ត្រឹម៣០ថ្ងៃសម្តេចធិបតី ហ៊ុន ម៉ាណែត បង្ហាញលទ្ធផលការងារដ៏លេចធ្លោ ទាំងក្របខណ្ឌជាតិ និងអន្តរជាតិ
ត្រឹម៣០ថ្ងៃសម្តេចធិបតី ហ៊ុន ម៉ាណែត បង្ហាញលទ្ធផលការងារដ៏លេចធ្លោ ទាំងក្របខណ្ឌជាតិ និងអន្តរជាតិមកដល់ថ្ងៃទី២២ ខែកញ្ញា ឆ្នាំ២០២៣នេះ មានរយៈពេល៣០ថ្ងៃ ឬមួយខែគត់ ដែល សម្តេចមហាបវរធិបតី ហ៊ុន ម៉ាណែត ត្រូវបានរដ្ឋសភាបោះឆ្នោតផ្តល់សេចក្តីទុកចិត្តឱ្យកាន់តំណែងនាយករដ្ឋមន្ត្រីដឹកនាំរាជរដ្ឋាភិបាលនីតិកាលទី៧ នៃរដ្ឋសភា។
ថ្ងៃទី២២ ខែសីហា ឆ្នាំ២០២៣ គឺជាថ្ងៃកំណត់ត្រាប្រវត្តិសាស្ត្រថ្មីមួយសម្រាប់កម្ពុជា ជាពេលវេលាកម្ពុជាបានផ្លាស់ប្តូរនាយករដ្ឋមន្ត្រីក្នុងរយៈជិត៤ទសវត្សរ៍។ ការផ្លាស់ប្តូរតំណែងកំពូលក្នុងស្ថាប័ននីតិប្រតិបត្តិនៅក្នុងបណ្តាប្រទេសនីមួយៗ គឺជារឿងដែលទទួលបានការចាប់អារម្មណ៍បំផុត តែសម្រាប់កម្ពុជា រឹតតែទទួលការចាប់អារម្មណ៍ខ្ពស់ថែមទៀត ដ្បិតជាការផ្លាស់ប្តូរមួយក្នុងរយៈរហូតដល់ទៅជិត ៤០ឆ្នាំ។
ការផ្លាស់អ្នកកាត់ចង្កូតប្រទេសជារឿងចាប់អារម្មណ៍មួយទៅហើយ តែអ្វីធ្វើឱ្យគេកត់សម្គាល់កាន់តែខ្លាំងថែមទៀតនោះ គឺការផ្លាស់ប្តូរតំណែងអ្នកទទួលដឹកនាំប្រទេសកម្ពុជា ត្រូវបានធ្វើទៅប្រកបដោយភាពស្រុះស្រួល មិនបង្កឱ្យមានបញ្ហាណាមួយនាំឱ្យរាំងស្ទះដល់ដំណើរការរបស់ជាតិ នាំឱ្យពលរដ្ឋភ័យខ្លាច ប៉ះពាល់ដល់ការរស់នៅរបស់ប្រជាពលរដ្ឋ ដំណើរការសេដ្ឋកិច្ច ឬការវិនិយោគនោះឡើយ។ សម្រាប់ប្រទេសដែលមានប្រជាធិបតេយ្យរឹងមាំ ប្រហែលជាមិនចម្លែកនោះទេ សម្រាប់ការផ្លាស់ប្តូរ ដែលមិនមានហេតុការណ៍ណាមួយបង្ករការរាំងស្ទះដល់ប្រក្រតីភាពរបស់រដ្ឋនោះ។ ប៉ុន្តែសម្រាប់ កម្ពុជា ជាប្រទេសដែលមានការបែកបាក់ ហែកហួរដោយភ្លើងសង្គ្រាម ហើយដំណើរប្រជាធិបតេយ្យក្មេងខ្ចី ប្រព័ន្ធគ្រប់គ្រងរដ្ឋមិនទាន់រៀបរយទាំងស្រុងនោះ ការផ្លាស់ប្តូរដោយមិនមានបាតុភាពអសកម្មណាមួយកើតឡើង គឺមិនមែនជារឿងធម្មតានោះឡើយ។
