អគារចម្លែកទាំង ១០ លើលោកដែលកម្របានឃើញ
អគារចម្លែកទាំង ១០ លើលោកដែលកម្របានឃើញ
ដើម្បីភាពទាក់ទាញ និងចង់មានលក្ខណៈប្លែកពិសេសប្រចាំតំបន់នីមួយៗ អ្នកជំនាញគូរប្លង់តែងតែរកគំនិតថ្មីៗដើម្បីរចនាអគារ។ ជាក់ស្តែងអគារទាំង១០ខាងក្រោមនេះពិតជាពិសេសប្លែក និងគួរឲ្យចាប់អារម្មណ៍បំផុត ខណៈមើលទៅមួយភ្លេតស្មានតែរូបចម្លាក់ ប៉ុន្តែតាមពិតជាអគារសម្រាប់ធ្វើកិច្ចការងារផ្សេងៗ។
១- Egg Building អគារស៊ុត
អគារស៊ុតយក្សនេះជាមជ្ឈមណ្ឌលសិល្បៈមួយនៃមជ្ឈមណ្ឌលសិល្បៈវប្បធម៌ជាតិនៅទីក្រុងប៉េកាំង ប្រទេសចិន។ វាត្រូវបានឌីហ្សាញឡើងជារាងស៊ុតសត្វដែលងាយស្រួលចំណាំបំផុត។ វាស្ថិតនៅលើផ្ទៃដី១២០០០ម៉ែត្រការ៉េដែលមានកន្លែងអង្គុយបានមនុស្ស៥៤៥២នាក់។
២- Basket Building អគារកន្ត្រក
អគារលក្ខណៈកន្ត្រកយួរដៃនេះជាក្រុមហ៊ុន Longaberger ដែលផលិតកន្ត្រកតែម្តង។ វាស្ថិតនៅទីក្រុងអូហៃយូ សហរដ្ឋអាមេរិកដែលមានកម្ពស់៧ជាន់។
៣- Big Pineapple អគារម្នាស់
មើលពីចម្ងាយ វាហាក់ដូចជារូបចម្លាក់ផ្លែម្នាស់ ប៉ុន្តែតាមពិតជាអគារដែលស្ថិតនៅទីក្រុង Bathurst ប្រទេសអាហ្វ្រិកខាងត្បូង។ វាជាសារមន្ទីរមួយដែលរចនាជាផ្លែម្នាស់ដើម្បីបង្ហាញពីភាពល្បីល្បាញផ្លែម្នាស់របស់អាហ្វ្រិកខាងត្បូង។ អគារនេះមានកម្ពស់៣ជាន់ដែលធ្វើពីដេក។
៤- Grand Piano and Violin អគារប៉្យាណូ និងវីយោឡុង
វាជាអគារដែលត្រូវបានរចនាឡើងតាមឧបករណ៍ភ្លេងប៉្យាណូ និងវីយោឡុង។ វាស្ថិតនៅតំបន់ Higuain ខេត្ត Anhui ប្រទេសចិន។ អគារនេះត្រូវបានឌីហ្សាញ និងកសាងឡើងដោយនិស្សិតវិស្វករនៅសាកលវិទ្យាល័យបច្ចេកវិទ្យា Hefei។ គេប្រើសម្រាប់បង្ហាញផែនការអភិវឌ្ឍទីក្រុង Higuain។
៥- Adidas Shoe Box អគារប្រអប់ស្បែងជើង
វាជាការច្នៃប្រឌិតមួយផ្សេងទៀតសម្រាប់ជាការផ្សព្វផ្សាយអំពីផលិតផលដ៏ល្បីល្បាញមួយនេះ។ រចនាបថនេះត្រូវបានធ្វើឡើងសម្រាប់មហោស្រពតន្ត្រី Primavera ក្នុងពីក្រុងប៉ាសេឡូណា ប្រទេសអេស្ប៉ាញ។
៦- Fish Building អគារត្រី
អគារត្រីយក្សនេះជាការិយាល័យមួយដែលគេប្រើប្រាស់សម្រាប់មន្ត្រីមូលដ្ឋាននៃក្រុមប្រឹក្សាអភិវឌ្ឍនេសាទជាតិ។ វាស្ថិតនៅតំបន់ Hyderabad ប្រទេសឥណ្ឌា។
៧- Sheep And Dog អគារសត្វចៀម និងសុនខ
អគារដែលមានរាងជាសត្វចៀម និងសុនខនេះស្ថិតនៅតំបន់ Tirau ប្រទេសញូវសាឡែន។ តាមពិត អគាររាងសត្វចៀមជាហាងលក់សម្ភារៈ និងវត្ថុអនុស្សាវរីយ៍ ខណៈអគាររាងសត្វសុនខមណ្ឌលព័ត៌មានប្រចាំតំបន់នោះ។
៨- Airplane House ផ្ទះយន្តហោះ
ផ្ទះយន្តហោះនេះស្ថិតនៅភូមិ Mizria ក្នុងប្រទេសលីបង់។ វាត្រូវបានកសាងតាំងពីឆ្នាំ១៩៧៥ដែលយកតាមយន្តហោះ Airbus A380។ វាមាន២ជាន់ និងបន្ទប់ជាច្រើន។
៩- Dog Hotel សណ្ឋាគារសុនខ
វាពិតជាគួរឲ្យចាប់អារម្មណ៍ដែលពីចម្ងាយរាងដូចសត្វសុនខតែម្តង។ សណ្ឋាគាររាងសុនខ និងកសាងឆ្នាំ២០០៣នេះជាកន្លែងស្នាក់នៅ និងកន្លែងទទួលទានអាហារស្ថិតនៅតំបន់ Idaho សហរដ្ឋអាមេរិក។
១០- Shoe Church វិហារស្បែកជើង
វិហាររាងស្បែកជើងនេះស្ថិតនៅតំបន់ Chiayi កោះតៃវ៉ាន់ដែលត្រូវបានគេនិយាយថា គេធ្វើឡើងតាមរឿងរ៉ាវរបស់ស្ត្រីម្នាក់ដែលរត់ចេញពីវិហាររហូតអាពាហ៍ពិពាហ៍របស់នាងត្រូវបានលុបចោល បន្ទាប់ពីនាងមានបញ្ហាស្បែកជើង។ វាត្រូវបានច្នៃដោយមន្ត្រីរដ្ឋាភិបាលតៃវ៉ាន់សម្រាប់ជាកន្លែងរៀបមង្គលការ និងថតរូបផ្សេងៗ៕
ប្រភព៖ Sabay
