ខ្មែរប៉ុស្ដិ៍ Close

    ក្រុមសង្គមស៊ីវិលមួយក្តាប់តូចកំពុងព្យាយាមការពារសេរីភាពនិងប្រជាធិបតេយ្យបែបអនាធិបតេយ្យដែលពួកគេចង់បាន

    ដោយ៖ លី វិទ្យា ​​ | ថ្ងៃពុធ ទី១៧ ខែមីនា ឆ្នាំ២០២១ ព័ត៌មានទូទៅ 1545
    ក្រុមសង្គមស៊ីវិលមួយក្តាប់តូចកំពុងព្យាយាមការពារសេរីភាពនិងប្រជាធិបតេយ្យបែបអនាធិបតេយ្យដែលពួកគេចង់បានក្រុមសង្គមស៊ីវិលមួយក្តាប់តូចកំពុងព្យាយាមការពារសេរីភាពនិងប្រជាធិបតេយ្យបែបអនាធិបតេយ្យដែលពួកគេចង់បាន

    នៅចំពោះមុខនៃការធ្វើយុទ្ធនាជាបន្តបន្ទាប់របស់ក្រុមប្រឆាំងជ្រុលនិយមរួមនឹងសមាគម និងអង្គការមិនមែនរដ្ឋាភិបាលមួយក្តាប់តូចក្នុងចេតនាទុច្ចរិតបង្ខូចកេរ្តិ៍ឈ្មោះកម្ពុជានៅលើឆាកអន្តរជាតិនិងបំផ្លាញទំនុកចិត្តរបស់ប្រជាពលរដ្ឋចំពោះការដឹកនាំរបស់រាជរដ្ឋាភិបាលក្នុងវិស័យបរិស្ថាននិងធនធានធម្មជាតិ នៅថ្ងៃទី១៦ ខែមីនា ឆ្នាំ២០២១នេះ លោក នេត្រ ភក្ត្រា រដ្ឋលេខាធិការនិងជាមន្ត្រី​នាំពាក្យក្រសួងបរិស្ថានបានឆ្លើយតបត្រឡប់ទៅវិញ ដោយបានហៅយុទ្ធនាការទាំងអស់រាប់តាំងតាំងពីការចេញសេចក្តីថ្លែងការណ៍របស់អង្គការលើកលែងទោសអន្តរជាតិ បន្តរហូតដល់​ការធ្វើយុទ្ធនាការរបស់សមាគម និងអង្គការក្នុងស្រុកមួយក្តាប់តូច រួមនឹងក្រុមចលនាខុសច្បាប់មួយចំនួននៅក្រៅប្រទេសថា៖

    «ជាយុទ្ធនាការខុសបរិបទគួរឱ្យអស់សំណើច ធ្វើឡើងក្នុងចេតនាទុច្ចរិត​បង្កវិទ្ធង្សនាប្រឆាំងនឹងកម្ពុជាដោយបង្កភាពអនាធិបតេយ្យ ចិញ្ចឹមទំនាស់ បង្កើតការញុះញង់ និងព្យាយាមបំពានច្បាប់ដែលកម្ពុជាមានជ្រកក្រោមស្លាកបរិស្ថាននិងព្រៃឈើ»។

    រដ្ឋលេខាធិការក្រសួងបរិស្ថាន លោក នេត្រ ភក្ត្រា បានថ្លែងថា៖

    ក្រុមប្រឆាំងជ្រុលនិយមរួមនឹងសមាគម និងអង្គការមិនមែនរដ្ឋាភិបាលមួយក្តាប់តូច មិនបានខ្វល់ខ្វាយពីសុខទុក្ខរបស់ប្រជាពលរដ្ឋខ្មែរដែលកំពុងតែប្រឈមមុខនឹងវិបត្តិនៃការឆ្លងរីករាលដាលនៃវីរ៉ុសកូវីដ-១៩ នោះឡើយ ប៉ុន្តែពួកគេបន្តផែនការ ចាស់របស់ពួកគេ ហើយពួកគេបានខិតខំការពារសេរីភាព និងប្រជាធិបតេយ្យបែបអនាធិបតេយ្យដែលពួកគេ ចង់បាន។ ឯកឧត្តមរដ្ឋលេខាធិការបានថ្លែងថា អង្គការសង្គមស៊ីវិលមួយចំនួនតូចដែលមានជំងឺតួឯកផ្នែកសិទ្ធិមនុស្ស និងជំងឺតួឯកខាងធនធានធម្មជាតិព្យាយាមបំពានច្បាប់ និងបានលើកទឹកចិត្តក្រុមអ្នករំលោភច្បាប់។ សមាគមនិងអង្គការមិនមែនរដ្ឋាភិបាលខ្លះ ធ្វើសកម្មភាពមិនបានចុះបញ្ជី និងព្យាយាមមិនសហការស្របតាមនីតិវិធីច្បាប់ជាមួយស្ថាប័នជំនាញរបស់រាជរដ្ឋាភិបាល តើពួកគេធ្វើនៅក្នុងគោលបំណងអ្វីឱ្យ ពិតប្រាកដ? ពួកគេមិនអាចបន្តធ្វើសកម្មភាពបែបអនាធិបតេយ្យបានឡើយព្រោះកម្ពុជាមានច្បាប់។

