ខ្មែរប៉ុស្ដិ៍ Close

រដ្ឋមន្ត្រីទេសចរណ៍ជួបពិភាក្សាការងារជាមួយប្រធានគណៈមេធាវីកម្ពុជាដើម្បីពង្រឹងការគ្រប់គ្រងនិងការអនុវត្តច្បាប់ស្តីពីទេសចរណ៍

ដោយ៖ សន ប្រាថ្នា ​​ | ថ្ងៃពុធ ទី១៩ ខែកុម្ភៈ ឆ្នាំ២០២០ ព័ត៌មានទូទៅ 563
រដ្ឋមន្ត្រីទេសចរណ៍ជួបពិភាក្សាការងារជាមួយប្រធានគណៈមេធាវីកម្ពុជាដើម្បីពង្រឹងការគ្រប់គ្រងនិងការអនុវត្តច្បាប់ស្តីពីទេសចរណ៍រដ្ឋមន្ត្រីទេសចរណ៍ជួបពិភាក្សាការងារជាមួយប្រធានគណៈមេធាវីកម្ពុជាដើម្បីពង្រឹងការគ្រប់គ្រងនិងការអនុវត្តច្បាប់ស្តីពីទេសចរណ៍

លោក ថោង ខុន រដ្ឋមន្រ្តីក្រសួងទេសចរណ៍ និងប្រតិភូក្រសួង នាព្រឹកថ្ងៃទី១៩ ខែកុម្ភៈ ឆ្នាំ២០២០ នៅទីស្តីការក្រសួងទេសចរណ៍ បានទទួលជួបពិភាក្សាការងារជាមួយប្រតិភូនៃគណៈមេធាវិនៃព្រះរាជាណាចក្រកម្ពុជា ដឹកនាំដោយលោក សួន វិសាល ប្រធានគណៈមេធាវី ក្នុងគោលបំណងដើម្បីធានានូវសង្គតិភាព និងសុខដុមនីយកម្មនៃវិធានច្បាប់ ធានានូវនិត្យានុកូលភាព និងការដោះស្រាយសម្របសម្រួលវិវាទទេសចរណ៍ ការពង្រឹង និងបង្កើនល្បឿនអភិបាលកិច្ចល្អក្នុងទិសដៅចូលរួមចំណែកពង្រឹងនីតិរដ្ឋនិងលើកកម្ពស់វប្បធម៌នៃការគោរពច្បាប់ និងជំរុញការអនុវត្តច្បាប់។

ក្នុងជំនួបពិភាក្សានេះ លោករដ្ឋមន្ត្រី បានលើកឡើងអំពីស្ថានភាពភាពទេសចរណ៍សកលលោក តំបន់ និងទេសចរណ៍កម្ពុជា ពិសេសក្នុងដំណាក់កាលនៃវិបត្តិជំងឺ Covid-19 ដែលទាំងអស់គ្នាត្រូវរួមសាមគ្គីគ្នា (ដោយគ្មានការរើសអើងចំពោះជនជាតិចិន) ដើម្បីទប់ទល់នឹងវិបត្តិ និងចាត់វិធានការបន្ទាន់នានាដើម្បីជម្រុញសកម្មភាពទេសចរណ៍ និងស្រោចស្រង់ឧស្សាហកម្មទេសចរណ៍។ លោកក៏បានលើកឡើងពីការខិតខំរបស់ក្រសួងក្នុងការពង្រឹងការគ្រប់គ្រង និងអនុវត្តច្បាប់ស្តីពីទេសចរណ៍ ដែលក្នុងនោះក៏សង្កេតឃើញមានបុគ្គលមួយចំនួនបានប្រព្រឹត្តសកម្មភាពល្មើសនឹងច្បាប់ និងលិខិតបទដ្ឋានគតិយុត្តទេសចរណ៍ ដូចជា ការលក់វត្ថុអនុស្សាវរីយ៍ក្លែងក្លាយដល់ទេសចរ និងការផ្សព្វផ្សាយព័តមាន រូបភាព និងខ្លឹមសារអវិជ្ជមានពីទេសចរណ៍កម្ពុជាតាមបណ្តាញផ្សព្វផ្សាយសង្គម នានា ដែលខុសការពិត និងជាហេតុធ្វើឲ្យប៉ះពាល់ដល់កិត្យានុភាពជាតិ និងគោលនយោបាយទេសចរណ៍ជាតិក្នុងការទាក់ទាញទេសចរមកទស្សនាកម្ពុជាឲ្យកាន់តែច្រើនថែមទៀត។

លោករដ្ឋមន្ត្រី បានស្នើសុំឲ្យគណៈមេធាវិកម្ពុជា ជួយដល់ក្រសួងលើការងារសំខាន់មួយចំនួន ដូចជា៖
ទី១. ជួយប្រឹក្សាយោបល់ផ្នែកច្បាប់ដល់ក្រសួងទេសចរណ៍ក្នុងការដោះស្រាយ និងសម្របសម្រួលវិវាទទេសចរណ៍ ទី២.ជួយរៀបចំបង្កើតច្បាប់ស្តីពីមគ្គុទ្ទេសក៍ទេសចរណ៍ ទី៣.ជួយសិក្សាភាពចន្លោះប្រហោងនៃច្បាប់ស្តីពីទេសចរណ៍ និងលិខិតបទដ្ឋានគតិយុត្តទេសចរណ៍។

ជាការឆ្លើយតប ប្រធានគណៈមេធាវី បានឯកភាពទទួលយកនូវសំណើដែលបានលើកឡើងដោយឯកឧត្តមរដ្ឋមន្ត្រីក្រសួងទេសចរណ៍ ហើយនឹងបន្តកិច្ចសហការល្អជាមួយក្រសួងដើម្បីពង្រឹងការគ្រប់គ្រងវិស័យទេសចរណ៍ និងការអនុវត្តច្បាប់ស្តីពីទេសចរណ៍ឲ្យកាន់តែមានប្រសិទ្ធភាព៕

អត្ថបទទាក់ទង