សម្ដេចតេជោ ហ៊ុន សែន ចេញបទបញ្ជាឱ្យពិនិត្យរៀបចំបង្កើតមន្ទីរពេទ្យចំនួនពីរកន្លែងទៀតនៅទីក្រុងភ្នំពេញ ដើម្បីត្រៀមព្យាបាលអ្នកជំងឺកូវីដ-១៩
សម្ដេចតេជោ ហ៊ុន សែន ចេញបទបញ្ជាឱ្យពិនិត្យរៀបចំបង្កើតមន្ទីរពេទ្យចំនួនពីរកន្លែងទៀតនៅទីក្រុងភ្នំពេញ ដើម្បីត្រៀមព្យាបាលអ្នកជំងឺកូវីដ-១៩
ក្នុងខណៈដែលមានការកើនឡើងនៃការរីករាលដាលជំងឺកូវីដ-១៩នោះ ប្រមុខរាជរដ្ឋាភិបាលកម្ពុជា សម្ដេចអគ្គមហាសេនាបតីតេជោ ហ៊ុន សែន បានចេញបទបញ្ជាឱ្យសាលារាជធានីភ្នំពេញ និងមេបញ្ជាការកងទ័ពជើងគោក រៀបចំនៅមន្ទីរពេទ្យពីរបន្ថែមទៀត ដោយយកសណ្ឋាគារធ្វើជាទីកន្លែងរៀបចំ ដែលអាចមានប្រមាណជា ២០០បន្ទប់។
ក្នុងសារបន្ទាន់ជាសម្លេង នាយប់ថ្ងៃទី១០ ខែមីនា ឆ្នាំ២០២១ ផ្ញើជូន ឯកឧត្ដមរដ្ឋមន្ត្រីក្រសួងការពារជាតិ រដ្ឋមន្ត្រីក្រសួងសុខាភិបាល អគ្គបញ្ជាការកងយោធពលខេមរភូមិន្ទ មេបញ្ជាការកងទ័ពជើងគោក សម្ដេចតេជោ ហ៊ុន សែន មានប្រសាសន៍ថា៖
ដោយសាររយៈពេលកន្លងទៅនេះយើងបានធ្វើប្រតិបត្តិការហូរហែមក កម្លាំងរបស់យើងក៏មានការនឿយហត់ បូកបន្ថែមទៅដោយការកើនឡើងនូវករណីឆ្លងថ្មីៗ។ ម្យ៉ាងទៀតគ្រូពេទ្យរបស់យើងខាងស៊ីវិល មិនមែនគ្រាន់តែជាគ្រូព្រទ្យសម្រាប់តែព្យាបាលកូវីដ-១៩នោះទេ តែត្រូវរ៉ាប់រងជាមួយនឹងជំងឺផ្សេងៗទៀតរបស់ប្រជាជន។ សម្ដេចតេជោបន្តថា ដោយសារការកើនឡើងយ៉ាងគំហុគនៃអ្នកដែលឆ្លងជំងឺកូវីដ-១៩ យើងបានរៀបចំសណ្ឋាគារអាំងទែរកុងទីណង់តាល់មួយកន្លែង ដែលកំពុងគ្រប់គ្រងដោយផ្នែកស៊ីវិល និងការចូលរួមរៀបចំដោយកម្លាំងកងទ័ព និងផ្នែកដែលមានការពាក់ព័ន្ធ។ ដោយសារស្ថានភាពបែបនេះ ខ្ញុំបានចេញបទបញ្ជាឱ្យសាលារាជធានីភ្នំពេញ និងមេបញ្ជាការកងទ័ពជើងគោក រៀបចំមន្ទីរពេទ្យពីរបន្ថែមទៀត ដោយយកសណ្ឋាគារធ្វើជាទីកន្លែងរៀបចំ ដែលអាចមានប្រមាណជា ២០០បន្ទប់ ឬអាចលើសនេះ ហើយបានពិភាក្សាជាមួយរដ្ឋមន្ត្រីក្រសួងការពារជាតិ ដើម្បីបញ្ចេញក្រុមគ្រូពេទ្យរបស់កងទ័ពធ្វើអន្តរាគមន៍ជួយដល់គ្រូពេទ្យស៊ីវិល។
សម្ដេចថ្លែងបន្ថែមថា ខាងក្រសួងការពារជាតិក៏បានឱ្យដឹងថា បានរៀបចំក្រុមគ្រូពេទ្យចំនួន៣០ក្រុម នៃក្រុមវេជ្ជបណ្ឌិត និងក្រុមគ្រូពេទ្យ ដើម្បីមកជួយដល់ខាងផ្នែកស៊ីវិល។ ដូច្នេះស្នើឱ្យរដ្ឋមន្ត្រីក្រសួងការពារជាតិ ក៏ដូចជារដ្ឋមន្ត្រីក្រសួងសុខាភិបាល ធ្វើការពិភាក្សាគ្នា ហើយប្រសិនបើមន្ទីរពេទ្យទាំងពីរនេះកើតឡើង ត្រូវប្រគល់ភារកិច្ចនេះឱ្យកងទ័ព ដោយប្រើប្រាស់វេជ្ជបណ្ឌិត និងគ្រូពេទ្យរបស់កងទ័ពគ្រប់គ្រងទីកន្លែងនោះតែម្ដង ហើយកម្លាំងសល់ពីនោះក៏ត្រូវរៀបចំដើម្បី នឹងត្រៀមអន្តរាគមន៍ទៅកាន់បណ្ដាគោលដៅដែលមានហានិភ័យខ្ពស់។ សម្ដេចតេជោលើកឡើងថា ដោយសារមេបញ្ជាការកងទ័ពជើងគោក បានស្ថិតនៅក្នុងគណៈកម្មាធិការអន្តរក្រសួង និងជាអនុគណៈកម្មការចត្តាឡីស័កស្រាប់ ដូច្នេះកម្លាំងគ្រូពេទ្យកងទ័ពនេះក៏ត្រូវប្រគល់ទៅឱ្យមេបញ្ជាការកងទ័ពជើងគោក ដើម្បីគ្រប់គ្រងចាត់ចែងប្រើប្រាស់ ជាមួយនឹងកម្លាំងដទៃទៀត ដែលកំពុងតែអនុវត្តនូវវិធានការគ្រប់គ្រងការធ្វើចត្តាឡីស័ក និងអន្តរាគមន៍លើផ្នែកសណ្ដាប់ធ្នាប់។
សម្ដេចតេជោគូសបញ្ជាក់ថា ដោយសារសភាពការណ៍បែបនេះ ក្រុមគ្រូពេទ្យរបស់យើងត្រូវតែទទួលបានការបំពាក់សម្ភារចេញពីក្រសួងសុខាភិបាល។ ដូច្នេះស្នើឱ្យរដ្ឋមន្ត្រីក្រសួងសុខាភិបាល រៀបចំនូវសម្ភារបរិក្ខារ ដែលត្រូវបំពាក់ឱ្យកម្លាំងប្រមាណជា ៣០០នាក់ ដែលចែកជា៣០ក្រុម នៃក្រុមប្រតិបត្តិការទាំងនេះ បំពាក់សម្រាប់កម្លាំងដែលត្រូវធ្វើសកម្មភាព ទាំងខោអាវការពារ ទាំងម៉ាស់ និងអ្វីៗដែលពាក់ព័ន្ធជាមួយនិងការប្រើប្រាស់របស់ក្រុមគ្រូពេទ្យ និងសម្ភារផ្សេងទៀតដែលសម្រាប់បំពាក់ឱ្យមន្ទីរពេទ្យថ្មីចំនួនពីរ ដែលត្រូវរៀបចំនៅទីក្រុងភ្នំពេញ។ ដោយឡែកសម្រាប់របបឧបត្ថម្ភសម្រាប់កម្លាំងទាំងនេះ ត្រូវផ្គត់ផ្គង់ដោយផ្ទាល់ពីក្រសួងសេដ្ឋកិច្ច និងហិរញ្ញវត្ថុ ដែលស្នើឱ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ចាត់ចែងធ្វើការងារនេះ ជាមួយនឹងក្រុមប្រតិបត្តិការពីសំណាក់ផ្នែកកងទ័ព។
សម្ដេចតេជោថ្លែងសង្កត់ធ្ងន់ថា «ខ្ញុំសង្ឃឹមថាការងារនេះចាត់ចែងបានល្អ ដោយមានរដ្ឋមន្ត្រីចំនួន ៣រូប ចូលរួមអនុវត្តការងារនេះ»។
សម្ដេចតេជោគូសបញ្ជាក់ទៀតបន្តថា ដូច្នេះកម្លាំងដែលត្រូវបញ្ជូនមកពីក្រសួងការពារជាតិ ហើយដែលត្រូវដាក់នៅក្រោមបញ្ជារបស់មេបញ្ជាការកងទ័ពជើងគោក ក៏ត្រូវបានហ្វឹកហាត់ឱ្យស្ទាត់ជំនាញ អំពីវិធីការពារ និងព្យាបាលសម្រាប់អ្នកដែលមានកូវីដ-១៩។ ការហ្វឹកហាត់ទាំងនេះត្រូវតែធ្វើឱ្យបានហ្មត់ចត់ ការបំពាក់សម្ភារត្រូវតែច្បាស់លាស់ គឺចាំបាច់ត្រូវមានសម្ភារដូចក្រូមគ្រូពេទ្យនៅខាងស៊ីវិល។ សម្ដេចតេជោបញ្ជាក់បន្ថែមថា សម្រាប់មធ្យោបាយដឹកជញ្ជូនផ្សេងៗ មិនចាំបាច់បំពាក់ពីក្រសួងសុខាភិបាលទៅក្រសួងការពារជាតិនោះទេ ប៉ុន្តែអាចមានលទ្ធភាពផ្ដល់រថយន្តដឹកអ្នកជំងឺតែប៉ុណ្ណោះពីក្រសួងសុខាភិបាល ទៅកាន់ពេទ្យកងទ័ព។ ឯសម្រាប់មធ្យោបាយចល័តផ្សេងៗ ដូចជាការដឹកជញ្ជូន ក្រសួងការពារជាតិត្រូវរ៉ាប់រងខ្លួនឯង។ សម្ដេចតេជោថ្លែងបន្ថែមថា កម្លាំងក្រុមគ្រូពេទ្យចំនួន៣០០នាក់នេះ គឺជាកម្លាំងបម្រុងទុក បើទោះបីជាគ្មានករណីកើតឡើង ក៏នៅជាកម្លាំងត្រៀមបម្រុងរបស់រាជរដ្ឋាភិបាល ដើម្បីឱ្យកងទ័ពអាចចូលទៅអន្តរាគមន៍ជួយទៅដល់ពេទ្យស៊ីវិល៕ AKP