លទ្ធផលនៃការផ្លាស់ប្តូរដោយរក្សាបាននូវស្ថេរភាពសង្គមបែបនេះ អ្នកតាមដានបញ្ហាសង្គម បានផ្តល់តម្លៃខ្ពស់ទៅលើការគិតគូរ និងការរៀបចំរបស់សម្តេចតេជោ ហ៊ុន សែន ដែលជាប្រធានគណបក្សប្រជាជន និងជាអ្នកសម្រេចចិត្តកំពូលមួយរូបនោះ។ គេបានចាត់សម្តេចតេជោ ហ៊ុន សែន ជាមេដឹកនាំកំពូលមួយរូប ដែលមានភាបឈ្លាសវៃដ៏អស្ចារ្យលើការរៀបចំ ត្រួសត្រាយ ការសម្រេចចិត្ត និងការវាយតម្លៃទៅលើទិដ្ឋភាពទាំងឡាយ។ គេបានចាត់ទុកការរៀបចំចុះពីអំណាចរបស់សម្តេចតេជោ ហើយរៀបចំអ្នកបន្តវេនដោយរក្សាបានស្ថេរភាពសង្គមបែបនេះ គឺជាជោគជ័យមួយដ៏ធំក្នុងនាមជាមេដឹកនាំប្រទេស បន្ទាប់ពីជោគជ័យនៃការបង្រួបបង្រួមជាតិ សាងសង់សន្តិភាព និងការអភិវឌ្ឍក្នុងនាមជាអ្នកដឹកនាំប្រទេសនោះ។
សូមស្លេះរឿងរៀបចំអ្នកបន្តវេន ក្រឡេកមកពិនិត្យមើលពីការដឹកនាំរដ្ឋរបស់យើងរបស់អ្នកបន្តវេនវិញម្តង។ តើរយៈពេលមួយខែនេះ សម្តេចមហាបវរធិបតី ហ៊ុន ម៉ាណែត និងគណៈរដ្ឋមន្ត្រីរបស់សម្តេចសម្រេចបានលទ្ធផលអ្វីខ្លះសម្រាប់ជាតិ?
រយៈពេលត្រឹមមួយខែ បើយើងនិយាយពីលទ្ធផលហាក់ដូចជាលឿនពេកហើយ។ តែទោះជាយ៉ាងណាយើងក៏ឃើញសកម្មភាពការងារមួយចំនួនគួរឱ្យកត់សម្គាល់សម្រាប់រាជរដ្ឋាភិបាលថ្មីនេះ។ រាជរដ្ឋាភិបាលនីតិកាលថ្មី បានដាក់ចេញគោលនយោបាយអាទិភាពរបស់ខ្លួនក្នុងការលើកកម្ពស់ជីវភាពរបស់ប្រជាពលរដ្ឋ ដោះស្រាយបញ្ហារបស់ប្រជាពលរដ្ឋ និងយកឆ្នាំ២០២៣ ជាចំណុចចាប់ផ្តើមរបស់ខ្លួន ដើម្បីឈានទៅសម្រេចគោលដៅប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
ឈរលើស្មារតីនៃគោលនយោបាយនេះ គេបានសង្កេតឃើញថា បន្ទាប់ពីការបើកសម័យប្រជុំគណៈរដ្ឋមន្ត្រីលើកដំបូងនាថ្ងៃទី២៤ ខែសីហា ឆ្នាំ២០២៣រួចរាល់ភ្លាម សមាជិក សមាជិការាជរដ្ឋាភិបាល ដែលជារដ្ឋមន្ត្រីតាមក្រសួងនានា មិនបានបង្អែបង្អង់នោះឡើយ ហើយចុះធ្វើសកម្មភាពព្រមៗគ្នាយ៉ាងសស្រាក់សស្រាំ។
សម្តេចមហាបវរធិបតី ហ៊ុន ម៉ាណែត ក្នុងនាមជាប្រមុខរាជរដ្ឋាភិបាល បានប្រកាសបង្ហាញការប្តេជ្ញាចិត្តយ៉ាងមុតមាំថា នឹងមិនធ្វើឱ្យប្រជាពលរដ្ឋដែលសម្រេចចិត្តបោះឆ្នោតជូនគណបក្សប្រជាជនកម្ពុជា ត្រូវខកបំណងនោះឡើយ។ ក្រោមស្មារតីតម្កល់ប្រយោជន៍របស់ប្រជាពលរដ្ឋជាធំនេះ សម្តេចធិបតី បានយកចិត្តទុកដាក់ខ្ពស់លើកិច្ចទាំងឡាយ គឺត្រូវតែបានជាប្រយោជន៍សម្រាប់ប្រជាពលរដ្ឋ សម្រាប់កិច្ចការមិនបានជាប្រយោជន៍សម្រាប់ពលរដ្ឋ និងជាតិ គឺមិនធ្វើនោះឡើយ។