    គួរកត់សម្គាល់ថាក្នុងរយៈពេលជិតមួយខែមកនេះក្រុមអង្គការជាតិនិងអន្តរជាតិ បានចេញរបាយការណ៍និងសេចក្តីថ្លែងការណ៍ និងបាននិងកំពុងធ្វើយុទ្ធនាការជាបន្តបន្ទាប់ ដើម្បីទាមទារឱ្យបណ្តាញសហគមន៍ព្រៃឡង់និងអង្គការមិនមែនរដ្ឋាភិបាលក្នុងស្រុកចូលធ្វើសកម្មភាព នៅក្នុងតំបន់ការពារធម្មជាតិដោយសេរីដោយមិនចាំបាច់មានការអនុញ្ញាតពីក្រសួងស្ថាប័នជំនាញ។ ប៉ុន្តែការទាមទារនេះត្រូវបានមន្ត្រី ជាន់ខ្ពស់ក្រសួងបរិស្ថានទាត់ចោលដោយថ្លែងថា៖

    តើពួកគេនៅបន្តធ្វើការបែបស្រមើស្រមៃយល់សប្តិ៍ដល់ណាទៀត? ពួកគេគួររៀនគោរពច្បាប់ កុំព្យាយាមបកស្រាយច្បាប់តម្រូវចិត្តក្រុមខ្លួនដោយមិនឈរលើមូលដ្ឋានគតិយុត្តត្រឹមត្រូវ ហើយលង់នឹងជំងឺតួឯកដែលម្ចាស់ជំនួយខ្លួនបញ្ជោរពេក។

    មន្ត្រីជាន់ខ្ពស់ក្រសួងបរិស្ថានរូបនេះ បានថ្លែងថា ក្រសួងបរិស្ថានសូមគូសបញ្ជាក់សាជាថ្មីពីការពង្រឹងការអនុវត្តច្បាប់ដោយមិនលើកលែងចំពោះបទល្មើសទាំងឡាយដែលកើតក្នុងតំបន់​ស្ថិតក្រោមដែនសមត្ថកិច្ចរបស់ខ្លួនគ្រប់ពេលវេលា និងគ្រប់ទីកន្លែង។ លោកបានគូសបញ្ជាក់ថា អ្នកប្រព្រឹត្តបទល្មើសត្រូវប្រឈមមុខច្បាប់ជាធរមាន ទោះអ្នកនោះជាអ្នកកាប់បំផ្លាញឈើ ទន្ទ្រានដី បរបាញ់សត្វ ឬក្រុមសកម្មជននយោបាយជ្រកក្រោមស្លាកអ្នកការពារព្រៃឈើក៏ដោយ ឱ្យតែប្រព្រឹត្តបទល្មើស ធ្វើសកម្មភាពដោយរំលោភបំពានច្បាប់ ធ្វើសកម្មភាពដោយគ្មានចុះកិច្ចព្រមព្រៀងស្តីពីការចូលរួមគ្រប់គ្រង និងអភិរក្សតំបន់ការពារធម្មជាតិរវាងរដ្ឋបាលការពារនិងអភិរក្សធនធានធម្មជាតិនៃក្រសួងបរិស្ថានដែលបានកំណត់នៅក្នុងច្បាប់ស្តីពីតំបន់ការពារធម្មជាតិដែលមានជាធរមាន។ ប្រសិនបើបន្តប្រព្រឹត្តល្មើសនោះក្រសួងបរិស្ថានគ្មាន ជម្រើសអ្វីក្រៅពីអនុវត្តតាមច្បាប់ដែលមានជាធរមាននោះឡើយ។

