ខ្មែរប៉ុស្ដិ៍ Close

យី! ប្រទេស​ ៧ នេះ ម៉េចក៏គ្មានរបស់ទាំងនេះទៅវិញ

ដោយ៖ សន ប្រាថ្នា ​​ | ថ្ងៃសៅរ៍ ទី២៨ ខែមេសា ឆ្នាំ២០១៨ ព័ត៌មានទូទៅ 937
យី! ប្រទេស​ ៧ នេះ ម៉េចក៏គ្មានរបស់ទាំងនេះទៅវិញយី! ប្រទេស​ ៧ នេះ ម៉េចក៏គ្មានរបស់ទាំងនេះទៅវិញ

នៅ​លើ​ពិភពលោក​ទាំង​មូល​មាន​ជិត ២០០ ប្រទេស ក្នុងនោះយើង​តែង​ឮរឿងរ៉ាវ​ប្លែកៗ​កើត​ឡើង​ជុំវិញ​ផែនដី​នេះ។

ខាង​ក្រោម​នេះ​គឺ​ជា​ប្រទេស​ចំនួន​៧ ដែល​គ្មាន​របស់​ពុំ​គួរ​គ្មាន៖

៧ គ្មាន​កងទ័ព (ប្រទេស​កូស្តារីកា)

គ្រប់​ប្រទេស​ទាំង​អស់​តែង​ព្យាយាម​អភិវឌ្ឍ​វិស័យ​យោធា​របស់​ខ្លួន​ពី​មួយ​ថ្ងៃ​ទៅ​មួយ​ថ្ងៃ​ដើម្បី​ត្រៀម​ទុក​ការពារ​ខ្លួន ឬ ប្រយុទ្ធ។ ប៉ុន្តែ កូស្តារីកា ជា​ប្រទេស​មួយ​ដែល​គ្មាន​យោធា​តាំង​ពី​ឆ្នាំ​១៩៤៨​មក​ម្ល៉េះ។

នៅ​ពេល​នោះ​លោក​ប្រធានាធិបតី Jose Figueres Ferrer កែប្រែ​រដ្ឋធម្មនុញ្ញ​ថ្មី​ដែល​យោធា​ត្រូវ​​គេ​លុប​បំបាត់​ចោល​ ហើយ​​ទុក​លុយ​ទាំង​នេះ​ទៅ​អភិវឌ្ឍ​ន៍វិស័យ​ អប់រំ វប្បធម៌ សុខាភិបាល ក៏​ដូច​ជា​ការ​កែ​លម្អកម្លាំង​ប៉ូលិស។

៦ គ្មាន​រដ្ឋាភិបាល ( បែលហ្សិក)

តម្រូវការ​ចាំបាច់​សម្រាប់​រដ្ឋ​អធិបតេយ្យភាព​ គឺ​ត្រូវ​មាន​រដ្ឋាភិបាល​គ្រប់គ្រង​កិច្ចការ​ទាំង​អស់។ ក្នុង​ឆ្នាំ ២០១១ បែលហ្សិក បាន​បំបែក​ឯតទគ្គកម្ម​ពិភពលោក​ដោយសារ​តែ​ប្រទេស​នេះ​គ្មាន​រដ្ឋាភិបាល​ផ្លូវការ​អស់​រយៈ​ពេល​យូរ​បំផុត សរុប ៥៨៩ ថ្ងៃ​ដោយ​គ្មាន​រដ្ឋាភិបាល​ដឹកនាំ។ បែលហ្សិក​អនុវត្ត​នយោបាយ​​មាន​លក្ខណៈ​វិមជ្ឈការ​យ៉ាង​ខ្ជាប់ខ្ជួន ដែល​​រដ្ឋាភិបាល​បាន​ផ្ទេរ​អំណាច និងធនធាន​ឲ្យ​ទៅ​រដ្ឋបាល​ថ្នាក់​ក្រោម​ជាតិ​ជា​អ្នក​​អនុវត្ត ហេតុ​ដូច្នេះ​បើ​ទោះ​ជា​ប្រទេស​នេះ​គ្មាន​រដ្ឋាភិបាល ក៏​ដំណើរ​ការ​ដឹកនាំ​ប្រទេស​ប្រព្រឹត្ត​ទៅ​ជា​ប្រក្រតី។

