ខ្មែរប៉ុស្ដិ៍ Close

ទស្សនៈ ៖ តើកម្ពុជាត្រូវអត់ធ្មត់ដល់ពេលណា?

ដោយ៖Sreyleak | ថ្ងៃព្រហស្បតិ៍ ទី៤ ខែកញ្ញា ឆ្នាំ២០២៥ ទស្សនៈ - នយោបាយ 13524
ទស្សនៈ ៖ តើកម្ពុជាត្រូវអត់ធ្មត់ដល់ពេលណា? ទស្សនៈ ៖ តើកម្ពុជាត្រូវអត់ធ្មត់ដល់ពេលណា?

មានសំណួរជាច្រើនពីអ្នកលេងបណ្តាញសង្គមលើកឡើងថា ហេតុអ្វីបានជាកម្ពុជាមិនតបតទៅ នឹង​​សកម្មភាពដ៏គឃ្លើនរបស់ទាហានថៃដែលតែងចិញ្ចឹមចិត្ត​ បង្កបញ្ហាមិនចេះចប់ អស់ពីមួយថ្ងៃ​​ទៅ​មួយ​ថ្ងៃ ដូច​ជាការបញ្ចេញសារក្នុងចេតនាបង្កជម្លោះជាមួយកម្ពុជាក្រោមលេសការពារទឹកដីរបស់គេ​​ ​​​ការធ្វើ​សកម្ម​ភាព​​រាយ​បន្លាយ​​លួសនៅតាមតំបន់ព្រំដែន រាយលួសបន្លា រាយស្បៃព័ទ្ធផ្ទះ និងដីភូមិ​របស់​​​ប្រ​​ជា​​​ជនកម្ពុជា នៅក្នុងខេត្តបន្ទាយមានជ័យជាដើម។ តើកម្ពុជាអត់ធ្មត់ដល់ពេលណា?

ជាការពិតណាស់ ការបង្កបញ្ហារបស់ភាគីថៃ គឺមានចេតនាការញុះញង់​​ចង់ឲ្យវីរៈកងទ័ពកម្ពុជា​​មិន​​អាច​អត់ទ្រាំបាន ឈានទៅផ្ទុះអាវុធសារជាថ្មី ដែលវានឹងនាំទៅដល់ការបំផ្លាញចោល​ទាំងស្រុង​នូវ​កិច្ចព្រមព្រៀងបទឈប់បាញ់រវាងកម្ពុជា-ថៃ ហើយប្រទេសទាំងពីរនឹងបន្តមានជម្លោះ​អូសបន្លាយរ៉ាំ​រ៉ៃ​តទៅមុខទៀត។ ប្រសិនបើយើងមិនមានការអត់ធ្មត់ទេ និងផ្ទុះអាវុធតាមកំហឹង​ដែលសត្រូវ​​របស់​​​យើង​ចង់បាន នោះគឺជាការចូលក្នុងអន្ទាក់ឬល្បិចកលរបស់សត្រូវឈ្លានពាន ​ហើយដែលអាច នឹង​​នាំអន្តរាយដល់ប្រទេសជាតិ និងធ្វើឲ្យប្រជាជន​រងទុក្ខលំបាកជាថ្មី និងក្នុងរយៈ​ពេលវែងផង​ក៏ថា​បាន​ ពិសេសប្រជាជននៅតំបន់​ព្រំដែន​កម្ពុជា-ថៃ។

ដូច្នេះ​ គោលការណ៍ដែលប្រមុខរាជរដ្ឋាភិបាលប្រកាន់យក និង​កងកម្លាំងក្នុងការគោរពបទបញ្ជា​ដោយ​​ជ្រើសរើស​​យកការ​អត់​ធ្មត់ បើ​ទោះ​បី​​ជាប្រឈមនឹងការចោទសួរ​និងចោទប្រកាន់ រិះគន់​វាយ​ប្រហារខ្លាំងៗ​ពីមជ្ឈដ្ឋាន​ក្រុម​ប្រឆាំង​​ក៏ដូចចាប្រជាពលរដ្ឋមួយចំនួនក្តី​ ប៉ុន្តែ​​សម្រាប់​កម្ពុជា វិធី​​សា​​ស្ត្រ​​នេះ គឺពិតជា​ជម្រើស​ដ៏ល្អបំផុត ពីព្រោះការអត់ធ្មត់នាំមកនូវភាពស្ងប់សុខ រក្សា​​បានជីវិត​​មនុស្ស និង​​ការខូចខាតផ្សេងៗ ក្រោយបទឈប់បាញ់រវាងកម្ពុជា-ថៃ ចូលជាធរមាន ពិតជាទទួលផល​ប្រយោ​ជន៍​ដ៏ធំធេងសម្រាប់ស្ថិរភាព​និងសេចក្តីសុខសាន្តរបស់ប្រជាជនកម្ពុជាទៅថ្ងៃអនាគត។

