ថវិកាជាង១លានដុល្លារ បានមកពីការដកកម្រៃពីសំបុត្រចូលទស្សនាតំបន់អង្គរ ត្រូវបានប្រគល់ជូនមន្ទីរពេទ្យគន្ធបុប្ផា !
ថវិកាជាង១លានដុល្លារ បានមកពីការដកកម្រៃពីសំបុត្រចូលទស្សនាតំបន់អង្គរ ត្រូវបានប្រគល់ជូនមន្ទីរពេទ្យគន្ធបុប្ផា !មន្ទីរពេទ្យគន្ធបុប្ផា ទើបទទួលបានថវិកា ១,០៨៦,៣៦៨ដុល្លារសហរដ្ឋអាមេរិក ពីមូលនិធិគន្ធបុប្ផាកម្ពុជា។ ថវិកាជាង១លានដុល្លារនេះ បានពីការដកកម្រៃពីសំបុត្រចូលទស្សនាតំបន់អង្គរ នៅត្រីមាសទី៤ នៃឆ្នាំ២០១៩។
ជាមួយនឹងការប្រគល់ជូនថវិកាជាង១លានដុល្លារនេះដល់មន្ទីរពេទ្យគន្ធបុប្ផា មូលនិធិគន្ធបុប្ផាកម្ពុជា ក៏បានថ្លែងអំណរគុណដល់គ្រឹះស្ថានអង្គរ និងស្វាគមន៍រាល់ការបរិច្ចាគទាំងអស់ ទៅតាមលទ្ធភាព និងបន្តលើកទឹកចិត្តដល់សាធារណជន ព្រមទាំងស្ថាប័នរដ្ឋ និងឯកជននានា មេត្តាចូលរួមបរិច្ចាគជាមួយ មូលនិធិគន្ធបុប្ផាកម្ពុជា។
សូមជម្រាបថា មូលនិធិគន្ធបុប្ផាកម្ពុជា ត្រូវបានបង្កើតឡើងនាខែមេសា ឆ្នាំ២០១៨ ដោយមានលោកនាយករដ្ឋមន្ត្រី ហ៊ុន សែន និងលោកស្រី ជាស្ថាបនិក និងជាប្រធានកិត្តិយស ហើយទឹកប្រាក់ដែលមូលនិធិទទួលបានទាំងអស់ ត្រូវទុកសម្រាប់ទ្រទ្រង់នូវកិច្ចដំណើរការ ប្រកបដោយចីរភាព ប្រសិទ្ធភាព និងគុណភាពរបស់មន្ទីរពេទ្យគន្ធបុប្ផាទាំង៥ទីតាំង ដើម្បីលើកកម្ពស់សុខុមាលភាពរបស់កុមារ និងទារកនៅកម្ពុជា៕