ការចេញដំណើរនៃរាជរដ្ឋាភិបាលនីតិកាលថ្មី គេបានសង្កេតឃើញថា សម្តេចធិបតី ហ៊ុន ម៉ាណែត បានផ្តល់ការយកចិត្តទុកដាក់លើការរៀបចំ និងចាត់ចែងតួនាទីភារកិច្ចរបស់ក្បាលម៉ាស៊ីនដឹកនាំរដ្ឋាភិបាល។ ក្នុងនោះឧបនាយករដ្ឋមន្ត្រី និងទេសរដ្ឋមន្ត្រី ព្រមទាំងរដ្ឋមន្ត្រីប្រតិភូអម ត្រូវបានចាត់ចែង និងបែងចែកការងារយ៉ាងច្បាស់លាស់ជាទីបំផុត។ បន្ថែមពីលើនោះ សម្តេចធិបតី ហ៊ុន ម៉ាណែត ក៏បានណែនាំឱ្យតាមក្រសួងនានា ត្រូវតែបែងចែកតួនាទីភារកិច្ចឱ្យថ្នាក់ដឹកនាំក្រសួងជារដ្ឋលេខាធិការ និងអនុរដ្ឋលេខាធិការឱ្យបានច្បាស់លាស់ត្រឹមរយៈពេលត្រឹមតែពីរសប្តាហ៍ប៉ុណ្ណោះ។
សម្តេចធិបតី ហ៊ុន ម៉ាណែត បានចាត់ទុកការរៀបចំបែងចែកតួនាទីភារកិច្ចរបស់សមាជិករាជរដ្ឋាភិបាល និងថ្នាក់ដឹកនាំតាមក្រសួងនានា ប្រៀបដូចជាការរៀបចំផ្ទះឱ្យមានរបៀបរៀបរយ មានសណ្តាប់ធ្នាប់ល្អមុននឹងទទួលភ្ញៀវ។ សម្រាប់សម្តេចការរៀបចំចាត់ចែងតួនាទីភារកិច្ចសម្រាប់ជិករាជរដ្ឋាភិបាល ក៏ដូចជាការរៀបចំតួនាទីភារកិច្ចតាមក្រសួងនានា គឺជារឿងចាំបាច់ ដើម្បីរាជរដ្ឋាភិបាលអាចចេញដំណើរបម្រើជាតិ និងប្រជាជនទទួលបានប្រសិទ្ធភាព និងមានលទ្ធផលល្អ។
រយៈពេលមួយខែដ្បិតថាមានរយៈពេលខ្លី តែគេបានឃើញនូវស្មារតីនៃការកំណែទម្រង់ដ៏ខ្ពស់មួយលើរដ្ឋបាលសាធារណៈ ដែលជានយោបាយដ៏សំខាន់មួយរបស់រាជរដ្ឋាភិបាលនីតិកាលថ្មី។ ការកែទម្រង់នោះ គឺការសម្រេចមិនឱ្យរដ្ឋមន្ត្រីប្រតិភូអមនាយករដ្ឋមន្ត្រី មានតួនាទីនៅក្រសួងស្ថាប័នដទៃនោះឡើយលើកលែងតែអគ្គនាយកពន្ធដារ និងអគ្គនាយកគយ។ បន្ថែមពីលើនោះ មន្ត្រីរាជការនៅតាមក្រសួងស្ថាប័ននានា មេធាវី និងឧកញ៉ា មិនឱ្យមានឋានៈស្មើឡើយ ក្នុងករណីពួកគេចង់បានតួនាទីជាទីប្រឹក្សា ឬជំនួយការ។ នេះជាការធ្វើកំណែទម្រង់រដ្ឋបាលសាធារណៈមួយ ដែលមិនឱ្យប៉ះពាល់ការអនុវត្តន៍ការងាររបស់រដ្ឋ ហើយក៏ចូលរួមចំណែកកាត់បន្ថយបន្ទុកចំណាយរបស់រដ្ឋផងដែរ។
ក្រៅតែពីរឿងនេះ រឿងដែលគេបានកត់សម្គាល់ខ្ពស់ថែមទៀតនោះ គឺសម្តេចធិបតី បានសម្រេចឱ្យមានការផ្តល់សេវាធ្វើ ឬផ្តល់សុពលភាពសម្រាប់លិខិតឆ្លងដែននៅតាមស្ថានទូតក្រៅប្រទេស ដោយចាប់ផ្តើមដំបូងនៅប្រទេសកូរ៉េខាងត្បូង, ការបង្កើតកុងស៊ុលនៅខេត្តសុងខ្លាភាគខាងត្បូងប្រទេសថៃ, ការចាត់វិធានការលើភាពប្រក្រតីលើថ្លៃសេវាលិខិតស្នាមនៅតាមច្រកព្រំដែនជាមួយប្រទេសជិតខាង និងការបង្កើតអាជ្ញាធរប្រយុទ្ធប្រឆាំង និងបង្ក្រាបគ្រឿងញៀន ជាមួយការដាក់បទបញ្ជាម៉ឺងម៉ាត់លើការបង្ក្រាបបទល្មើសគ្រឿងញៀននេះ។