៥ គ្មាន​បំណុល​បរទេស (ប្រ៊ុយណេ)

អាមេរិក​ជា​មហា​អំណាច​ជំពាក់​បំណុល​គេ​ច្រើន​ជាង​គេ បំណុល​កើន​ដល់​ជិត ២០​ ទ្រីលាន (២០ ០០០ ០០០ ០០០ ០០០​ដុល្លារ) ខណៈ​ដែល​បំណុល​សរុប​ទាំង​អស់​របស់​ពិភពលោក​មាន​ប្រមាណ ៧៦ ទ្រីលាន ដុល្លារ​អាមេរិក។ ដោយឡែកប្រ៊ុយណេ​ដែល​ជា​ប្រទេស​តូច​មួយ​នៅ​អាស៊ីអាគ្នេយ៍ មិន​ជំពាក់​បំណុល​គេ​សូម្បី​មួយ​រៀល។

តើ​ប្រទេស​នេះ​អាច​ជៀស​ពី​បំណុល​បរទេស​​តាម​របៀប​ណា? ពាក្យ​២​ម៉ាត់​គឺ “ឧស្ម័ន” និង “ប្រេង” ដែល​ជា​ទ្រព្យសម្បត្តិ​​មិន​ចេះ​រីង​ស្ងួត​របស់​កូន​ប្រទេស​តូច​មួយ​នេះ។ បន្ទាប់​ពី​ទទួល​បាន​ឯករាជ្យ​ពី​ចក្រភពអង់គ្លេស​នៅ​ឆ្នាំ ១៩៨៤ ប្រ៊ុយណេ​​អភិវឌ្ឍ​ន៍យ៉ាង​លឿន​មិន​គួរ​ឲ្យ​ជឿ។

៤ គ្មាន​បទ​ភ្លេង​គោរព​ទង់​ជាតិ (សាធារណរដ្ឋ​ស៊ីប្រ៊ូស)

សាធារណរដ្ឋ​ស៊ីប្រ៊ូស (Republic of Cyprus) គ្មាន​ភ្លេង​ជាតិ​ផ្ទាល់​ខ្លួន​ឡើយ។ ប្រទេស​នេះ​បាន​យក​​បទ​ភ្លេង​គោរព​ទង់ជាតិ​របស់​ក្រិក មក​ធ្វើ​ជា​​ភ្លេង​ជាតិ​របស់​ខ្លួន។ បទ​ភ្លេង​ជាតិ “Hymn to Liberty ឬបទ​ចម្រៀង​ដើម្បី​សេរីភាព” របស់​ក្រិក​​មាន​១៥៨​ឃ្លា ដែល​ជា​ភ្លេង​ជាតិ​វែង​ជាង​គេ​បំផុត​នៅ​លើ​ពិភពលោក​។

៣ ភ្លេង​ជាតិ​ដែល​គ្មាន​សូម្បី​មួយ​តួ​អក្សរ (អេស្ប៉ាញ)

​ថ្វី​បើ​​សាធារណរដ្ឋ​ស៊ីប្រ៊ូស បាន​យក​ភ្លេង​ជាតិ​ប្រទេស​គេ​មក​ធ្វើ​ជា​បទភ្លេង​គោរព​ទង់​ជាតិ​របស់​ខ្លួន អេស្ប៉ាញ ក៏​ស្រដៀង​នោះ​ដែរ។ ប្រសិន​បើ​លោក​អ្នក​​មើល​ការ​ប្រកួត​ World Cup ហើយ​កាមេរ៉ា​អូស​ទៅ​លើ​កីឡាករ​​នៅ​ពេល​គោរព​ទង់​ជាតិ នោះ​លោក​អ្នក​នឹង​ឃើញ​បបូរ​មាត់​ពួកគេ​មិន​កម្រើក​សូម្បី​បន្តិច ព្រោះ​ពួកគេ​គឺ​ជា​ជនជាតិ​អេស្ប៉ាញ។

