កម្មកររបួស និងស្លាប់ ក្នុងការបាក់ស្រុតអគារខុនដូមេគង្គវីយូ៦ នៅជ្រោយចង្វា
កម្មកររបួស និងស្លាប់ ក្នុងការបាក់ស្រុតអគារខុនដូមេគង្គវីយូ៦ នៅជ្រោយចង្វាតួលេខចុងក្រោយ ពីអធិការនគរបាលខណ្ឌជ្រោយចង្វាបានឲ្យដឹងថា មានកម្មករសំណង់ចំនួន ២នាក់ បានស្លាប់ និង៣ផ្សេងទៀត បានរងរបួស ក្នុងហេតុការណ៍បាក់ស្រុតបេតុងអគារ ខុនដូមេគង្គវីយូ៦ ជាន់ទី២៣ ស្ថិតនៅភូមិ២ សង្កាត់ជ្រោយចង្វា ខណ្ឌជ្រោយចង្វា រាជធានីភ្នំពេញ។
បេតុង (ប្លង់សេ) ដែលបានបាក់ធ្លាក់សង្កត់លើកម្មករ មានទំហំ ១២ម៉ែត្រ គុណនឹង ២៤ម៉ែត្រ កម្រាស់ ០,១៤ម៉ែត្រ ស្ថិតនៅជាន់ទី២៣ នៃអគារខុនដូរ Mekong View Tower 6 ក្នុងខណ្ឌជ្រោយចង្វា។
លោកវរសេនីយ៍ឯក សៀម សុត្ថាវុធ អធិការនគរបាលខណ្ឌជ្រោយចង្វា បានប្រាប់ Sabay តាមទូរសព្ទថា មកទល់ពេលនេះ ក្រុមការងារទាំងអស់ បានរកឃើញកម្មករចំនួន៥នាក់ ដែល២នាក់បានស្លាប់ និង៣នាក់រងរបួសស្រាល។ ចំណែកកម្មករបាត់ខ្លួនមិនមានទេ។
លោកបានបញ្ជាក់ថា តាមការចុះពិនិត្យ គឺពិតជាមានការបាក់ស្រុតបេតុងអគារខាងលើ ដោយសារមានបញ្ហាបច្ចេកទេស។
ព័ត៌មានលម្អិត និងដំណោះស្រាយបញ្ហានេះ បច្ចុប្បន្ន លោកវរសេនីយ៍ឯក បានបន្តថា សមត្ថកិច្ចកំពុងបង្កើតគណៈកម្មការ១ ដែលមានសមាសសភាពចូលរួមពីខាងសាលារាជធានីភ្នំពេញ និងក្រសួងរៀបចំដែនដី នគរូបនីយកម្ម និងសំណង់។
ក្រោយហេតុការណ៍នេះភ្លាមៗ ក៏មានវត្តមាន លោក ឃួង ស្រេង អភិបាលរាជធានីភ្នំពេញ និង លោក ឃ្លាំង លោក ហួត អភិបាល ខណ្ឌជ្រោយចង្វា បានចុះទៅពិនិត្យកន្លែងកើតហេតុ។
ទាក់ទងនឹងរឿងនេះ Sabay មិនអាចសុំការបំភ្លឺបន្ថែមតាមទូរសព្ទ ពីខាងមន្ត្រី នៃអគារខុនដូរ មេគង្គវីយូ៦ បានទេ។
សូមបញ្ជាក់ថា នៅរសៀលថ្ងៃទី០១ ខែកក្កដា ឆ្នាំ២០១៨ មានកម្មករសំណង់២រូប បានស្លាប់ ក្នុងករណីបាក់ស្រុតអាគារ មេគង្គវីយូ៦ ដែលកំពុងចាក់បេតុង ទី១ឈ្មោះ បាន លាស់ ភេទប្រុស អាយុ៤៨ឆ្នាំ រស់នៅខេត្តកំពង់ចាម និងទី២ ឈ្មោះ នាម ហ៊ីង ភេទប្រុស អាយុ៣៨ឆ្នាំ រស់នៅខេត្តសៀមរាប។
ប្រភពពីលោក លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជា បានបញ្ជាក់ថា កម្មករក្នុងវិស័យសំណង់ទូទាំងប្រទេសកម្ពុជាមានចំនួន ប្រមាណ២០ម៉ឺននាក់ តួលេខនេះបើគិតតែក្នុងនៅរាជធានីភ្នំពេញ មានកម្មករចំនួនប្រមាណ ៣ ទៅ៤ម៉ឺននាក់។
អត្ថបទ៖ សប្បាយ
