អ្នកនាំពាក្យរាជរដ្ឋាភិបាល៖ យុទ្ធនាការបំភ្លៃការពិតរបស់ក្រុមប្រឆាំងក្រៅច្បាប់ដែលថា លោកនាយករដ្ឋមន្ត្រី ហ៊ុន សែន នឹងទទួលសម្ពាធពីសហភាពអ៊ឺរ៉ុប គឺជាការភូតភរ ដោយមិនចេះខ្មាស់អៀន!
អ្នកនាំពាក្យរាជរដ្ឋាភិបាល៖ យុទ្ធនាការបំភ្លៃការពិតរបស់ក្រុមប្រឆាំងក្រៅច្បាប់ដែលថា លោកនាយករដ្ឋមន្ត្រី ហ៊ុន សែន នឹងទទួលសម្ពាធពីសហភាពអ៊ឺរ៉ុប គឺជាការភូតភរ ដោយមិនចេះខ្មាស់អៀន!
បន្ទាប់ពីលោកនាយករដ្ឋមន្ត្រី ហ៊ុន សែន ប្រកាសថា នឹងធ្វើដំណើរទៅចូលរួមកិច្ចប្រជុំកំពូលអាស៊ី-អ៊ឺរ៉ុប (ASEM) លើកទី១២ ដោយផ្ទាល់នៅទីក្រុងប្រ៊ុចសែល ប្រទេសប៊ែលហ្ស៊ិក ចាប់ផ្តើមពីថ្ងៃទី១៨-១៩ ខែតុលា ឆ្នាំ២០១៨ នោះ មានក្រុមជនខិលខូចមួយចំនួនបានប្រឌិតព័ត៌មានផ្សព្វផ្សាយថា លោកនាយករដ្ឋមន្ត្រី ហ៊ុន សែន នឹងទទួលសម្ពាធពីសហភាពអ៊ឺរ៉ុប ក្នុងពេលប្រជុំនោះ។
ជាការឆ្លើយតបទៅនឹងព័ត៌មានប្រឌិតក្លែងក្លាយខាងលើ ការិយាល័យអ្នកនាំពាក្យរាជរដ្ឋាភិបាល បានចេញសេចក្តីប្រកាសព័ត៌មានមួយទាត់ចោលព័ត៌មានមិនពិតរបស់ក្រុមជនខិលខូចទាំងនោះ នៅថ្ងៃទី១៦ ខែតុលា ឆ្នាំ២០១៨នេះ។
សេចក្តីប្រកាសព័ត៌មានបានបញ្ជាក់ថា លោកនាយករដ្ឋមន្ត្រី ហ៊ុន សែន មិនត្រឹមតែចូលរួមកិច្ចប្រជុំកំពូលអាស៊ី-អ៊ឺរ៉ុប តាមការអញ្ជើញរបស់ ប្រធានក្រុមប្រឹក្សាអ៊ីរ៉ុបលោក Donald Tusk និង ប្រធានគណៈកម្មការអ៊ឺរ៉ុបលោក Jean Claude Junker ប៉ុណ្ណោះទេ ប៉ុន្តែលោក ហ៊ុន សែន នឹងថ្លែងបទអន្តរាគមន៍ដោយផ្តោតលើប្រធានបទ «របៀបវារៈឆ្នាំ ២០៣០ សម្រាប់ការអភិវឌ្ឍប្រកបដោយចីរភាព និងកំណើនសេដ្ឋកិច្ចប្រកបដោយចីរភាព និងបរិយាប័ន្ន »។
សេចក្តីប្រកាសព័ត៌មានដដែលបានឱ្យដឹងថា ការថ្លែងបទអន្តរាគមន៍ក្នុងកិច្ចប្រជុំកំពូលអាស៊ី អ៊ឺរ៉ុប ផ្ទាល់ដោយលោកនាយករដ្ឋមន្ត្រី ហ៊ុន សែន នោះ គឺជារបៀបរារៈផ្លូវការ ដែលជាសត្យានុម័ត ឆ្លើយតបទៅនឹងការធ្វើវិទ្ធង្សនាអកុសល របស់ក្រុមក្រៅច្បាប់ ដែលធ្វើយុទ្ធនាការប្រឌិត និងបំភ្លៃការពិត ដែលលើកឡើងថា លោកនាយករដ្ឋមន្ត្រី ហ៊ុន សែន នឹងទទួលសម្ពាធពីសហភាពអ៊ីរ៉ុប ក្នុងពេលប្រជុំនោះ ជាងនេះទៅទៀត អ្នកនាំពាក្យរាជរដ្ឋាភិបាលកម្ពុជា បានចាត់ទុកយុទ្ធនាការប្រឌិត និងបំភ្លៃការពិត របស់ក្រុមក្រៅច្បាប់នៅពេលនេះ ថាជាការភូតភរយ៉ាងពិតប្រាកដ និងមិនខ្មាស់អៀន។
សូមបញ្ជាក់ផងដែរថា កិច្ចប្រជុំកំពូលអាស៊ី-អ៊ឺរ៉ុប លើកទី១២ ប្រព្រឹត្តទៅក្រោមមូលបទ «អ៊ឺរ៉ុបនិងអាស៊ី៖ ដៃគូសម្រាប់បញ្ហាប្រឈមសកល» នឹងប្រព្រឹត្តទៅចាប់ពីថ្ងៃទី១៨-១៩ ខែតុលា ឆ្នាំ២០១៨ នៅទីក្រុងប្រ៊ុចសែល ប្រទេសប៊ែលហ្ស៊ិក ក្នុងគោលបំណង ពង្រឹងកិច្ចសន្ទានា និងកិច្ចសហប្រតិបត្តិការ រវាងតំបន់អាស៊ី និងអ៊ឺរ៉ុប ខណៈដែលតំបន់ទាំងពីរជំរុញការកសាងកម្លាំងរួមគ្នា ដើម្បីដោះស្រាយបញ្ហាជាច្រើន ចាប់ពីការបង្កើនពាណិជ្ជកម្ម និងវិនិយោគ ការតភ្ជាប់ ការអភិវឌ្ឍប្រកបដោយចីរភាព និងបម្រែបម្រួលអាកាសធាតុ៕
