមផ្លូវជាតិរួមមាន៖ ផ្លូវជាតិលេខ១មាន ភ្នំពេញ-ខេត្តកណ្តាល-ស្វាយរៀង ចំនួន៥គ្រឿង និងភ្នំពេញ-កណ្តាល-ព្រៃវែង ៥គ្រឿង សរុប១០គ្រឿង, ផ្លូវជាតិលេខ២ ភ្នំពេញ-តាកែវ ៥គ្រឿង, ផ្លូវជាតិលេខ៣ ភ្នំពេញ-កែប ៥គ្រឿង, ភ្នំពេញ-កំពត ៥គ្រឿងសរុប ១០គ្រឿង, ផ្លូវជាតិលេខ៤ ភ្នំពេញ -កំពង់ស្ពឺ ៣គ្រឿង, ភ្នំពេញ-ក្រុងព្រះសីហនុ ៧គ្រឿង សរុប១៣គ្រឿង, ផ្លូវជាតិលេខ៥ ភ្នំពេញ-កំពង់ឆ្នាំង ៥គ្រឿង ភ្នំពេញ-ពោធិសាត់ ១០គ្រឿង ភ្នំពេញ-បាត់ដំបង ១៥គ្រឿង ភ្នំពេញ-បន្ទាយមានជ័យ ១៥គ្រឿង សរុប៤៥គ្រឿង, ផ្លូវជាតិលេខ៦ ភ្នំពេញ-កំពង់ធំ ៥គ្រឿង, ភ្នំពេញសៀមរាប ១៥គ្រឿង សរុប២០គ្រឿង, ផ្លូវជាតិលេខ៦ និងលេខ៧ ភ្នំពេញ-កំពង់ចាម ៥គ្រឿង ភ្នំពេញ-ត្បូងឃ្មុំ ៥គ្រឿង សរុប១០គ្រឿង, ផ្លូវជាតិលេខ៦ និងលេខ៨ ភ្នំពេញ-ក្រចេះ ៥គ្រឿង ភ្នំពេញ-ស្ទឹងត្រែង ៥គ្រឿង សរុប១០គ្រឿង។
រាជរដ្ឋាភិបាលកម្ពុជា មិនត្រឹមតែផ្តល់ការជិះរថយន្តក្រុងសាធារណៈ ដោយឥតគិតថ្លៃ ក្នុងឱកាសបុណ្យចូលឆ្នាំនោះទេ ប្រមុខរាជរដ្ឋាភិបាល ក៏បានផ្តល់ជូនប្រជាពលរដ្ឋ នូវការជិះរថភ្លើងទៅស្រុកកំណើត ក្នុងពេលបុណ្យចូលឆ្នាំថ្មី ដោយឥតគិតថ្លៃផងដែរ។
លោកនាយករដ្ឋមន្ត្រី បានបង្ហាញនូវក្តីរំពឹង និងជឿជាក់ថា បុណ្យចូលឆ្នាំ ថ្មីឆ្នាំនេះ ប្រជាពលរដ្ឋកម្ពុជា នឹងទទួលបានភាពរីករាយ ក្នុងការធ្វើដំណើរ ព្រោះតែរាជរដ្ឋាភិបាលបានរៀបចំការ ដឹកជញ្ជូនដោយឥតគិតថ្លៃ ៕
