សម្តេចធិបតី ហ៊ុន ម៉ាណែត អំពាវនាវឱ្យប្រជាពលរដ្ឋបន្តជឿជាក់លើគម្រោងព្រែកជីកហ្វូណតេជោ

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអំពាវនាវឱ្យប្រជាពលរដ្ឋបន្តជឿជាក់ថា គម្រោងព្រែកជីកហ្វូណតេជោមិនមែនជាផលប្រយោជន៍របស់ប្រទេសណានោះទេ ប៉ុន្តែគឺជាផលប្រយោជន៍របស់ប្រទេសកម្ពុជា និងប្រជាជនកម្ពុជាពីបច្ចុប្បន្ននិងទៅអនាគត។

ជាមួយគ្នានេះ សម្តេចធិបតី ហ៊ុន ម៉ាណែត ក៏បានថ្លែងអំពាវនាវដល់ប្រជាពលរដ្ឋទូទាំងប្រទេស កុំលង់ជឿតាមការញុះញុងរបស់ក្រុមមួយចំនួនក៏ដូចជាអ្នកនយោបាយខ្លះ ដែលចេះតែអុចអាលប្រជាពលរដ្ឋ ដោយយករូបភាពមកបំភ្លៃដើម្បីឱ្យប្រជាពលរដ្ឋបាត់ជំនឿលើគម្រោងព្រែកជីកហ្វូណនតេជោ ហើយនាំគ្នាតវ៉ាប្រឆាំងមិនគាំទ្រដល់គម្រោងនេះ។ សម្តេចធិបតីក៏បានប្រដៅអ្នកនយោបាយចាស់វស្សាថា «ជាអ្នកនយោបាយ និងជាអ្នកសេដ្ឋកិច្ចនឹងគេដែរ ប៉ុន្តែមួយថ្ងៃៗជេរតែរឿងគម្រោងដែលជាផលប្រយោជន៍ជាតិខ្មែរ។ បើមិននិយាយក៏គេមិនថាគដែរ!»

សម្តេចធិបតី ហ៊ុន ម៉ាណែត បានថ្លែងដូចនេះនៅក្នុងឱកាសដែលសម្តេចអញ្ជើញជាអធិបតី «សម្ពោធកំពង់ផែអន្តរជាតិកំពត នៅក្រុងបូកគោ ខេត្តកំពត» នៅព្រឹកថ្ងៃទី០៦ ខែមិថុនា ឆ្នាំ២០២៤៕