ភ្លេង​ជាតិ​របស់​អេស្ប៉ាញ “Marcha Real ឬ ហៅ​តាម​ភាសា​អង់គ្លេស Royal March” មិន​មាន​ទំនុក​ច្រៀង​ទេ តាំង​ពី​ឆ្នាំ ១៩៧៨​ មក​ម្ល៉េះ។ ប៉ុន្តែ​កាល​ពី​មុន​ភ្លេង​ជាតិ​មាន​ពាក្យ​សម្រាប់​ច្រៀង​ប៉ុន្តែ​ពាក្យពេចន៍​ទាំង​នោះ​ត្រូវ​បាន​គិត​ថា​ជា “ហ្វាស៊ីស” ក្នុង​របប​ផ្តាច់ការ ម្ល៉េះហើយ​ក៏​សម័យ​ក្រោយ​មក​សម្រេច​ថា​មិន​ប្រើ​ពាក្យ​តែ​ម្តង។

​២ គ្មាន​ស្មៅ (Greenland)

បើ​ទោះ​ជា​មាន​ឈ្មោះ​ថា Greenland ប៉ុន្តែ​ប្រទេស​នេះ​មិន​មាន​ពណ៌​បៃតង​ដូច​ឈ្មោះ​​ឡើយ គ្មាន​ឡើយ​ស្មៅ​នៅ​ប្រទេស​នេះ។ Greenland ដែល​ជា​តំបន់​ស្វយ័ត​ពី​ប្រទេស​ដាណឺម៉ាក​គ្មាន​ស្មៅ​ ដោយ​សារ​​លក្ខខណ្ឌ​អាកាសធាតុ​ត្រជាក់​ខ្លាំង ព្រោះ​នៅ​ចន្លោះមហាសមុទ្រ​អាត្លង់ទិច និងមហាសមុទ្រ​អាកទិច។ ដោយសារ​គ្មាន​ស្មៅ​ដូច្នោះ​ហើយ ទើប​ប្រទេស​នេះ​មាន​ការ​លំបាក​ក្នុង​ការ​បញ្ចុះ​បញ្ចូល FIFA ក្នុង​ការ​ជ្រើស​យក​ជា​ម្ចាស់ផ្ទះ​ក្នុង​ការ​ប្រកួត​បាល់ទាត់។

១ គ្មាន​មូស (ប្រទេសអ៊ីស្លង់)

សត្វ​មូស​គឺ​ជា​សត្វ​ដែល​សម្លាប់​មនុស្ស​ច្រើន​បំផុត​នៅ​លើ​ពិភពលោក។ ត្រី​ឆ្លាម​សម្លាប់​មនុស្ស​ត្រឹមតែ ១០ នាក់​ប៉ុណ្ណោះ​ក្នុង​មួយ​ឆ្នាំៗ ដំរី​ទឹក​សម្លាប់​មនុស្ស ៥០០ នាក់​ ឆ្កែ​សម្លាប់​មនុស្ស​ប្រមាណ ២៥ ០០០ និង ពស់​សម្លាប់​មនុស្ស​ប្រហែល ៥០ ០០០ ក្នុង​មួយ​ឆ្នាំៗ។ ប៉ុន្តែ​មូស​​សម្លាប់​មនុស្ស​ច្រើន​ជាង​គេ​បំផុត​​លើ​លោក ប្រហែល ៧២៥ ០០០ នាក់​ក្នុង​មួយ​ឆ្នាំៗ។ នេះ​បើ​តាម វិបសាយ Listverse។

មូស​ជា​សត្វ​ដែល​ខ្លាច​អាកាសធាតុ​ត្រជាក់ ប៉ុន្តែ Greenland ដែល​ត្រជាក់​ខ្លាំង​នៅ​តែ​មាន​មូស ចម្លែក​តែ​ប្រទេស​អ៊ីស្លង់ (Iceland) គ្មាន​ឡើយ​សត្វ​មូស៕

ប្រភព៖ Sabay