ការរក្សាបាននូវភាពអត់ធ្មត់ខ្ពស់ ក្នុងបញ្ហាដែលពិបាកនឹងអត់ធ្មត់​ គឺធ្វើឲ្យសត្រូវ​របស់យើង​មិនអាច​ស្មា​នត្រូវពីយុទ្ធសាស្ត្ររបស់យើង ក៏ប៉ុន្តែអ្វីដែលយើងទទួលបានផលពីការអត់ធ្មត់នេះ គឺការ​​កសាង​ភ័ស្តុតាងជាច្រើនសម្រាប់ជាមូលដ្ឋានផ្លូវច្បាប់នៅពេលដែលតុលាការអន្តរជាតិដំណើរការក្តីតាមការប្តឹងរបស់កម្ពុជា និងក្នុងកាលៈទេសៈចាំបាច់ថ្ងៃខាង​មុខនៅពេលមានការត្រួត​ពិនិត្យ​ជាក់ស្តែ​ង​នៃ​ការ​​អនុវត្តបទឈប់បាញ់ សហគមន៍អន្តរជាតិបានចូលរួមដំណើរការរៀបចំ និងសហការឱ្យមាន​បទ​​ឈប់បាញ់​នាពេលកន្លងទៅនៅប្រទេសម៉ាឡេស៊ី​។

ក្នុងបរិការណ៍នេះ​ យើងក៏គួរតែត្រូវបានរំលឹកខ្លះៗអំពីអតីតកាល​ដែលកម្ពុជាបានហែលឆ្លងកាត់​​សង្គ្រា​​​ម​​រាំង​ជល់តាំងពីដើមរៀងមក គឺប្រជាជនកម្ពុជាពិតជាឈឺចាប់ខ្លោចផ្សា​ ហើយក៏មិនចង់​ជួប​សង្គ្រា​ម​​​ទៀតទេ កម្ពុជាពិតជាមានការឯកភាពគ្នាជាធ្លុងមួយ ចង់បានសន្តិភាព និង​​ត្រូវការរស់នៅ​ប្រកបដោយសុខ​​សន្តិ​ភាពជា​​មួយប្រទេសជិតខាង ក៏ដូចជាបណ្តាប្រទេសក្នុងតំបន់ និងការប្តេជ្ញា​រក្សា​សុខសន្តិ​ភាព ដើម្បីកិច្ចសហប្រតិបត្តិការ និងការដោះដូរពាណិជ្ជកម្មជាដើម។ល។

ទោះបីយ៉ាងណា ​​ក្នុងការត្រៀមខ្លួនជាស្រេចនិងភាពរឹងមាំ​ជឿជាក់លើការដឹកនាំរបស់រាជរដ្ឋាភិបាល​និងគាំទ្រយ៉ាងពេញទំហឹងនូវឆន្ទៈមនសិការស្រឡាញ់ជាតិ មាតុភូមិ​កំរិតខ្ពស់កាត់ថ្លៃ​ពុំបាន​​របស់​​កងទ័ព​ក្នុងការ​តស៊ូ​​ពលិកម្មដើម្បីបុព្វ​ហេតុ​ការពារទឹកដី ​ប្រឆាំងនឹងបរទេសឈ្លានពាន​ គឺកម្ពុជា​អត់​ធ្មត់ ប៉ុន្តែមិននៅស្ងៀមឡើយ។​ ជម្រើសរបស់កម្ពុជា គឺបានជ្រើសរើសយកវិធីសាស្ត្រាការទូត និង​គោលការណ៍ច្បាប់អន្តរជាតិក្នុងការបន្តដោះស្រាយបញ្ហាជម្លោះព្រំដែន និងស្វែងរកការគាំទ្រ​​នូវ​សមា​នចិត្ត​ពីបណ្តាប្រទេសនានាជុំវិញពិភពលោក ជាពិសេសប្រទេសមហាអំណាចមានអាមេរិក ចិន ជាដើម។ កម្ពុជាក៏ទទួលបាននូវការយកចិត្តទុកដាក់ពីប្រធានអាស៊ានប្តូរវេន គឺប្រទេសម៉ាឡេ​ស៊ី​យ៉ាងពេញទំហឹងផងដែរ​។

ក្រោមកិច្ចសម្របសម្រួលពីប្រទេសម៉ាឡេស៊ី អនុព័ន្ធយោធារបស់ប្រទេសនានានៅកម្ពុជា បាន​ចុះ​ទៅផ្តិតយករូបភាពពីវិនាសកម្មដែលបង្កឡើងដោយការបាញ់ប្រហារពីសំណាក់ទាហានថៃចូល​ទឹក​ដី​កម្ពុជា ការបាញ់ផ្លោង ទម្លាក់គ្រាប់ដោយអាវុធធុនធ្ងន់បំផ្លាញផ្ទះរបស់ប្រជាជន សាលារៀន វត្ត​អារាម ហេដ្ឋារចនាសម្ព័ន្ធជាច្រើនកន្លែង រហូតដល់ខូចាខាតយ៉ាងដំណំលើប្រា​សាទ​ព្រះវិហារដែល​ជា​​សម្បត្តិបេតិកភណ្ឌវប្បធម៌ពិភពលោក និងបណ្តាលឲ្យប្រជាជនកម្ពុជាស្លាប់បាត់បង់ជីវិត និង​រាប់សែននាក់ទៀតត្រូវជម្លៀសចេញពីផ្ទះសម្បែងទៅរកទីមានសុវត្ថិភាព។

