ខ្មែរប៉ុស្ដិ៍ Close

ខួរ​ក្បាល​របស់​លោក​ Albert Einstein ត្រូវ​បាន​គេ​លួច​យក

ដោយ៖ លី វិទ្យា ​​ | ថ្ងៃសៅរ៍ ទី២១ ខែមេសា ឆ្នាំ២០១៨ នគរគំនិត 1046
ខួរ​ក្បាល​របស់​លោក​ Albert Einstein ត្រូវ​បាន​គេ​លួច​យកលោក Thomas Harvey កាន់​ក្រឡ​មាន​ផ្ទុក​ខួរ​ក្បាល​លោក Albert Einstein (ឆ្នាំ​១៩៩៤)/ រូបភាព៖ Getty Images

រូប​វិទូ​សញ្ជាតិ​អាល្លឺម៉ង់​ដ៏​ល្បី Albert Einstein បាន​ទទួល​មរណភាព​កាល​ពី​ថ្ងៃ​ទី​១៨ ខែ​មេសា ឆ្នាំ​១៩៥៥ ក្នុង​វ័យ​៧៦​ឆ្នាំ។ មុន​ស្លាប់ លោក Albert Einstein បាន​ស្នើ​សុំ​ឲ្យ​គ្រួសារ​យក​សាកសព​​របស់​លោក​ទៅ​កប់​នៅ​ក្នុង​ដី។

យ៉ាង​ណា​មិញ ហេតុការណ៍​ចម្លែក​មួយ​បាន​កើត​ឡើង​លើ​សាកសព​លោក Albert Einstein គឺ​ខួរ​ក្បាល​របស់​លោក​ត្រូវ​បាន​អ្នក​ជំនាញ​ផ្នែក​រោគសាស្ត្រ​មួយ​រូប​ឈ្មោះ Thomas Harvey លួច​យក​ទៅ​ធ្វើ​ការ​ពិសោធ ក្នុង​គោល​បំណង​ស្រាយ​អាថ៌កំបាំង​នៃ​ភាព​ឆ្លាតវៃ​ដ៏​អស្ចារ្យ​របស់ Albert Einstein។ នៅ​១​ថ្ងៃ​បន្ទាប់ ក្រុម​គ្រួសារ​លោក Albert Einstein ក៏​បាន​ដឹង​ពី​រឿង​នេះ។ យ៉ាង​ណា​មិញ ក្រោយ​ការ​ចរចា​គ្នា កូន​ប្រុស​លោក Albert Einstein ក៏​យល់​ព្រម​ឲ្យ​គេ​យក​ខួរ​ក្បាល​ឪពុក​ទៅ​ពិសោធ។

លោក Albert Einstein
លោក Albert Einstein

លោក Harvey បាន​កាត់​ខួរ​ក្បាល​រូប​វិទូ​ដ៏​ល្បី​នេះ​ជា​បំណែកៗ រួច​បញ្ជូន​ទៅ​កាន់​អ្នក​វិទ្យាសាស្ត្រ​ផ្សេងៗ​គ្នា ដើម្បី​ស្រាវជ្រាវ។ ការ​ស្រាវជ្រាវ​សំខាន់ៗ​មួយ​ចំនួន បាន​ចាប់​ផ្ដើម​លេច​រូបរាង​ឡើង​នៅ​អំឡុង​ទសវត្សរ៍ ១៩៨០ តែ​ភាគ​ច្រើន​នៃ​ការ​រក​ឃើញ​ទាំង​នោះ​មិន​មាន​ការ​ទទួល​ស្គាល់​ទេ។ ការ​ស្រាវជ្រាវ​ដែល​គេ​ទទួល​ស្គាល់​ជាង​គេ​គឺ​នៅ​ឆ្នាំ​១៩៩៩ ដោយ​ក្រុម​អ្នក​ជំនាញ​នៅ​សកល​វិទ្យាល័យ​កាណាដា ដែល​បាន​អះអាង​ថា ផ្នែក​មួយ​នៃ​ខួរក្បាល (Parietal Lobe) លោក Albert Einstein មាន​សមត្ថភាព​ពិសេស​ផ្នែក​គណិតវិទ្យា និង​អវកាស៕

ប្រភព៖ ខ្លីៗ