សម្ដេច ហ៊ុន សែន បញ្ជាក់ថា កម្ពុជាទើបរកឃើញអ្នកឆ្លង ២ករណីបន្ថែមទៀតនៅឯខេត្តព្រះសីហនុ ដែលធ្វើអោយចំនួនអ្នកឆ្លងសរុបកើនដល់ ៩៣នាក់, ជាសះស្បើយ ៦នាក់
សម្ដេច ហ៊ុន សែន បញ្ជាក់ថា កម្ពុជាទើបរកឃើញអ្នកឆ្លង ២ករណីបន្ថែមទៀតនៅឯខេត្តព្រះសីហនុ ដែលធ្វើអោយចំនួនអ្នកឆ្លងសរុបកើនដល់ ៩៣នាក់, ជាសះស្បើយ ៦នាក់
ថ្លែងក្នុងក្នុងពិធីសំណេះសំណាលជាមួយក្រុមគ្រូពេទ្យស្ម័គ្រចិត្ត ដើម្បីប្រយុទ្ធប្រឆាំងនឹងជំងឺកូវីដ១៩ នាព្រឹកថ្ងៃទី២៥ ខែមីនានេះ សម្តេចតេជោ ហ៊ុន សែន បានប្រកាសថា អ្នកជំងឺកូវីដ១៩ នៅក្នុងប្រទេសកម្ពុជាយើង កើនឡើងដល់ ៩៣នាក់ហើយ គិតត្រឹមព្រឹកថ្ងៃទី២៥មីនានេះ ដោយសារតែបន្ថែមជនជាតិបារាំង ២នាក់ទៀតនៅខេត្តព្រះសីហនុ។
សម្តេចតេជោ ហ៊ុន សែន បញ្ជាក់ថា នៅព្រឹកមិញនេះ អភិបាលខេត្តព្រះសីហនុ បានរាយការណ៍មកថា មានជនជាតិបារាំង ២នាក់ទៀត ត្រូវបានរកឃើញកើតជំងឺកូវីដ-១៩ ដែលនាំឲ្យចំនួនអ្នកជំងឺកូវីដ-១៩ កើតមានសរុបនៅកម្ពុជាយើង កើនឡើងដល់ ៩៣នាក់ ខណៈដែលតួលេខរបស់ក្រសួងសុខាភិបាល មានត្រឹម ៩១នាក់ គិតត្រឹមយប់ថ្ងៃទី ២៤មីនា។
ជាការកត់សម្គាល់ នៅខេត្តព្រះសីហនុ មានអ្នកជំងឺកូវីដ-១៩ ចំនួន ៣៦នាក់ ក្នុងនោះ មានជនជាតិចិនម្នាក់ បានជាសះស្បើយ ជនជាតិខ្មែរ ២នាក់ និងអ្នកទេសចរបារាំង ៣៣នាក់។ ក្នុងនោះ មានម្នាក់ ត្រូវបានបញ្ជូនមកសម្រាកព្យាបាល នៅភ្នំពេញ៕