សម្តេចធិបតី ហ៊ុន ម៉ាណែត ក៏បានផ្សារភ្ជាប់ជីវិតលើបញ្ហាប្រជាពលរដ្ឋតាមរយៈបណ្តាញសង្គមផងដែរ។ សម្តេចធិបតីបានប្រកាសបង្កើតក្រុមការងារដើម្បីតាមដានបញ្ហារបស់ប្រជាពលរដ្ឋដែលបង្ហោះតាមបណ្តាញសង្គម។
តាមរយៈយន្តការនេះ សម្តេចបានដោះស្រាយបញ្ហាផ្លូវរបស់ប្រជាពលរដ្ឋមួយករណីនៅក្នុងខេត្តតាកែវ និងមួយករណីទៀតនៅស្រុកមុខកំពូលខេត្តកណ្តាល។ រឿងផ្តើមចេញពីបណ្តាញសង្គមហើយត្រូវបានដោះស្រាយមួយករណីទៀត គឺករណីតែងតាំងមេប៉ុស្តិ៍ម្នាក់ នៅឃុំសំព្រោជ ស្រុកស្ទោង ខេត្តកំពង់ធំ។ មេប៉ុស្តិ៍នេះ មានអតីតភាពជាចោរប្លន់ទូមាស ក្រោយសម្តេចធិបតីទទួលបានព័ត៌មាន សម្តេចបានបញ្ជាឱ្យស្រាវជ្រាវ។ ទីបំផុតមេប៉ុស្តិ៍រូបនេះ ត្រូវបានដកចេញពីតួនាទី និងលុបឈ្មោះចេញពីក្របខណ្ឌនគរបាលផងដែរ។ ជាមួយគ្នាអធិការស្រុកស្ទោង ដែលជាអ្នកស្នើតែងតាំងមេប៉ុស្តិ៍រូបនេះ ក៏ត្រូវបានដកចេញពីតួនាទីឱ្យទៅបម្រើការងារនៅស្នងការដ្ឋាន។
រឿងមេប៉ុស្តិ៍រូបនេះ ក៏រាលដាលដល់ស្នងការរងខេត្តកំពត ដែលមានអតីតភាពជាអ្នកលួចអាយផេត ក៏ត្រូវបានដកចេញពីតួនាទីដូចគ្នា បន្ទាប់ពីសម្រែកតវ៉ារបស់ប្រជាពលរដ្ឋលើបណ្តាញសង្គម។
ផ្តើមពីបណ្តាញសង្គមដូចគ្នា បញ្ហារបស់អ្នកប្រកបរបរសេដ្ឋកិច្ចក្រៅប្រព័ន្ធ ដែលស្នើឱ្យសុំច្បាប់ធ្វើអាជីវកម្មពីរដ្ឋបាលក្រុង ស្រុក ខណ្ឌនោះ ក៏ត្រូវបានសម្តេចធិបតីសម្រេចចិត្តផ្អាកជាបន្ទាន់ផងដែរ។ ការសម្រេចចិត្តផ្អាកនេះ បន្ទាប់ពីសម្តេចទទួលបានការប្រតិកម្មជាច្រើនពីអ្នកប្រកបរបរសេដ្ឋកិច្ចក្រៅប្រព័ន្ធ។ ទន្ទឹមនឹងការសម្រេចបែបនេះ សម្តេចធិបតី ក៏បានបង្កើតយុទ្ធសាស្ត្រជាតិ ស្តីពីការអភិវឌ្ឍសេដ្ឋកិច្ចក្រៅប្រព័ន្ធផងដែរ ហើយបានសម្រេចក្នុងកិច្ចប្រជុំគណៈរដ្ឋមន្ត្រីនាថ្ងៃទី២០ ខែកញ្ញា។
ការដោះស្រាយបញ្ហាប្រជាពលរដ្ឋ ដែលផ្តើមចេញពីការតវ៉ាលើបណ្តាញសង្គមនេះ បាននាំឱ្យមានការគាំទ្រយ៉ាងខ្លាំងក្លាពីសំណាក់ប្រជាពលរដ្ឋ។
