ការកំណត់យកថ្ងៃ ៩ វិច្ឆិកា ធ្វើរដ្ឋប្រហារផ្តួលរំលំរាជរដ្ឋាភិបាល គឺជារឿងឆោតល្ងង់ ពីព្រោះថ្ងៃ ៩ វិច្ឆិកា ជាថ្ងៃបុណ្យឯករាជ្យជាតិ
ការកំណត់យកថ្ងៃ ៩ វិច្ឆិកា ធ្វើរដ្ឋប្រហារផ្តួលរំលំរាជរដ្ឋាភិបាល គឺជារឿងឆោតល្ងង់ ពីព្រោះថ្ងៃ ៩ វិច្ឆិកា ជាថ្ងៃបុណ្យឯករាជ្យជាតិ
លោកនាយករដ្ឋមន្រ្តី ហ៊ុន សែន បានលើកឡើងថា អតីតមេបក្សប្រឆាំងពីមុន តែឥទ្បូវក្លាយខ្លួនទៅជាមេចលនាឧទ្ទាមក្រៅច្បាប់ហើយ គឺបានឆ្លងផុតបន្ទាត់ក្រហមដែលច្បាប់បានកំណត់ទោស មេឧទ្ទាមបានស្រែកផ្តេសផ្តាស ដើររកប្រមូលថវិកាដោយភូតកុហក យកលុយមកទ្រទ្រង់ចិញ្ចឹមកងទ័ពដើម្បីផ្តួលរំលំរាជរដ្ឋាភិបាលស្របច្បាប់ដែលកំណត់យកនៅថ្ងៃធ្វើរដ្ឋប្រហារនៅថ្ងៃ៩ ខែវិច្ឆិកា ឆ្នាំ២០១៩ខាងមុខនេះ។
លោកនាយករដ្ឋមន្ត្រី ថ្លែងបន្តថា អ្នកមានលុយឆោតចេះតែជឿពាក្យភូតភរកុហក បោកប្រាស់នៅបន្តផ្តល់លុយរបស់ខ្លួន អោយចូលទៅក្នុងប្រាក់ហោប៉ៅរបស់មេឧទ្ទាម នោះទៀតទៅ។ លោក ថ្លែងផ្ផ្តាំទៅមេឧទ្ទាមចូលមកកម្ពុជា ឱ្យលឿន បើអាចធ្វើទៅបាន គឺចាប់ខ្លួនរូបលោក តែម្តងទៅ កុំនិយាយដល់សកម្មភាពចាប់ទន្លាក់ព្រះមហាក្សត្រខ្មែរ ប្តូររបបរាជានិយមចោល។ លោកនាយករដ្ឋមន្ត្រី បានថ្លែងដូចនេះនៅព្រឹកថ្ងៃទី០៧ ខែតុលា ឆ្នាំ២០១៩នេះ នៅក្នុងពិធីជួបសំណេះសំណាលជាមួយសិស្សនិទ្ទេស A ឆ្នាំ២០១៩ ទូទាំងប្រទេស ៤៤៣នាក់ នៅវិមានសន្តិភាព រាជធានីភ្នំពេញ។
លោកនាយករដ្ឋមន្រ្តី ហ៊ុន សែន បានបញ្ជាក់បន្ថែមថា មេឧទ្ទាមរើសយកថ្ងៃទី៩ វិច្ឆិកា ជាថ្ងៃធ្វើរដ្ឋប្រហារនោះ គឺជាការអំពើដ៏ឆោតល្ងង់ខ្លាំងណាស់ដោយសារថ្ងៃនោះគឺជាថ្ងៃបុណ្យឯករាជ្យជាតិផង ហើយក៏ជាថ្ងៃកំណើតកងយោធពលខេមរភូមិន្ទផងដែរ។ លោកនាយករដ្ឋមន្ត្រី បានបន្តថា ក្រុមប្រឆាំងអះអាងថា តាមការស្ទង់មតិមានកងកម្លាំងប្រដាប់អាវុធ ៦៥%ដែលគាំទ្រពួកគេ ដែលនេះជាមូលហេតុដែលលោកនាយករដ្ឋមន្រ្តីទទូចឱ្យចូលមកចាប់លោកឱ្យលឿនមុនថ្ងៃកំណត់នោះផងដែរ។ បើតាមភាពជាក់ស្តែងដែលជាការគាំទ្ររបស់បងប្អូនសាធារណមតិនៅលើបណ្តាញសង្គម បានកំពុងរងចាំថ្ងៃជួបជុំគ្រួសារ សាច់ញាតិ សប្បាយរីករាយ ក្នុងការពិសារអំបុកការពារជាតិ សាសនា ព្រះមហាក្សត្រ នៅថ្ងៃ៩វិច្ឆិកា ទាំងអស់គ្នា។