សារព័ត៌មានបរទេសធំៗដែលពីមុនផ្សាយលំអៀងទៅប្រទេសថៃដោយសារតែពុំបានដឹងនូវការពិត​ ឬបន្ទរតាមការចុះផ្សាយមួល​ បំភ្លៃសភាពការណ៍ដោយសារព័ត៌មានថៃដែលបំពានវិជ្ជាជីវៈរបស់ខ្លួន​និង​ដែលបានផ្គុំគ្នា​ក្នុង​ការផលិត​ព័ត៌មានក្លែងក្លាយដ៏សំបូរបែប​បម្រើឱ្យរដ្ឋាភិបាលថៃ ​និងយោធា​​ឈ្លានពាន​ នៅពេលនេះសារព័ត៌មានបរទេសធំៗពួកគេ​បានផ្សាយ​​ពី​ស្ថា​​នភាពពិតជាក់ស្តែង​នៅ​កម្ពុ​ជា​​​ទៅកាន់ពិភពលោកហើយ និងបានបង្ហាញថា កម្ពុជា គឺជាជនរងគ្រោះយ៉ាងពិតប្រាកដ និង​ថា ប្រជា​ជន​កម្ពុ​ជា ពិតជាត្រូវការសន្តិភាព។ ទាំងអស់នេះ គឺសុទ្ធតែជាភ័ស្តុតាងជុំវិញ​ទង្វើបំពាន​របស់​ភាគី​ថៃ។

កម្ពុជា ជ្រើសយកវិធីសាស្ត្រការទូតដ៏ប៉ិនប្រសប់ និងធ្វើកិច្ចការងារការទូតយ៉ាងសកម្ម ដើម្បី​បញ្ចៀ​​ស​​ការបង្ហូរឈាម ជាជាងជ្រើស​យកកំហឹង​​ទល់​កំហ​​ល់ជាមួយសត្រូវ​ដែលស្រេកឃ្លាន​ចង់បាន​ទឹកដី​កម្ពុជា​​​និងចង់ធ្វើសង្គ្រាម។ ការរំលត់បញ្ហានៃជម្លោះព្រំដែន ឬសង្គ្រាមលើលោក​ គេ​មិន​អាចយក​សង្គ្រា​ម​​ទៅបញ្ចប់សង្គ្រាមបានឡើយ នៅចុងទីបំផុតមានតែការចរចាដោយសន្តិវិធី និងតាមរយៈ​​ផ្លូវ​ច្បាប់អន្តរជាតិតែប៉ុណ្ណោះ ទើបអាចបញ្ចប់ជម្លោះបាន។

ក្នុងការបរិយាយមកនេះ​ គឺជាការពញ្ញាក់អារម្មណ៍ទៅមតិរិះគន់ ឬអាចឆ្លើយទៅនឹងចម្ងល់បានខ្លះ​នូវ​សំនួរ​​ដែលចោទសួរថា​​​« តើកម្ពុជាត្រូវអត់ធ្មត់ដល់ពេលណា? ចំលើយដែលយើងទាំងអស់គ្នា​គួរ​ត្រូវ​ស្ងប់ចិត្តបាន ​គឺយើងត្រូវជឿជាក់លើការដឹក​នាំរបស់​រាជរដ្ឋាភិបាលដែលមានសម្តេចធិបតី​ហ៊ុន​ ម៉ាណែ​ត ជាប្រមុខ​និងសម្តេចតេជោ​ អតីតនាយករដ្ឋមន្ត្រីរបស់កម្ពុជា​ដែលមានបទពិសោធន៍​​ដឹកនាំ​ប្រទេស​​និងយុទ្ធសាស្ត្រដ៏ច្បាស់លាស់ក្នុងសមរភូមិនិងកិច្ចការទូត គឺថ្នាក់ដឹកនាំទាំងពីរ​​ តេជោ–ធិបតី​ ពិតជាមានភាពវៃឆ្លាតក្នុង​ការដឹកនាំប្រទេស ដែលបាននិងកំពុងអត់ធ្មត់​ក្នុងកំរិត​អតិបរមា ហើ​យ​ស៊ូ​​ទ្រាំខាំមាត់សង្កត់ចិត្ត ពីព្រោះតែចង់ឃើញប្រជាជនកម្ពុជា​បានទទួល​នូវសុ​ខ​សន្តិ​ភាព​យ៉ាងពិត​ប្រាក​ដ​ និង​​បញ្ចៀស​​បាននូវការបង្ហូរឈាម​ ឬការបាត់បង់ជីវិតជាថ្មី​៕

ដោយៈ សុខ សុវណ្ណ