លោកនាយករដ្ឋមន្រ្ដី ហ៊ុន សែន អំពាវនាវកុំឲ្យរើសអើងចំពោះជនជាតិចិន ទោះបីករណីឆ្លងកូវីដក្នុងសហគមន៍កើតឡើងលើជនជាតិចិនក៏ដោយ
លោកនាយករដ្ឋមន្រ្ដី ហ៊ុន សែន អំពាវនាវកុំឲ្យរើសអើងចំពោះជនជាតិចិន ទោះបីករណីឆ្លងកូវីដក្នុងសហគមន៍កើតឡើងលើជនជាតិចិនក៏ដោយ
ក្រោយផ្ទុះជំងឺកូវីដ-១៩ ក្នុងសហគមន៍ជាថ្មី នៅថ្ងៃទី២០ ខែកុម្ភៈ ឆ្នាំ២០២១នេះ លោកនាយករដ្ឋមន្រ្ដី ហ៊ុន សែន បានអំពាវនាវកុំឲ្យមាន ការរើសអើងចំពោះជនជាតិចិន ទោះបីជាករណីឆ្លងកូវីដ ក្នុងសហគមន៍លើកនេះ កើតឡើងលើជនជាតិចិន នៅកម្ពុជាក៏ដោយ។
ការអំពាវនាវយ៉ាងដូច្នេះ ធ្វើឡើងក្នុងឱកាសដែល លោកនាយករដ្ឋមន្រ្ដី ហ៊ុន សែន ថ្លែងសារពិសេសទៅកាន់ ប្រជាពលរដ្ឋទូទាំងប្រទេស ពាក់ព័ន្ធស្ថានភាពឆ្លងជំងឺកូវីដ-១៩ថ្មី ដែលសម្តេចតេជោហៅថា ជាករណីឆ្លងសហគមន៍២០កុម្ភៈ ហើយក្រសួងបានរកឃើញ ឆ្លងសហគមន៍រហូតដល់៣២ករណី នាព្រឹកថ្ងៃទី២០ ខែកុម្ភៈ ឆ្នាំ២០២១។
លោកនាយករដ្ឋមន្រ្ដី ហ៊ុន សែន បានបញ្ជាក់យ៉ាងដូច្នេះថា «ដោយសារតែបានកើតឡើង (កូវីដ-១៩) ទៅលើជនជាតិចិន សូមកុំឲ្យមានការរើសអើង ទៅលើជនជាតិចិន ដូចកាលពីដើមឆ្នាំ២០២០ ដែលពេលនោះ មានការរើសអើង នៅក្នុងប្រទេសខ្លះ រើសអើងជាមួយជនជាតិចិន»។
លោកនាយករដ្ឋមន្រ្ដី ហ៊ុន សែន បានថ្លែងថា នៅក្នុងប្រទេសកម្ពុជា មានការកើតកូវីដ-១៩ លើគ្រប់ជាតិសាសន៍ ជនជាតិណា ក៏មានកើតកូវីដ-១៩នេះដែរ ដូច្នេះសូមកុំឲ្យមាន ការប្រកាន់រើសអើង ជាពិសេសការរើសអើង លើជនជាតិចិន ដែលទើបឆ្លងកូវីដ-១៩ ក្នុងសហគមន៍ នៅប្រទេសកម្ពុជា។
បន្ថែមពីនោះទៀត លោកនាយករដ្ឋមន្រ្ដី ហ៊ុន សែន ក៏អំពាវនាវដល់តាមបណ្តាខេត្តទាំងអស់ សូមកុំឲ្យមានរើសអើង ចំពោះប្រជាពលរដ្ឋ ដែលរស់នៅរាជធានីភ្នំពេញ ខណៈមានការផ្ទុះកូវីដ-១៩ ក្នុងសហគមន៍ជាថ្មី។
លោកនាយករដ្ឋមន្រ្ដី ហ៊ុន សែន សង្ឃឹមថា ព្រឹត្តិការណ៍ឆ្លង ក្នុងសហគមន៍២០កុម្ភៈ នឹងត្រូវបិទបញ្ចប់ នៅអំឡុងពេល១ខែ នៅពេលប្រជាពលរដ្ឋ និងភាគីពាក់ព័ន្ធទាំងអស់ ចូលរួមសហការ និងអនុវត្តវិធានការ។
សូមបញ្ជាក់ថា ក្រោយផ្ទុះព្រឹត្តិការណ៍ សហគមន៍ ២០កុម្ភៈ រាជរដ្ឋាភិបាលកម្ពុជា បានសម្រេចបិទអគារស្នាក់នៅ ក្លឹបកម្សាន្ដ និងតំបន់ចាំបាច់មួយចំនួន ជាបន្ទាន់ ដើម្បីស្រាវជ្រាវ រកអ្នកប៉ះពាល់ និងពាក់ព័ន្ធ ដើម្បីយកសំណាកធ្វើតេស្ដ និងតម្រូវឲ្យធ្វើចត្ដាឡីស័ក រយៈពេល១៤ថ្ងៃ ៕