    លោករដ្ឋលេខាធិការ នេត្រ ភក្ត្រា បានសង្កត់ធ្ងន់ថា នេះមិនមែនជាការរឹតត្បិតសិទ្ធិសេរីភាពជនណាម្នាក់ឬក្រុមណាមួយឡើយ ប៉ុន្តែជាការពង្រឹងការអនុវត្តច្បាប់ដោយគ្មានការលើកលែង ហើយក្រុមអង្គការសង្គមស៊ីវិលគួរលើកតម្កើងការអនុវត្តច្បាប់ ជាជាងប្រើការតស៊ូមតិក្លែងក្លាយ និងយកបញ្ហាបរិស្ថាននិងធនធានធម្មជាតិមកធ្វើអាជីវកម្មនយោបាយ និងតម្រូវចិត្តម្ចាស់ជំនួយខ្លួន។ កម្ពុជាគោរព សិទ្ធិមនុស្ស និងមានលំហសេរីភាពនិងប្រជាធិបតេយ្យពេញលេញស្ថិតក្រោមដំបូលច្បាប់ តែមិនមែនជាសេរីភាព និងប្រជាធិបតេយ្យបែបអនាធិបតេយ្យដែល សមាគមនិងអង្គការក្រៅរដ្ឋាភិបាលមួយចំនួន ចង់បានឡើយ។ ឯកឧត្តមបានថ្លែងថា ក្រុមសមាគមនិងអង្គការមិនមែនរដ្ឋាភិបាលមួយចំនួនតែងតែទាមទារឱ្យមានការគោរពច្បាប់ឱ្យបានពេញលេញ ប៉ុន្តែតើសង្គមស៊ីវិលទាំងនោះគួរសួរខ្លួនឯងថាតើពួកគេបានអនុវត្តនិងបាន បំពេញគ្រប់តាមលក្ខខណ្ឌនៃច្បាប់កម្ពុជាដែរឬទេ ហើយតើពួកគេទទួលបានថវិកាពីណាមកធ្វើសកម្មភាព? ឯកឧត្តមរដ្ឋលេខាធិការក្រសួងបរិស្ថានថ្លែងថា ប្រទេសម្ចាស់ជំនួយមួយចំនួនគួរធ្វើការងារនិងគាំទ្រចំពោះសមាគមនិងអង្គការមិនមែនរដ្ឋាភិបាលណាដែលគោរពច្បាប់ត្រឹមត្រូវ និងមានរបៀបវារៈច្បាស់ លាស់ក្នុងការជួយលើវិស័យបរិស្ថាននិងធនធានធម្មជាតិ នោះទើបជាការជួយវិស័យនេះពិតប្រាកដ។

    ជាមួយគ្នានេះ មន្ត្រីក្រសួងបរិស្ថានបានថ្លែងថាទ្វាររបស់ក្រសួងបរិស្ថានបើកចំហជានិច្ច ហើយក្រសួងបរិស្ថានរីករាយនិងស្វាគមន៍ជានិច្ចនូវរាល់ការចូលរួមការពារនិងអភិរក្សធនធានធម្មជាតិ និងជីវៈចម្រុះនានា នៅក្នុងតំបន់ការពារធម្មជាតិសម្រាប់ដៃគូទាំងឡាយណា ដែលបានគោរពរតាមគោលការណ៍ណែនាំនីតិវិធីច្បាប់ និងលិខិតបទដ្ឋានគតិយុត្តត្រឹមត្រូវ។ ក្រសួងបរិស្ថានគ្មានផលប្រយោជន៍អ្វីទៅប្រឆាំងនឹងអ្នកស្រឡាញ់ និងចូលរួមការពារធនធានធម្មជាតិឡើយ ប៉ុន្តែតម្រូវឱ្យទាំងអស់គ្នាគោរពច្បាប់ជាធរមាន និងធ្វើសកម្មភាពស្របតាមច្បាប់កំណត់ និងដោយក្តីស្មោះត្រង់ក្នុងភាពជាដៃគូ បម្រើផលប្រយោជន៍ ជាតិនិងប្រជាជនកម្ពុជាពិតប្រាកដ និងដើម្បីរួមកម្លាំងគ្នាថែរក្សាធនធានធម្មជាតិកម្ពុជា ឱ្យបានគង់វង្សសម្រាប់មនុស្សរាប់ជំនាន់តទៅមុខទៀត៕

    អត្ថបទទាក់ទង