លោក សាយ សំអាល់៖ វីរភាពរបស់កងទ័ពមិនអាចកាត់ថ្លៃ ការពារបូរភាពទឹកដី ហ៊ានលះបង់ពេលវេលាគ្រួសារ និងជីវិតដើម្បីជាតិ
លោក សាយ សំអាល់៖ វីរភាពរបស់កងទ័ពមិនអាចកាត់ថ្លៃ ការពារបូរភាពទឹកដី ហ៊ានលះបង់ពេលវេលាគ្រួសារ និងជីវិតដើម្បីជាតិនៅរសៀលថ្ងៃទី៧ ខែកក្កដា ឆ្នាំ ២០១៩ លោក សាយ សំអាល់ រដ្ឋមន្ត្រីក្រសួងបរិស្ថាន បានជួបសំណេះសំណាលសួរសុខទុក្ខអង្គភាពសម្ព័ន្ធមេត្រីភាព ជាមួយនាយទាហាន នាយទាហានរង និងពលទាហាន នៅយោធភូមិភាគទី១ ដោយមានការចូលរួមពីកងពលតូចលេខ១២៨ វរៈការពារព្រំដែនលេខ៧០១ បញ្ជាការកងវិស្វកម្ម និងមន្ត្រីឧទ្យានុរក្សនៃមន្ទីរបរិស្ថាន នៅភូមិសាស្ត្រ ខេត្តស្ទឹងត្រែង។
ជាមួយនឹងការពាំនាំប្រសាសន៍ផ្តាំផ្ញើការសាកសួរសុខទុក្ខពីលោកនាយករដ្ឋមន្ត្រី និងលោកស្រីកិត្តិព្រឹទ្ធបណ្ឌិត ប្រធានព្រឹទ្ធសភា ប្រធានរដ្ឋសភា រដ្ឋមន្ត្រីក្រសួងមហាផ្ទៃ ក៏ដូចជាការសាកសួរសុខទុក្ខពីសណាក់ រដ្ឋមន្ត្រីក្រសួងការពារជាតិជូនចំពោះនាយទាហាន និងពលទាហាន លោក សាយ សំអាល់ បានវាយតម្លៃខ្ពស់ចំពោះវីរភាពអង់អាចក្លាហានរបស់នាយទាហាន នាយទាហានរង ពលទាហានទាំងអស់ដែលបានបំពេញតួនាទី និងភារកិច្ចរបស់ខ្លួនក្នុងការការពារបូរណភាពទឹកដី និងអធិបតេយ្យភាពជាតិឱ្យបានគង់វង្ស ក៏ដូចជាបានរួមចំណែកយ៉ាងធំធេង ក្នុងការការពារធនធានធម្មជាតិ នៅក្នុងភូមិសាស្ត្រនេះ។ លោករដ្ឋមន្ត្រីក៏បានប្រកាសបន្តពង្រឹងពង្រីកចំណងមេត្រីភាពជាមួយបញ្ជាការដ្ឋានយោធភូមិភាគទី១ ឱ្យកាន់តែរឹងមាំថែមមួយកម្រិតទៀត។
ជាមួយគ្នានេះ លោករដ្ឋមន្ត្រីសូមសម្តែងនូវការគោរពដឹងគុណ ជូនចំពោះនាយទាហាន នាយទាហានរង ពលទាហានគ្រប់រូប ដែលបានគាំទ្រយ៉ាងពេញទំហឹង ចំពោះគោលនយោបាយរបស់រាជរដ្ឋាភិបាល និងគោរពដោយម៉ឹងម៉ាត់នូវរដ្ឋធម្មនុញ្ញ បទប្បញ្ញត្តិច្បាប់ និងបទបញ្ជាទាំងឡាយដែលរាជរដ្ឋាភិបាលបានដាក់ចេញ ហើយបានអប់រំខ្លួនប្រកបដោយការតស៊ូអត់ធ្មត់ ព្យាយាមដើម្បីក្លាយជាកងទ័ពដែលមានវិន័យ កិត្តិយស សេចក្តីថ្លៃថ្នូរ ស័ក្តិសមជាកូនចៅដ៏ពិតប្រាកដរបស់ប្រជាជន ហ៊ានពលីជីវិតដើម្បីជាតិមាតុភូមិ។ លោក សាយ សំអាល់ បានស្នើដល់កងកម្លាំងប្រដាប់អាវុធទាំងអស់ ជាពិសេស កងទ័ពការពារព្រំដែន នៃយោធភូមិភាគទី១ ខេត្តស្ទឹងត្រែង ត្រូវរួមសាមគ្គី ឯកភាពគ្នាជាធ្លុងមួយ ដើម្បីពង្រឹងបានកម្លាំងមួយដ៏រឹងមាំ ក្នុងការការពារបូរណភាពទឹកដី ឲ្យបានគង់វង្ស រក្សាសុខសន្តិភាព និងការអភិវឌ្ឍប្រទេសលើគ្រប់វិស័យ។
លោក សាយ សំអាល់ បានគូសបញ្ជាក់ថាផ្លែផ្កានៃសុខសន្តិភាព បានធ្វើឱ្យប្រជាជន និងយុវជនបច្ចុប្បន្នកំពុងតែសប្បាយរីករាយជាមួយនឹងវឌ្ឍនភាព និងវិបុលភាពដែលកើតចេញពីការអនុវត្ត “នយោបាយ ឈ្នះ-ឈ្នះ” និងការបន្តអនុវត្តនូវ “យុទ្ធសាស្រ្ត ចតុកោណ ដំណាក់កាលទី ៤” ដើម្បីកំណើន ការងារ សមធម៌ និង ប្រសិទ្ធភាព របស់រាជរដ្ឋាភិបាល ក្រោម ការដឹកនាំប្រកប ដោយគតិបណ្ឌិត របស់លោកនាយករដ្ឋមន្រ្តី ហ៊ុន សែន ដោយរក្សាបាននូវកំណើនសេដ្ឋកិច្ចជាមធ្យម ៧% ក្នុងមួយឆ្នាំ។ សុខសន្តិភាពពេញលេញ ឯកភាព ទឹកដី ឯកភាពជាតិ ស្ថិរភាពនយោបាយ ស្ថិរភាព ម៉ាក្រូសេដ្ឋកិច្ច និរន្តរភាព សុវត្ថិភាព និងសណ្តាប់ធ្នាប់សង្គមដ៏ល្អប្រសើរនៅទូទាំងប្រទេស គឺជាសក្ខីភាពនៃការឈានឡើងរបស់កម្ពុជាដោយចាប់ផ្តើមពីបាតដៃទទេ និងក្នុងដំណើរឆ្លងកាត់ដ៏វែងឆ្ងាយបត់បែន និងលំបាកជាច្រើនរាប់មិនអស់ ហើយទទួលបានការសាទរ និងការទទួលស្គាល់ពីមជ្ឈមណ្ឌលជាតិ និងអន្តរជាតិ ដោយស្មើមុខ និងស្មើសិទ្ធិនៅក្នុងដំណើរឆ្ពោះទៅ សម្រេចបានប្រទេសមានចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសមានចំណូលខ្ពស់នៅឆ្នាំ២០៥០។
ជាមួយគ្នានេះដែរ ឧត្តមសេនីយ៍ឯក ហួត ឈាង មេបញ្ជាការកងយោធពលខេមរភូមិន្ទយោធភូមិភាគទី១ បានថ្លែងអំណរគុណ ចំពោះការយកចិត្តទុកដាក់របស់លោករដ្ឋមន្ត្រី និងប្រតិភូក្រសួងបរិស្ថាន ជាពិសេសលោកនាយករដ្ឋមន្រ្តី ដែលតែងបានគិតគូខ្ពស់ពីសុខទុក្ខ និងជីវភាពរស់នៅរបស់កងទ័ព ទាំងនៅសមរភូមិមុខ និងសមរភូមិក្រោយ។ លោករដ្ឋមន្ត្រីបានបញ្ជាក់ថា កងទ័ពទាំងអស់នៅក្នុងខេត្តស្ទឹងត្រែង នឹងបន្តខិតខំបំពេញភារកិច្ច ការពារជាតិ មាតុភូមិ និងប្រជាពលរដ្ឋ ឲ្យបានកាន់តែរឹងមាំថែមទៀត៕
