ខ្មែរប៉ុស្ដិ៍ Close

លោកនាយករដ្ឋមន្ត្រី ហ៊ុន សែន និងប្រធានាធិបតីគីជីស្ថាន ជួបជជែកគ្នារកវិធីលើកម្ពស់ទំនាក់ទំនង និងកិច្ចសហប្រតិបត្តិការ

ដោយ៖ រៀម វណ្ណា ​​ | ថ្ងៃសៅរ៍ ទី១៥ ខែមិថុនា ឆ្នាំ២០១៩ ព័ត៌មានទូទៅ 445
លោកនាយករដ្ឋមន្ត្រី ហ៊ុន សែន និងប្រធានាធិបតីគីជីស្ថាន ជួបជជែកគ្នារកវិធីលើកម្ពស់ទំនាក់ទំនង និងកិច្ចសហប្រតិបត្តិការលោកនាយករដ្ឋមន្ត្រី ហ៊ុន សែន និងប្រធានាធិបតីគីជីស្ថាន ជួបជជែកគ្នារកវិធីលើកម្ពស់ទំនាក់ទំនង និងកិច្ចសហប្រតិបត្តិការ

(ឌូសាន់បេ, តាជីគីស្ថាន)លើទឹកដីនៃទីក្រុងឌូសាន់បេប្រទេសតាជីគីស្ថានកន្លែងចូលរួមសន្និសីទកំពូលលើកទី៥ស្តីពីអន្តរសកម្មភាពនិងការកសាងទំនុកចិត្តអាស៊ីនារសៀលថ្ងៃទី១៥ខែមិថុនាឆ្នាំ២០១៩នេះលោកនាយករដ្ឋមន្ត្រីហ៊ុនសែននិងលោកស៊ូរូនបាយជីនបេកូវ(Sooronbay Jeenbekov) ប្រធានាធិបតីគីជីស្ថានបានជួបជជែកលើការងារមួយចំនួនស្វែងរកការលើកកម្ពស់ទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរឱ្យកាន់តែល្អប្រសើរ។

បើតាមលោកកៅគឹមហួនរដ្ឋមន្ត្រីប្រតិភូអមនាយករដ្ឋមន្ត្រីបានឱ្យដឹងថាជាកិច្ចចាប់ផ្តើមនៃជំនួបនោះលោកនាយករដ្ឋមន្ត្រីហ៊ុនសែននិងប្រធាធាធិបតីគីជីស្ថានសុទ្ធតែបានបង្ហាញនូវភាពរីករាយដែលបានជួបជជែកគ្នា។

ពាក់ព័ន្ធទំនាក់ទំនងទ្វេភាគីសលោកនាយករដ្ឋមន្ត្រីហ៊ុនសែន បានមានប្រសាសន៍ថាទំនាក់ទំនងកម្ពុជានិងគីជីស្ថានមានរយៈពេល២៤ឆ្នាំហើយបន្ទាប់ពីបានចុះកិច្ចព្រមព្រៀងកាទូតជាមួយគ្នានៅឆ្នាំ១៩៩៥។

លោកនាយករដ្ឋមន្ត្រីហ៊ុនសែនបានគូសបញ្ជាក់ថាមកដល់ពេលបច្ចុប្បន្នទំនាក់ទំនងប្រទេសទាំងពីរនៅមានកម្រិតតិចតួចនៅឡើយដូច្នេះសម្ដេចស្នើឲ្យមានការតែងតាំងឯកអគ្គរដ្ឋទូតប្រចាំនៅប្រទេសទាំង២ដើម្បីជំរុញទំនាក់ទំនងប្រទេសទាំងពីរឱ្យកាន់តែប្រសើរ។

ដើម្បីលើកកម្ពស់ទំនាក់ទំនងនិងកិច្ចសហប្រតិបត្តិការនេះលោកនាយករដ្ឋមន្ត្រីហ៊ុនសែនក៏បានស្នើឱ្យមានការចុះអនុស្សារណៈដើម្បីពិគ្រោះយោបល់លើផ្នែកនយោបាយក៏ដូចជាការចុះអនុស្សរណៈរវាងក្រសួងការពារប្រទេសនៃប្រទេសទាំងពីរដើម្បីអាចពិភាក្សាធ្វើការជាមួយគ្នា។

លោកនាយករដ្ឋមន្ត្រីហ៊ុនសែនក៏ចង់ឱ្យមានការពិភាក្សាលើទំនាក់ទំនងអន្តរជាតិជាមួយសម្ព័ន្ធភាពអាស៊ីអឺរ៉ុបដែលកម្ពុជានឹងអាចនាំចេញក្រណាត់និងសម្លៀកបំពាក់មកផងដែរ។

លោកនាយករដ្ឋមន្ត្រីហ៊ុនសែនក្នុងនាមព្រះមហាក្សត្រខ្មែរក៏បានអញ្ជើញលោកប្រធានាធិបតីគៀជីសស្ថានមកបំពេញទស្សនកិច្ចផ្លូវរដ្ឋនៅកម្ពុជា។លោកនាយករដ្ឋមន្ត្រីហ៊ុនសែនក៏បានបង្ហាញបំណងចង់អញ្ជើញទៅបំពេញទស្សនកិច្ចនៅប្រទេសគៀជីសស្ថានផងដែរ។

លោកប្រធានាធិបតីគីជីស្ថានបានយល់ស្របតាមអ្វីដែលលោកនាយករដ្ឋមន្ត្រីហ៊ុនសែនបានលើកឡើង។លោកប្រធានាធិបតីបានចាត់ទុកអ្វីដែលសម្តេចតេជោបានលើកឡើងជាគោលបំណងល្អសម្រាប់ទំនាក់ទំនងរវាងកម្ពុជានិងគីជីស្ថាន។

លោកប្រធានាធបិតីមានប្រសាសន៍ទៀតថាបច្ចុប្បន្នគីជីស្ថានមានឯកអគ្គរដ្ឋទូតនៅប្រទេសម៉ាឡេស៊ីដែលជួយជំរុញដល់ការពង្រឹងទំនាក់ទំនងជាមួយកម្ពុជា។លោកប្រធានាធិបតីក៏បានអញ្ជើញលោកនាយករដ្ឋមន្ត្រីហ៊ុនសែនបំពេញទស្សនកិច្ចនៅគីជីស្ថានហើយលោកនាយករដ្ឋមន្ត្រីបានឯកភាពផងដែរ៕