មូលនិធិត្រីចក្រយានកម្ពុជា ផ្តល់អំណោយសប្បុរសធម៌ជូនដល់អ្នកប្រកបរបរធាក់ស៊ីក្លូចំនួន ៣០៦នាក់
បងប្អូន និងលោកតា ដែលជាអ្នកប្រកបរបរធាក់ស៊ីក្លូ ក្នុងរាជធានីភ្នំពេញ ចំនួន ៣០៦នាក់ បានទទួលអំណោយពីមូលនិធិត្រីចក្រយានកម្ពុជា ( ស៊ីក្លូ ) នៅសាលារាជធានីភ្នំពេញ កាលពីចុងសប្ដាហ៍កន្លងមកនេះ ក្រោមអធិបតីភាពលោក ឃួង ស្រេង អភិបាលរាជធានីភ្នំពេញ និងជាប្រធានក្រុមប្រឹក្សាមូលនិធិត្រីចក្រយានកម្ពុជា។
លោក ឃួង ស្រេង បានមានប្រសាសន៍ថា លោកនាយករដ្ឋមន្ត្រី ហ៊ុន សែន បានផ្តួចផ្តើមឱ្យមានមូលនិធិនេះឡើង សំដៅអភិរក្សស៊ីក្លូដែលមានដើមកំណើតតាំងពីសម័យអាណានិគមនិយមបារាំង។ កន្លងមក បងប្អូនអ្នកប្រកបរបរធាក់ស៊ីក្លូក្នុងរាជធានីភ្នំពេញ ចំនួន ៣០៦នាក់ បានទទួលអំណោយពីមូលនិធិត្រីចក្រយានកម្ពុជា ព្រមទាំងមានអំណោយពេលបុណ្យទានផ្សេងៗ រួមទាំងការផ្តល់ជាឯកសណ្ឋានអ្នកធាក់ស៊ីក្លូ និងប័ណ្ណ ប.ស.ស. ដើម្បីឱ្យបងប្អូនទៅព្យាបាលជំងឺដោយមិនអស់ប្រាក់។
លោកអភិបាលរាជធានីភ្នំពេញ បានបន្តថា នេះជាការយកចិត្តទុកដាក់ដ៏ខ្ពង់ខ្ពស់របស់ លោកនាយករដ្ឋមន្ត្រី ហ៊ុន សែន។ គោលបំណងសំខាន់ ក្នុងការបង្កើតឱ្យមានមូលនិធិត្រីចក្រយានកម្ពុជានេះឡើង គឺដើម្បីរួមចំណែកជួយសម្រួលការលំបាករបស់បងប្អូន ដោយគិតគូរពីសុខភាព ជីវភាពរស់នៅរបស់បងប្អូនអ្នកប្រកបរបរធាក់ស៊ីក្លូ និងដើម្បីរួមចំណែកលើកស្ទួយ អភិរក្ស និងអភិវឌ្ឍន៍ស៊ីក្លូ ដែលមានជាយូរមកហើយឱ្យបានគង់វង្សកុំឱ្យបាត់បង់ ។ លោកក៏បានក្រើនរម្លឹកដល់បងប្អូនដែលប្រកបរបរធាក់ស៊ីក្លូ ដែលភាគច្រើនមានវ័យចំណាស់ ឱ្យថែរក្សាសុខភាពប្រកាន់ខ្ជាប់នូវគោលការណ៍ ហូបស្អាត ផឹកស្អាត និងរស់នៅស្អាត។ ជាពិសេស ការពារខ្លួនពីការរីករាលដាលនៃជំងឺកូវីដ-១៩ ត្រូវលាងដៃឱ្យបានញឹកញាប់ជាមួយសាប៊ូ អាល់កុល ឬជែល ហើយពាក់ម៉ាសជាប្រចាំ នៅពេលមានមនុស្សច្រើន អនុវត្តន៍តាមការណែនាំរបស់ក្រសួងសុខាភិបាល និងរាជរដ្ឋាភិបាល។
លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ និងជាប្រធាន លេខាធិការដ្ឋាន មូលនិធិត្រីចក្រយានកម្ពុជា បានឱ្យដឹងថា អំណោយដែលបងប្អូនអ្នកប្រកបរបរធាក់ស៊ីក្លូទាំង ៣០៦នាក់ ក្នុងម្នាក់ៗទទួលបាន មី១កេស , ម៉ាស១ប្រអប់ និងភួយមួយ។ លោកបានបន្តឱ្យដឹងថា មូលនិធិនេះត្រូវបានបង្កើតឡើងតាំងពីថ្ងៃទី១៨ ខែមករា ឆ្នាំ២០១៨ គឺមានរយៈពេលជាង ៣ឆ្នាំមកហើយ ក្រោមការផ្តួចផ្តើមដ៏ខ្ពង់ខ្ពស់របស់លោកនាយករដ្ឋមន្ត្រី ហ៊ុន សែន ហើយលោកក៏ជាប្រធានកិត្តិយស, លោក ឃួង ស្រេង អភិបាលរាជធានីភ្នំពេញ ជាប្រធានក្រុមប្រឹក្សាមូលនិធិនេះ។
លោក ម៉េត មាសភក្តី បន្តថា មូលនិធិត្រីចក្រយានកម្ពុជា តែងបានផ្តល់ជូនថវិកាទ្រទ្រង់ (របបឧបត្ថម្ភ) ដល់បងប្អូនអ្នកប្រកបរបរធាក់ស៊ីក្លូទាំង ៣០៦នាក់ ក្នុងម្នាក់ៗ ៧ម៉ឺនរៀលក្នុងរយៈពេល១០ថ្ងៃ ស្មើនឹង២១ម៉ឺនរៀលក្នុងមួយខែ។
សូមបញ្ជាក់ដែរថា ក្នុងនោះបងប្អូន លោកតា ដែលប្រកបរបរធាក់ស៊ីក្លូ ដែលភាគច្រើនមានវ័យចំណាស់ ខ្លះអាយុ ៨៣ឆ្នាំ ខ្លះអាយុ ៨៧ឆ្នាំ និងលោកតា អាយុ៩០ឆ្នាំ នៅមានសុខភាពល្អ អត់មានកូន និងប្រពន្ធ ដូចនេះមានតែធាក់ស៊ីក្លូចិញ្ចឹមជីវិត៕