អ្នកសារព័ត៌មានម្នាក់ ស្ទើរតែស្លាប់ដោយសារគ្រាប់កាំភ្លើងទាហានអ៊ីស្រាអែល (មានវីដេអូ)
អ្នកសារព័ត៌មានម្នាក់ ស្ទើរតែស្លាប់ដោយសារគ្រាប់កាំភ្លើងទាហានអ៊ីស្រាអែល (មានវីដេអូ)
អ្នករាយការណ៍សារព័ត៌មានម្នាក់ឲ្យកាសែតល្បីឈ្មោះ Al Jazeera ប៊ិះនឹងត្រូវអស់ជីវិតដោយសារគ្រាប់កាំភ្លើងរបស់ទាហាន អ៊ីស្រាអែល នៅតំបន់ហ្គាហ្សាដែលកំពុងមានការតវ៉ាដ៏ក្ដៅគគុក។
នៅក្នុងវីដេអូដ៏រន្ធត់មួយ បង្ហាញពីអ្នកឆ្លើយឆ្លងព័ត៌មានអន្តរជាតិម្នាក់គឺអ្នកស្រី Hoda Abdel-Hamid បានពាក់មួកការពារសុវត្ថិភាព និងអាវក្រោះឈររាយការណ៍ព័ត៌មាន រំពេចនោះស្រាប់តែគ្រាប់កាំភ្លើងហោះកាត់ប៊ិះនឹងចំអ្នកស្រីទៅហើយ។ ជាមួយគ្នាដែរ ក្រោយពេលគ្រាប់កាំភ្លើងបាញ់ខុសអ្នកសារព័ត៌មានរូបនេះ ស្រាប់តែមានយន្តហោះដ្រូនទម្លាក់ឧស្ម័នបង្ហូរទឹកភ្នែកមកលើបុគ្គលិកកាសែតជាច្រើននាក់។ ទោះយ៉ាងណាក៏ដោយ យោងតាមកាសែត Al Jazeera ឲ្យដឹងថា ឥឡូវនេះអ្នកស្រី Hoda កំពុងទទួលបានការព្យាបាលសម្រាប់របួសបន្ដិចបន្ដួចរបស់ខ្លួនហើយ។
គួរឲ្យដឹងថា ការប៉ះទង្គិចគ្នារវាងក្រុមអ្នកតវ៉ា ប៉ាឡេស្ទីន និងទាហានអ៊ីស្រាអែលនៅតំបន់ព្រំដែនហ្គាហ្សានៅតែបន្ដយ៉ាងក្ដៅគគុក ខណៈមនុស្សយ៉ាងហោចណាស់ ៦០នាក់បានស្លាប់ និងរាប់ពាន់នាក់ទៀតរងរបួស៕
