តំបន់ស្នូល ស្ទឹងសែន ត្រូវបានដាក់ជាតំបន់រ៉ាមសារទី ៥ ដែលទទួលស្គាល់ដោយអន្តរជាតិ
តំបន់ស្នូល ស្ទឹងសែន ត្រូវបានដាក់ជាតំបន់រ៉ាមសារទី ៥ ដែលទទួលស្គាល់ដោយអន្តរជាតិរដ្ឋាភិបាលបានដាក់បញ្ចូលតំបន់រ៉ាមសារស្ទឹងសែនដែលស្ថិតនៅភាគអាគ្នេយ៍នៃបឹងទន្លេសាបជាប្រភេទតំបន់ដីសើមទឹកសាបសម្បូរទៅដោយធនធានព្រៃលិចទឹក និងជាទីជម្រកដ៏សំខាន់សម្រាប់ជីវៈចម្រុះគ្រប់ប្រភេទនោះទៅជា «តំបន់រ៉ាមសារទី ៥» នៃប្រទេសកម្ពុជាដែលត្រូវបានទទួលស្គាល់ជាអន្តរជាតិ។
យោងតាមសេចក្ដីប្រកាសព័ត៌មានរបស់ក្រសួងបរិស្ថានចេញផ្សាយកាលពីថ្ងៃទី ៦ ខែវិច្ឆិកា ឆ្នាំ២០១៨ម្សិលមិញ លោក Masaru Horikami ប្រធាននាយកដ្ឋានសត្វព្រៃនៃក្រសួងបរិស្ថានជប៉ុន ថាភាគីជប៉ុនរីករាយ និងចូលរួមគាំទ្រចំពោះការដាក់បញ្ចូលតំបន់ដីសើមស្ទឹងសែនជាតំបន់រ៉ាមសារហើយសន្យាជួយបណ្ដុះបណ្ដាលពង្រឹងសមត្ថភាពដល់នាយតំបន់ និងមន្ត្រីឧទ្យានុរក្សឲ្យកាន់តែប្រសើរឡើងដើម្បី «ធានាបាននូវសេវាកម្មប្រព័ន្ធអេកូឡូស៊ីនៅតំបន់ស្នូលស្ទឹងសែនសម្រាប់ជាប្រយោជន៍នៃសហគមន៍មូលដ្ឋាន»។
លោកស្រី Reiko Iitsuka ទីប្រឹក្សាជាន់ខ្ពស់ប្រចាំតំបន់អាស៊ីនៃលេខាធិការដ្ឋាន អនុសញ្ញារ៉ាមសារក៏ត្រូវបានស្រង់សម្ដីមកផ្សព្វផ្សាយក្នុងសេចក្ដីប្រកាសនេះដែរថា៖ «តំបន់រ៉ាមសារស្ទឹងសែនគឺមានសារៈសំខាន់ណាស់នៅក្នុងតំបន់ ជាជម្រករបស់ពពួកសត្វស្លាបគ្រប់ប្រភេទពិសេសប្រភេទសត្វស្លាបដែលងាយទទួលរងនូវការគំរាមកំហែងជាសកលជាផ្លូវឆ្លងកាត់របស់សត្វស្លាបទេសន្តរប្រវេសន៍ និងជាជម្រកចំណីអាហាររបស់ពពួកសត្វស្លាបទឹក និងជាជម្រកដ៏សំខាន់របស់ពពួកថនិកសត្វផងដែរ»។
លោកស្រីបន្តថាលេខាធិការដ្ឋានអនុសញ្ញារ៉ាមសារនឹងធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា ដើម្បីធានាឲ្យបាននូវការគ្រប់គ្រងតំបន់ដីសើមឲ្យមាននិរន្តរភាព និងជំរុញឲ្យមានការប្រើប្រាស់ដោយឈ្លាសវៃនូវតំបន់ដីសើម ដើម្បីជាប្រយោជន៍ដល់សហគមន៍ និងបរិស្ថាន។ ទន្ទឹមនឹងនេះលេខាធិការដ្ឋានអនុសញ្ញា រ៉ាមសារនឹងបន្តគាំទ្ររាជរដ្ឋាភិបាលក្នុងការដាក់បញ្ចូលតំបន់ដីសើមផ្សេងទៀតជាតំបន់ «រ៉ាមសារ»។
យោងតាមអនុក្រឹត្យរបស់រដ្ឋាភិបាលចុះថ្ងៃទី ២ ខែវិច្ឆិកានេះតំបន់រ៉ាមសារស្ទឹងសែនមានផ្ទៃក្រឡាសរុប ៩២៩៣ ហិកតាមានតួនាទីរក្សាលំនឹងទឹកក្រោមដី បន្សុទ្ធទឹកតាមរយៈរុក្ខជាតិក្នុងទឹកនិងព្រៃលិចទឹក និងជាប្រភពទឹកសាបដ៏សំខាន់សម្រាប់ស្រោចស្រពដំណាំ និងទ្រទ្រង់ជីវភាពរស់នៅប្រចាំថ្ងៃរបស់ប្រជាពលរដ្ឋនៅក្នុង និងជុំវិញតំបន់នេះ។ ជាពិសេសជាជង្រុកចំណីអាហារដ៏សម្បូរបែបរបស់ពពួកថនិកសត្វ សត្វស្លាបទឹក មច្ឆជាតិ និងជីវៈចម្រុះជាច្រើនទៀត។
ប្រទេសកម្ពុជាមានផ្ទៃដីគ្របដណ្ដប់ប្រមាណ ៣០ ភាគរយជាតំបន់ដីសើម ហើយតំបន់ទាំងនោះភាគច្រើនមានសារៈសំខាន់ជាអន្តរជាតិ ដោយសារតំបន់ទាំងនោះបានផ្ដល់នូវសេវាកម្មប្រព័ន្ធអេកូឡូស៊ី និងទ្រទ្រង់ដល់ពពួកសត្វ ដែលជិតផុតពូជជាច្រើនប្រភេទ។ កម្ពុជាបានចូលជាសមាជិកនៃអនុសញ្ញារ៉ាមសារថ្ងៃទី ២៣ ខែតុលា ឆ្នាំ ១៩៩៩ មកម្ល៉េះ និងបានដាក់បញ្ចូលតំបន់ដីសើមរបស់ខ្លួនចំនួន ៤ រួចមកហើយជាតំបន់រ៉ាមសាររួមមាន តំបន់រ៉ាមសារបឹងឆ្មារ ដែលមានលេខរៀងតំបន់ ៩៩៧ តំបន់រ៉ាមសារកោះកាពិ លេខរៀងតំបន់ ៩៩៨ តំបន់រ៉ាមសារស្ទឹងសែនលេខរៀងតំបន់ ៩៩៩ និងតំបន់រ៉ាមសារព្រែកទាល់លេខរៀង ២២៤៥៕
