អាជ្ញាធរខេត្តបន្ទាយមានជ័យ បន្តជំរុញការស្ថាបនាផ្លូវក្រាលបេតុង និងកៅស៊ូជូនប្រជាពលរដ្ឋ
អាជ្ញាធរខេត្តបន្ទាយមានជ័យ បន្តជំរុញការស្ថាបនាផ្លូវក្រាលបេតុង និងកៅស៊ូជូនប្រជាពលរដ្ឋ
អភិបាលខេត្តបន្ទាយមានជ័យ លោក អ៊ុំ រាត្រី បានមានប្រសាសន៍ថា រដ្ឋបាលខេត្តនឹងបន្តការយកចិត្តទុកដាក់ជំរុញការស្ថាបនាផ្លូវ នៅតាមមូលដ្ឋាន ដោយប្តូរពីផ្លូវក្រួសក្រហម មកជាផ្លូវក្រាលបេតុង និងកៅស៊ូឱ្យបានច្រើនខ្សែថែមទៀត ដើម្បីសម្រួលដល់ការធ្វើដំណើររបស់ប្រជាពលរដ្ឋ ប្រើប្រាស់បានយូរអង្វែង ស្របទៅនឹងការរីកចម្រើនរបស់សង្គមជាតិ។
ការលើកឡើងបែបនេះក្នុងឱកាសលោក អ៊ុំ រាត្រី អញ្ជើញចុះពិនិត្យមើលផ្លូវក្រាល កៅស៊ូប្រភេទ DBST ប្រវែងជាង ៣.០០០ម៉ែត្រ ទទឹង៤ម៉ែត្រ នៅភូមិសំរោង ភូមិផាស៊ីស្រា និងភូមិ អញ្ចាញ ក្នុងឃុំឫស្សីក្រោក ស្រុកមង្គលបូរី ដែលត្រូវបានស្ថាបនារួចរាល់ជាគម្រោងថវិកាអភិវឌ្ឍន៍ខេត្តឆ្នាំ២០២០ ហើយដាក់ឱ្យប្រជាពលរដ្ឋប្រើប្រាស់កាលពីថ្ងៃអង្គារ ទី ២ ខែមីនា ឆ្នាំ២០២១។
លោក អ៊ុំ រាត្រី បានបញ្ជាក់ថា ជានិច្ចកាលរាជរដ្ឋាភិបាលកម្ពុជាយើង ដែលមានសម្ដេចអគ្គមហាសេនាបតីតេជោ ហ៊ុន សែន ជានាយករដ្ឋមន្ត្រី តែងផ្ដោតសំខាន់បន្តការយក ចិត្តទុកដាក់លើការអភិវឌ្ឍវិស័យផ្លូវថ្នល់ក្នុងនោះមិនថាផ្លូវជាតិ ផ្លូវលំនៅគ្រប់ទីកន្លែងនោះទេ ត្រូវបានស្ថាបនាពីតំបន់ដែលគ្មានផ្លូវ ទៅជាមានផ្លូវ ក្រាលក្រួសក្រហម ប្រែក្លាយទៅជាផ្លូវបេតុង ឬកៅស៊ូ ផ្សាភ្ជាប់ពីទីជនបទមកទីប្រជុំជនខេត្ត ស្រុកក្រុង ដែលឆ្លើយតបទៅនឹងអនុ សាសន៍របស់សម្តេចតេជោ មានផ្លូវ មានក្តីសង្ឃឹម។
លោក អ៊ុំ រាត្រី បានឱ្យដឹងដែរថា អាជ្ញាធរខេត្តបន្ទាយមានជ័យបានបន្តការប្រឹងប្រែងគិតគូរ ជំរុញការស្ថាបនាផ្លូវថ្មី និងជួសជុលឱ្យប្រសើរឡើងវិញ នូវរាល់ផ្លូវដែលរងការខូតខាត នៅតាមទីជនបទដោយកន្លែងខ្លះការស្ថាបនាឡើងដោយចាក់បេតុងក្រាលកៅស៊ូ និងខ្លះ ទៀតជួសជុលដោយក្រាលក្រួសក្រហម ទៅតាមលទ្ធភាពថវិកាដែលយើងមាន ដើម្បីឆ្លើយ តបសេចក្តីត្រូវប្រើប្រាស់របស់ប្រជាពលរដ្ឋ។
ក្នុងឱកាសនោះដែរ អភិបាលខេត្តបន្ទាយមានជ័យ ក៏បានធ្វើការជំរុញឱ្យមន្ទីរសាធារណការ និងដឹកជញ្ជូន មន្ទីរអភិវឌ្ឍន៍ជនបទ រួមសហការជាមួយអាជ្ញាធរដែនដី ត្រូវបន្តយក ចិត្តទុកដាក់ពិនិត្យមើលផ្លូវថ្នល់ដែលរងការខូចខាត ត្រូវប្រញាប់ប្រញាល់ធ្វើការជួសជុល ឡើងវិញ មិនត្រូវទុកចាំដល់ខូចធ្ងន់ធ្ងរនោះទេ។ ជាមួយនោះក៏បានអំពាវនាវដល់ប្រជាពល រដ្ឋនៅទូទាំងខេត្ត សូមឱ្យចូលរួមទាំងគ្នាថែទាំផ្លូវថ្នល់ ដែលបានជួសជុលស្ថាបនាហើយនោះ នៅតាមមូលដ្ឋានឱ្យប្រើប្រាស់បានយូរអង្វែង និងត្រូវបន្តចូលរួមទាំងអស់គ្នាគោរពច្បាប់ចរា ចរណ៍ឱ្យបានខ្ជាប់ខ្ជួន ដើម្បីចៀសផុតពីគ្រោះថ្នាក់ដល់អាយុជីវិត៕
