កម្មវិធី Telegram ស្រូបទាញអ្នកប្រើប្រាស់បានលើស ៥០០លាននាក់
កម្មវិធី Telegram ស្រូបទាញអ្នកប្រើប្រាស់បានលើស ៥០០លាននាក់
កម្មវិធី Telegram បានប្រកាសជាផ្លូវការថា ចំនួនអ្នកប្រើប្រាស់ជាប្រចាំបានកើនឡើងលើសពី ៥០០លាននាក់ គិតត្រឹម ថ្ងៃទី១២ ខែមករា ឆ្នាំ២០២១ម្សិលមិញនេះ ដោយក្នុងនោះ គិតត្រឹមរយៈពេល ៧២ម៉ោង មានអ្នកប្រើប្រាស់ថ្មីកើនឡើងជាង ២៥លាននាក់ នៅជុំវិញពិភពលោក។
ជាមួយគ្នានេះ កម្មវិធី Telegram បានថ្លែងអំណរគុណដល់អ្នកប្រើប្រាស់ទាំងអស់ចំពោះការគាំទ្រ ហើយថែមទាំងលើកឡើងថា ជោគជ័យដ៏ធំធេងនេះគឺដោយសារតែអ្នកប្រើប្រាស់បានពេញចិត្ត ទើបណែនាំបន្តឱ្យមិត្តភ័ក្តិប្រើប្រាស់ដែរ។
យោងតាមរបាយការណ៍បានបង្ហាញថា នៅក្នុងខែមេសា ឆ្នាំ២០២០ ចំនួនអ្នកប្រើប្រាស់ Telegram ប្រចាំថ្ងៃមានត្រឹមតែ ១.៥លាននាក់ប៉ុណ្ណោះ ខណៈដែលអ្នកប្រើប្រាស់សរុបមានចំនួន ៤០០លាននាក់។
គួរបញ្ជាក់ផងដែរថា ថ្មីៗនេះ WhatsApp បានប្ដូរគោលការណ៍ ដោយតម្រូវឱ្យអ្នកប្រើប្រាស់ធ្វើការ Share Data ជាមួយនឹង Facebook ជាហេតុធ្វើឱ្យអ្នកប្រើប្រាស់មួយចំនួនមិនពេញចិត្ត ខណៈដែលលោក Elon Musk និងប្រធានាធិបតីតួកគី បានអំពាវនាវឱ្យប្ដូរមកប្រើ Telegram វិញ៕