ក្រៅតែពីការងារគួរឱ្យកត់សម្គាល់នេះទៅ ក្នុងរយៈពេលមួយខែនេះ ទោះបីមមាញឹកនឹងការងារខ្លាំងយ៉ាងណាក្តី សម្តេចមហាបវរធិបតី ក៏បានឆ្លៀតចុះជួបជាមួយកម្មករ និយោជិតនៅតាមរោងចក្រសហគ្រានានាផងដែរ។ ការបង្កើតការងារជូនប្រជាពលរដ្ឋ លើកម្ពស់ជីវភាពកម្មករ និយោជិតជានយោបាយអាទិភាពមួយរបស់រាជរដ្ឋាភិបាល។ ដូច្នេះការចុះជួបកម្មករ និយោជិត ក៏ជាការប្រមូលធាតុចូលមួយដ៏សំខាន់សម្រាប់លើកកម្ពស់វិស័យការងារ ហើយក៏ជាការបង្ហាញឱ្យឃើញនូវនយោបាយយកចិត្តទុកដាក់លើកម្មករ និយោជិត។ មួយខែនេះសម្តេចធិបតី បានចុះជួបកម្មករ និយោជិតចំនួន៤លើក មានកម្មករ និយោជិតចូលរួមជិត ៨ម៉ឺននាក់។ តាមរយៈជំនួបជាមួយកម្មករ និយោជិតនេះ សម្តេចធិបតី បានចង្អុលបង្ហាញការងារចំនួន៦ឱ្យក្រសួងការងារ និងបណ្តុះបណ្តាលវិជ្ជាជីវៈអនុវត្តន៍ឱ្យជោគជ័យក្នុងឆ្នាំ២០២៣។ ការងារទាំង៦នោះ មានដូចជាការការចរចាដំឡើងប្រាក់ឈ្នួល ការរៀបចំយន្តផ្តល់បណ្ណបេឡារបបសន្តិសុខសង្គមគាំពារសុខភាពដល់សមាជិករបស់កម្មករ និយោជិត ការបណ្តុះបណ្តាលជំនាញវិជ្ជាជីវៈ ការហ្វឹកហ្វឺនកូនជាង ការបើកប្រាក់ឧបត្ថម្ភសម្រាប់កម្មការិនីមានផ្ទៃពោះ និងកម្មវិធីប្រកួតប្រជែងលើប្រធានបទសុខដុមនីយកម្មកន្លែងធ្វើការ។
ក្នុងរយៈមួយខែនេះ សម្តេចធិបតី ហ៊ុន ម៉ាណែត ក៏បានជួបសម្តែងការគួរសម និងពិភាក្សាការងារជាមួយភ្ញៀវចំនួន៦រូបរួមមាន៖ ១) ឯកអគ្គរដ្ឋទូតសហភាពអឺរ៉ុប ប្រចាំកម្ពុជាដែលចប់អាណត្តិ, ២) រដ្ឋមន្ត្រីក្រសួងកសិកម្ម ស្បៀង និងកិច្ចការជនបទរបស់កូរ៉េខាងត្បូង, ៣) ឧបនាយករដ្ឋមន្ត្រី រដ្ឋមន្ត្រីសម្របសម្រួលកិច្ចការសេដ្ឋកិច្ច និងជារដ្ឋមន្ត្រីក្រសួងទេសចរណ៍ និងបរិស្ថានរបស់ទីម័រខាងកើត, ៤) គណៈប្រតិភូមន្ត្រីព្រឹទ្ធសភាអាមេរិក, ៥) រដ្ឋមន្ត្រីក្រសួងទំនាក់ទំនងអន្តរជាតិ នៃគណៈកម្មាធិការមជ្ឈិមបក្សកុម្មុយនីស្តចិន និងទី៦) ប្រធានរដ្ឋសភាកូរ៉េខាងត្បូង។
តាមរយៈជំនួបទាំងភ្ញៀវទាំង៦នេះ ជាការពង្រីកបន្ថែមនូវទំនាក់ទំនង និងកិច្ចសហប្រតិបត្តិការរវាងកម្ពុជា និងបណ្តាប្រទេសដែលពាក់ព័ន្ធក្នុងវិស័យដែលជាសមត្ថកិច្ចរបស់ពួកគេឱ្យកាន់តែល្អប្រសើរ។
