បាក់ប្លង់សេ!! សំណង់អគារខុនដូ ដែលកំពុងដំណើរការសាងសង់នៅក្នុងខណ្ឌជ្រោយចង្វារ បានឆក់យកជីវិតកម្មក២នាក់ភ្លាមៗ

បាក់ប្លង់សេ!! សំណង់អគារខុនដូ ដែលកំពុងដំណើរការសាងសង់នៅក្នុងខណ្ឌជ្រោយចង្វារ បានឆក់យកជីវិតកម្មក២នាក់ភ្លាមៗ

សំណង់អគារខុនដូ Mekong View Tower 6 ដែលកំពុងដំណើរការសាងសង់នៅក្នុងខណ្ឌជ្រោយចង្វារ បានឆក់យកជីវិតកម្មក២នាក់ភ្លាមៗ និងបង្កឲ្យកម្មករ៥នាក់ផ្សេងទៀត រងរបួសធ្ងន់ស្រាល បន្ទាប់ពីកើតមានករណីបាក់បេតុងប្លង់សេនៅជាន់ទី២៣ សង្កត់លើកម្មករទាំង៧នាក់ ខណៈកំពុងធ្វើការ។

ហេតុការណ៍បាក់បេតុងប្លង់សេ ហើយធ្លាក់សង្កត់លើកម្មកររហូតដល់ទៅ៧នាក់នេះ បានកើតឡើងនៅវេលាម៉ោងប្រមាណជិត២រសៀល ថ្ងៃអាទិត្យ ទី១ ខែកក្កដា ឆ្នាំ២០១៨ នៅចំណុចការដ្ឋានសំណង់អគារខុនដូ Mekong View Tower 6 ស្ថិតក្នុងភូមិ២ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។

សមត្ថកិច្ចឲ្យដឹងថា ជនរងគ្រោះចំនួន៥នាក់ ត្រូវបានបញ្ជូនទៅសង្គ្រោះបន្ទាន់ភ្លាមៗ ក្រោយកើតហេតុបាក់ប្លង់សេខាងលើនេះ ខណៈមនុស្ស២នាក់ បានបាត់ខ្លួនរកមិនឃើញ។ ជនរងគ្រោះ ដែលរងរបួសទាំង៥ រួមមាន ទី១.ជាង នឿន របួសជើង, ទី២.ជាង ផាត របួសជើង, ទី៣.ជាង រិទ្ធ របួសស្មា, ទី៤.ស្រី លន ភេទស្រី របួសស្មា និងទី៥.ស្រី របួសកែងដៃ។

ដោយឡែក ជនរងគ្រោះ២នាក់ផ្សេងទៀត ដែលបានបាត់ខ្លួន ហើយទើបរកឃើញសាកសព ក្រោមកិច្ចអន្តរាគមន៍អាជ្ញាធរមានសមត្ថកិច្ច និងកម្មករអស់ប្រហែលជិត១០ម៉ោងនោះ រួមមាន ទី១ឈ្មោះ បាន លាស់ ភេទប្រុស អាយុ៤៨ឆ្នាំ រស់នៅភូមិតាពុំ ឃុំល្វេ ស្រុកកោះសូទិន ខេត្តកំពង់ចាម និងទី២ឈ្មោះ នាម ហ៊ីង ភេទប្រុស អាយុ៣៨ឆ្នាំ រស់នៅភូមិគោករុន ឃុំប៉ុបប៉ែន ខេត្តសៀមរាប។

កម្មករសំណង់ម្នាក់ ថ្លែងប្រាប់ភ្នាក់ងារអង្គភាពសារព័ត៌មាន Cam Post ដោយសុំមិនបញ្ចេញឈ្មោះ ឲ្យដឹងថា ប្លង់សេបាក់ធ្លាក់សង្កត់លើកម្មករនោះ មានទំហំ១២ម៉ែត្រ គុណនឹង២៤ម៉ែត្រ កម្រាស់០,១៤ម៉ែត្រ ស្ថិតនៅជាន់ទី២៣ នៃអគារខុនដូរ Mekong View Tower។

បន្ទាប់ពីកើតហេតុ អាជ្ញាធរមានសមត្ថកិច្ច មានទាំងអភិបាលក្រុងភ្នំពេញ លោក ឃួង ស្រេង និងចៅហ្វាយខណ្ឌជ្រោយចង្វារ លោក ឃ្លាំង ហួត រួមនឹងមន្ត្រីតុលាការ បានចុះទៅពិនិត្យកន្លែងកើតហេតុផងដែរ ហើយក្រុមជាងបាននាំគ្នាដាប់គាស់បេតុង ដើម្បីរុករកជាងដែលបាត់ខ្លួននោះអស់ជាច្រើនម៉ោង រហូតដល់ម៉ោងប្រមាណ១០យប់ថ្ងៃដដែល ទើបរកឃើញសាកសពជនរងគ្រោះ។

ក្រោយពេលរកឃើញសាកសព និងធ្វើកោសល្យវិច័យលើសាកសពរួចរាល់ សមកិច្ចជំនាញឲ្យដឹងថា ជនរងគ្រោះទាំង២នាក់ ពិតជាស្លាប់ដោយសារប្លង់សេបាក់សង្កត់លើប្រាកដមែន។ សាកសពក៏ត្រូវបានប្រគល់ឲ្យសាច់ញាតិ ដឹកយកទៅធ្វើបុណ្យតាមប្រពៃណី នៅស្រុកកំណើតរៀងៗខ្លួន៕

ប្រភព៖ campost.news