លោកនាយករដ្ឋមន្រ្តី ហ៊ុន សែន៖ បុរសជនជាតិខ្មែរអាយុ៣៨ឆ្នាំ ដែលផ្ទុកមេរោគកូរ៉ូណា នៅខេត្តសៀមរាបនោះ ពេលនេះមានសុខភាពល្អធម្មតា
លោកនាយករដ្ឋមន្រ្តី ហ៊ុន សែន៖ បុរសជនជាតិខ្មែរអាយុ៣៨ឆ្នាំ ដែលផ្ទុកមេរោគកូរ៉ូណា នៅខេត្តសៀមរាបនោះ ពេលនេះមានសុខភាពល្អធម្មតា
លោកនាយករដ្ឋមន្រ្តី ហ៊ុន សែន បានថ្លែងថា បុរសជនជាតិខ្មែរ ដែលរកឃើញ ផ្ទុកមេរោគកូរ៉ូណា នៅខេត្តសៀមរាបនោះ ពេលនេះមានសុខភាពល្អធម្មតា មិនទ្រុឌទ្រោមឡើយ ខណៈមន្រ្តីជំនាញកំពុងយកសំណាក អ្នកដែលធ្លាប់មានទំនាក់ទំនង ជាមួយបុរសជនជាតិជប៉ុន ដែលផ្ទុកជំងឺកូវីដ-១៩ទៅពិនិត្យជាបន្តទៀត។ លោកបានថ្លែងដូចនេះនៅព្រឹកថ្ងៃទី១០ ខែមីនា ឆ្នាំ២០២០ ក្នុងពិធីប្រគល់សញ្ញាបត្រជូននិស្សិតនៃវិទ្យាស្ថានវ៉ាន់ដា ដែលធ្វើឡើង នៅមជ្ឈមណ្ឌលកោះពេជ្រ រាជធានីភ្នំពេញ។
លោកនាយករដ្ឋមន្រ្តី ហ៊ុន សែន ក៏បានអំនាវនាវកុំឲ្យ មានការរើសអើង ដល់អ្នកសៀមរាបឲ្យសោះ ជាពិសេសមិនត្រូវរើសអើង ចំពោះជនជាតិខ្មែរ និងជនបរទេសឡើយ ស្របពេលអ្នកទេសចរបរទេស កំពុងបន្តដំណើរកម្សាន្ត ធម្មតានៅសៀមរាប។ លោកនាយករដ្ឋមន្រ្តី ហ៊ុន សែន ក៏បានបញ្ជាក់សារជាថ្មីម្តងទៀតថា ការរើសអើង និងការភ័យខ្លាចគ្រោះថ្នាក់ជាងជំងឺកូវីដ-១៩ទៅទៀត។
គួរបញ្ជាក់ថា ក្នុងពេលថ្មីៗនេះ ក្រុមគ្រួសាររបស់បុរសអាយុ៣៨ឆ្នាំនោះ បានចេញមុខតាមវីដេអូឃ្លីបថា ពួកគាត់មានសុខភាពល្អ មិនមានការឆ្លងជំងឺនេះឡើយ៕