ក្រៅតែពីកិច្ចការក្នុងស្រុកហើយនោះ រយៈពេលមួយខែនេះ សម្តេចធិបតី ហ៊ុន ម៉ាណែត ក៏បានអញ្ជើញបំពេញបេសកកម្មការងារនៅក្រៅប្រទេសចំនួន៣លើកផងដែរ។ លើកទី១ ធ្វើឡើងពីថ្ងៃទី៤ ដល់ថ្ងៃទី៧ ខែកញ្ញា ដោយសម្តេចធិបតីអញ្ជើញចូលរួមក្នុងកិច្ចប្រជុំកំពូលអាស៊ានលើកទី៤៣ និងកិច្ចប្រជុំកំពូលពាក់ព័ន្ធ នៅទីក្រុងហ្សាកាតា ប្រទេសឥណ្ឌូនេស៊ី។ បេសកកម្មក្រៅប្រទេសលើកដំបូងក្នុងឋានៈជានាយករដ្ឋមន្ត្រីរបស់កម្ពុជា ក្រៅតែពីអញ្ជើញចូលរួមកិច្ចប្រជុំការងារជារបៀបវារៈរបស់អាស៊ានហើយនោះ សម្តេចធិបតី ហ៊ុន ម៉ាណែត បានជួបស្វាគមន៍ និងជជែកការងារជាមួយមេដឹកនាំប្រទេសអាស៊ានទាំងអស់ ដែលមានវត្តមាននៅទីនោះ។ សម្តេចធិបតី ហ៊ុន ម៉ាណែត ក៏បានឆ្លៀតជួបនាយករដ្ឋមន្ត្រីចិន នាយករដ្ឋមន្ត្រីជប៉ុន និងប្រធានាធិបតីកូរ៉េខាងត្បូងផងដែរ។
លើកទី២ សម្តេចធិបតី ហ៊ុន ម៉ាណែត បានដឹកនាំគណៈប្រតិភូបំពេញទស្សនកិច្ចជាផ្លូវការនៅប្រទេសចិន និងអញ្ជើញចូលរួមពិព័រណ៍ចិន-អាស៊ានលើកទី២០ នៅទីក្រុងណាននីង តំបន់ស្វយ័តក្វាងស៊ី ពីថ្ងៃទី១៤ ដល់ថ្ងៃទី១៧ ខែកញ្ញា។
លើកទី៣ គឺការអញ្ជើញថ្លែងសុន្ទកថាក្នុងមហាសន្និបាតអង្គការសហប្រជាជាតិនៅទីក្រុងញូវយ៉ក សហរដ្ឋអាមេរិក ចាប់ពីថ្ងៃទី២១ ដល់ថ្ងៃទី២៥ ខែកញ្ញា។
បេសកកម្មក្រៅប្រទេសទាំង៣លើករបស់សម្តេចមហាបវរធិបតី ហ៊ុន ម៉ាណែត ទោះជានាយករដ្ឋមន្ត្រីថ្មីងថ្មោង និងមានវ័យនៅក្មេងយ៉ាងណាក្តី តែគេបានកត់សម្គាល់ថា សម្តេចធិបតីទទួលបានជោគជ័យខ្ពស់លើវិស័យការទូត។ បើទោះបីជាសម្តេចនៅក្មេង តែបណ្តាមេដឹកនាំប្រទេសជាមិត្ត ដែលមានវ័យចាស់ជាង សុទ្ធតែបានផ្តល់តម្លៃ និងផ្តល់ការគោរពដោយស្មើភាព និងស្មើសិទ្ធ។ សម្តេចធិបតី បើទោះបីមិនធ្លាប់មានជំនួបការទូតកម្រិតខ្ពស់យ៉ាងណាក្តី តែសម្តេចធិបតី បានបើកការចរចាជាមួយមេដឹកនាំប្រទេសជាមិត្ត ដោយមិនមានការញាប់ញរណាមួយនោះឡើយ ហើយមានភាពបត់បែនរហ័សរហួនលើការសម្រេចចិត្តនានាពាក់ព័ន្ធបញ្ហាទ្វេភាគី តំបន់ អន្តរជាតិ ក៏ដូច ជាការងារពាក់ព័ន្ធកិច្ចសហប្រតិបត្តិការផ្នែកសេដ្ឋកិច្ចជាដើម។
