ការព្យាករណ៍៖ សេដ្ឋកិច្ចកម្ពុជានៅឆ្នាំ២០២១ នឹងងើបឡើងវិញ
ការព្យាករណ៍៖ សេដ្ឋកិច្ចកម្ពុជានៅឆ្នាំ២០២១ នឹងងើបឡើងវិញ
សូចនាករសេដ្ឋកិច្ចបានបង្ហាញថា សេដ្ឋកិច្ចកម្ពុជានៅឆ្នាំ២០២១ ត្រូវបានព្យាករថា នឹងងើបឡើងវិញ ហើយរំពឹងថា នឹងសម្រេចបានកំណើនរង្វង់ ៣,៥% ដែលធ្វើឱ្យផលិតផលក្នុងស្រុកសរុប ថ្លៃបច្ចុប្បន្នស្ថិតក្នងរង្វង់ ១១៧ ៩៣៩ ប៊ីលានរៀល សមមូលនឹងប្រមាណ ២៩ ០១៣លានដុល្លារអាម៉េរិក។
សូចនាករសេដ្ឋកិច្ចបានបង្ហាញទៀតថា ស្របពេលដែលផលិតផលក្នុងស្រុកសរុបសម្រាប់មនុស្សម្នាក់ត្រូវបានរំពឹងថា នឹងកើនឡើងដល់ ១ ៧៧១ដុល្លារអាម៉េរិក បើប្រៀបធៀបនឹង ១ ៦៨៣ដុល្លារអាម៉េរិកក្នុងឆ្នាំ២០២០។ ចំណែកឯអត្រាប្តូរប្រាក់រៀលគឺនៅតែបន្តស្ថិតនៅក្នុងរង្វង់ ៤ ០៦៥រៀលក្នុងមួយដុល្លារអាម៉េរិកក្នុងឆ្នាំ២០២១។ ឱនភាពគណនីចរន្តត្រូវបានព្យាករថា នឹងរួមតូចបន្តិចមកត្រឹម ១៧,៣% នៃផលិតផលក្នុងស្រុកសរុប ដោយសារការរំពឹងនៃការងើបឡើងវិញសន្សឹមៗនូវការនាំចេញ និង វិស័យទេសចរណ៍។ ទុនបម្រុងអន្តរជាតិសរុប ត្រូវបានរំពឹងថា នឹងកើនឡើងដល់ ១៦ ៩៨១លានដុល្លារអាម៉េរិក។
ក្នុងសុន្ទរកថា បើកវេទិកាសាធារណៈស្តីពី «ការគ្រប់គ្រងម៉ាក្រូសេដ្ឋកិច្ច និងច្បាប់ថវិកាឆ្នាំ២០២១» នៅថ្ងៃទី២៧ ខែមករា ឆ្នាំ២០២១ លោក វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ បានថ្លែងថា កម្ពុជានឹងក្លាយជាកន្លែងទាក់ទាញវិនិយោគមួយធំនៅពេលមានវ៉ាក់សាំងកូវីដ-១៩ ចាក់ជូនប្រជាជនពីការយាយីដោយសារជំងឺនេះ។
លោក វង្សី វិស្សុត បានសង្កត់ធ្ងន់ថា កម្ពុជាអាចទាក់ទាញការវិនិយោគឡើងវិញព្រោះកម្ពុជាមានវិធានការច្បាស់លាស់ក្នុងការទប់ស្កាត់ការរីករាលដាលនៃជំងឺកូវីដ-១៩ កន្លងមកបានជោគជ័យដែលជាការផ្តល់ទំនុកចិត្តដល់អ្នកវិនិយោគ។«គេឃើញកម្ពុជាជាតំបន់មួយមានសុវត្ថិភាពផ្នែកជំងឺកូវីដ»។
ទន្ទឹមនេះ រាជរដ្ឋាភិបាលកម្ពុជា កំពុងស្វះស្វែងរកទិញវ៉ាក់សាំង និងស្នើសុំជំនួយវ៉ាក់សាំងពីប្រទេសនានាដើម្បីចាក់ជូនប្រជាពលរដ្ឋកម្ពុជាដោយមិនគិតថ្លៃ និងតាមគោលការណ៍ស្ម័គ្រចិត្ត។
បើតាមរដ្ឋលេខាធិការរូបនេះ រាជរដ្ឋាភិបាលកម្ពុជា នឹងចាប់ផ្តើមចាក់វ៉ាក់សាំងជូនប្រជាពលរដ្ឋនៅក្នុងខែកុម្ភៈ ឬខែមីនាខាងមុខនេះ៕