ក្នុងបេសកកម្មការងារទៅក្រៅប្រទេស ក៏ដូចជាដំណើរទស្សនកិច្ចនៅប្រទេសចិន សម្តេចធិបតី ហ៊ុន ម៉ាណែត បានថ្លែងថា រាល់ជំនួបជាមួយមិត្តបរទេសទាំងអស់ គឺដើម្បីប្រយោជន៍ជាតិ និងប្រជាជន។ សម្តេចធិបតី បានធានាអះអាងថា លើទំនាក់ទំនងការបរទេសសម្តេចមិនឱ្យកម្ពុជាបាត់បង់អធិបតេយ្យជាតិនោះឡើយ។
ដំណើរបំពេញបេសកកម្មការងារនៅក្រៅប្រទេស ជាពិសេសការបង្ហាញមុខនៅមហាសន្និបាតអង្គការសហប្រជាជាតិ ត្រូវបានគេមើលឃើញថា សម្តេចធិបតី ហ៊ុន ម៉ាណែត បានទទួលជោគជ័យ ខ្ពស់ក្នុងការបង្ហាញពីភាពស្របច្បាប់នៃរាជរដ្ឋាភិបាលកម្ពុជា។ បើទោះបីច្បាប់កម្ពុជា មិនតម្រូវឱ្យរាជរដ្ឋាភិបាលកម្ពុជាមានភាពស្របច្បាប់ទៅបាន លុះត្រាតែមានការទទួលស្គាល់ពីប្រទេសដទៃយ៉ាងណាក្តី។ ក៏ប៉ុន្តែនៅក្រោយពេលបោះឆ្នោតជ្រើសរើសតំណាងរាស្ត្រកាលពីថ្ងៃទី២៣ ខែកក្កដា មានក្រុមប្រឆាំង និងប្រទេសមួយចំនួនបានសម្តែងមតិនានាមិនទទួលស្គាល់ ឬមិនគាំទ្រដំណើរការបោះឆ្នោតនោះ បើទោះបីមានប្រជាពលរដ្ឋរហូតដល់ទៅជាង៨៤ភាគរយចេញទៅបោះឆ្នោតយ៉ាងណាក្តី។
វត្តមានសម្តេចធិបតី ហ៊ុន ម៉ាណែត នៅអង្គការសហប្រជាជាតិ គឺជាសារបង្ហាញយ៉ាងច្បាស់ថា អង្គការសហប្រជាជាតិបានទទួលស្គាល់នាយករដ្ឋមន្ត្រីកម្ពុជា ហើយសម្រែកតវ៉ារបស់ខ្មែរប្រឆាំងមួយចំនួនដែលធ្វើសកម្មភាពតវ៉ានៅក្រៅប្រទេសនោះ មិនមានអនុភាព ឬឥទ្ធិពលអ្វីនោះឡើយ។ អាចថាជាគាប់ជួនណាស់ ថ្ងៃដែលសម្តេចធិបតីថ្លែងសារនៅអង្គការសហប្រជាជាតិ គឺចំថ្ងៃដែលសម្តេចធិបតីទទួលបានការគាំទ្រពីរដ្ឋសភាឱ្យធ្វើជានាយករដ្ឋមន្ត្រីតែម្តង។
បេសកកម្មក្រៅប្រទេសរបស់សម្តេចធិបតី ហ៊ុន ម៉ាណែត មិនត្រឹមតែជាការរកប្រយោជន៍សម្រាប់ជាតិ និងប្រជាជនកម្ពុជានោះទេ។ តែក្នុងនាមជាមេដឹកនាំប្រទេសមួយសមាជិករបស់អាស៊ាន និងរបស់អង្គការសហប្រជាជាតិដែរនោះ សម្តេចក៏បានផ្តល់នូវទស្សនទានមួយចំនួន ដើម្បីរួមចំណែកដោះស្រាយបញ្ហារបស់ពិភពលោកដែលពើបប្រទះនឹងវិបត្តិសេដ្ឋកិច្ច និងវិបត្តិនៃការប្រជែងឥទ្ធិនយោបាយ ក៏ដូចជាសង្គ្រាមនៅប្រទេសអ៊ុយក្រែនផងដែរ។
សម្តេចតេជោ ហ៊ុន សែន ក្នុងនាមជាអ្នកធ្លាប់ដឹកនាំប្រទេសមួយរូប បានវាយតម្លៃខ្ពស់ចំពោះភាពខ្លាំងរបស់សម្តេចធិបតី ហ៊ុន ម៉ាណែត លើការងារដឹកនាំរដ្ឋ។
មិនមែនក្រោមហេតុផលសម្តេចធិបតី ហ៊ុន ម៉ាណែត ទើបនាំឱ្យសម្តេចតេជោ វាយតម្លៃថាការដឹកនាំរបស់សម្តេចធិបតីបានល្អប្រសើរនោះទេ។ សម្តេចតេជោ បានគូសរំលេចថា សម្តេចធ្លាប់វាយតម្លៃថា ត្រូវការពេលយ៉ាងតិចណាស់ ក៏៣ខែដែរ ទើបសម្តេចធិបតីអាចដឹកនាំប្រទេសមានភាពនឹងនរ។ ប៉ុន្តែមិនដូច្នោះឡើយ ត្រឹមតែរយៈពេលមួយខែ សម្តេចធិបតី ហ៊ុន ម៉ាណែត បានបង្ហាញភាពជាអ្នកដឹកនាំប្រទេសបានយ៉ាងល្អ។
សម្តេចតេជោ ហ៊ុន សែន ធ្លាប់បានលើកឡើងយ៉ាងដូច្នេះ «ដោយធ្លាប់អនុវត្តផ្ទាល់លើមុខដំណែងជានាយករដ្ឋមន្ត្រី អស់រយៈពេលជាង៣៨ឆ្នាំ ខ្ញុំអាចនិយាយបានថា នាយករដ្ឋមន្ត្រី ហ៊ុន ម៉ាណែត ធ្វើបានល្អជាងការគិតទុករបស់ខ្ញុំទៅទៀត។ មិនមែននិយាយលើកសរសើរកូនខ្លួនឯងនោះទេ មុននេះខ្ញុំគិតថាត្រូវប្រើពេលប្រមាណ៣ខែទើប នាយករដ្ឋមន្ត្រីថ្មីអាចគ្រប់គ្រងលើការងារបានទាំងស្រុង»។
សម្តេចតេជោ បានបន្ថែមថា «ផ្ទុយពីការគិតរបស់ខ្ញុំ នាយករដ្ឋមន្ត្រីរូបនេះចេញដំណើរដោយការជឿជាក់គ្រប់គ្រងបានសភាពការលើគ្រប់ផ្នែក ទាំងតូចទាំងធំក្នុងប្រទេស និងឈានទៅសម្រេចបាននូវកិច្ចការបរទេស។ កូននាគរាជច្បាស់ជាមិនក្លាយទៅកូនកង្កែបនោះឡើយ»។
សរុបមករយៈពេលមួយខែក្តីនៃដំណើរការរាជរដ្ឋាភិបាលថ្មី ដឹកនាំដោយសម្តេចធិបតី ហ៊ុន ម៉ាណែត បើទោះបីមិនទាន់លេចចេញការងារផ្លែផ្កាច្រើនយ៉ាងណាក្តី។ តែរឿងគួរកត់សម្គាល់នោះ មួយខែនេះ សម្តេចធិបតី ហ៊ុន ម៉ាណែត បានដឹកនាំ គ្រប់គ្រង និងចាត់ចែងការងាររបស់រដ្ឋប្រកបដោយភាពប៉ិនប្រសប់ ធានាបានស្ថេរភាព និងនិរន្តរភាពសង្គម ដែលជាបំណងប្រាថ្នាដ៏ធំរបស់ជាតិ និងប្រជាជន។ ជាពិសេសតាមរយៈលទ្ធផលការងារមួយខែនេះ បានស្តែងឱ្យឃើញថា បេះដូងរបស់សម្តេចធិបតីនាយករដ្ឋមន្ត្រី គឺពិតជាបានតម្កល់នូវប្រយោជន៍របស់ជាតិ និងប្រជាជនជាធំ។
តាមរយៈចំណេះបានពីសាលាល្បីៗនៅអាមេរិក និងអង់គ្លេស បទពិសោធន៍ការងារជាក់ស្តែងជាច្រើន ភាពវៃឆ្លាត បូករួមនិងឆន្ទៈមនសិការដ៏ខ្ពស់ គេមានក្តីសង្ឃឹមខ្ពស់ថា សម្តេចធិបតី ហ៊ុន ម៉ាណែត នឹងសម្រេចបានជោគជ័យក្នុងបេសកកម្មដឹកនាំកម្ពុជា ឱ្យបន្តរក្សាបានសុខសន្តិភាព បន្តកំណើនអភិវឌ្ឍន៍ លើកកម្ពស់កិត្យានុភាពជាតិ ហើយប្រជាពលរដ្ឋកាន់តែទទួលបានវិបុលភាព និងសុខក្សេមក្សាន្ត៕
Fresh News
